ശബരിമല ചരിത്രത്തില് ഒരു സവിശേഷ അധ്യായം കുറിച്ചുകൊണ്ട്, 2007 ഡിസംബർ 30-ന് അന്നത്തെ കേരള മുഖ്യമന്ത്രി വി.എസ്. അച്യുതാനന്ദൻ ശബരിമല സന്നിധാനത്തേക്ക് കാല്നടയായി യാത്ര ചെയ്തു. എണ്പത്തിയഞ്ച് വയസ്സുള്ള ഒരു വ്യക്തിക്ക് ശബരിമലയിലെ ദുർഘടമായ പാത താണ്ടുക എന്നത് വലിയ വെല്ലുവിളിയായിരുന്നിട്ടും, ഡോളിയുടെ സഹായം നിരസിച്ച് കാല്നടയായി മലകയറി വി.എസ്. അച്യുതാനന്ദൻ ശ്രദ്ധേയനായി.
ശബരിമല സന്ദർശിക്കുന്ന ആദ്യത്തെ കമ്മ്യൂണിസ്റ്റ് മുഖ്യമന്ത്രി എന്ന നിലയിലും ഈ യാത്ര ചരിത്രപരമായി അടയാളപ്പെടുത്തുന്നു. മുഖ്യമന്ത്രിയുടെ വരവിനോടനുബന്ധിച്ച് പമ്ബയില് ഡോളിയും കസേരയുമെല്ലാം ഒരുക്കിയിരുന്നു. എന്നാല്, എല്ലാവരെയും അമ്ബരപ്പിച്ചുകൊണ്ട്, താൻ കാല്നടയായി മലകയറുമെന്ന് വി.എസ്. പ്രഖ്യാപിച്ചു. ഒപ്പമുണ്ടായിരുന്ന ആരോഗ്യമന്ത്രി പി.കെ. ശ്രീമതി, എം.എല്.എ.മാരായ രാജു എബ്രഹാം, കെ.സി. രാജഗോപാല് എന്നിവർ ഡോളിയുടെ സഹായം സ്വീകരിക്കാൻ തയ്യാറായെങ്കിലും, വി.എസ്. തന്റെ നിലപാടില് ഉറച്ചുനിന്നു.
“മലകയറ്റത്തിന്റെ സിദ്ധാന്തം തന്നെ പഠിപ്പിക്കേണ്ട” എന്ന മട്ടില് അദ്ദേഹം മുന്നോട്ട് നടക്കുകയായിരുന്നു. ഉദ്യോഗസ്ഥരും ഡോക്ടർമാരും അടങ്ങിയ സംഘവും അദ്ദേഹത്തോടൊപ്പം മലകയറി. യാത്രയ്ക്കിടെ, നീലിമലയും അപ്പാച്ചിമേടും പോലുള്ള ദുർഘടമായ പാതകളിലൂടെ കടന്നുപോകുമ്ബോള്, ആരോഗ്യം സംരക്ഷിക്കുന്നതിനായി കരിക്കും ജ്യൂസുമെല്ലാം അദ്ദേഹത്തിന് നല്കാൻ ശ്രമിച്ചെങ്കിലും, വി.എസ്. സ്നേഹത്തോടെ അവയെ നിരസിച്ചു. വിശ്രമത്തിനായി കസേര കൊണ്ടുവന്നപ്പോഴും അദ്ദേഹം യാത്രയുടെ ഒരു ഘട്ടത്തിലും ഇരുന്നില്ല. മലയിറങ്ങിവരുന്ന അയ്യപ്പഭക്തരെ അഭിവാദ്യം ചെയ്തുകൊണ്ട് അദ്ദേഹം മുന്നോട്ട് നീങ്ങി.
ശരംകുത്തിയില് വെച്ച് വി.എസിനായി വെടിവഴിപാട് നടത്തിയത് കൗതുകകരമായ അനുഭവമായി. “വി.എസ്. സ്വാമിക്ക് വെടിവഴിപാട്” എന്ന അനൗണ്സ്മെന്റ് കേട്ട് ചുറ്റുമുണ്ടായിരുന്നവർ ചിരിച്ചപ്പോള്, “ജനങ്ങള്ക്ക് വേണ്ടി വെടിവഴിപാട് സമർപ്പിക്കുന്നു” എന്നായിരുന്നു വി.എസിന്റെ പ്രതികരണം.യാത്രയ്ക്കിടെ, “മതികെട്ടാനും പൂയംകുട്ടിയും തലകുനിച്ചിടത്ത് ശബരിമല കയറ്റം കഠിനമല്ല” എന്ന് വി.എസ്. അച്യുതാനന്ദൻ മാധ്യമങ്ങളോട് പ്രതികരിച്ചു. തന്റെ രാഷ്ട്രീയ ജീവിതത്തിലെ ദുഷ്കരമായ വഴികളും ദൃഢനിശ്ചയവും ഓർമ്മിപ്പിക്കുന്നതായിരുന്നു അദ്ദേഹത്തിന്റെ ഈ ശബരിമല യാത്ര. വൈകുന്നേരം അഞ്ചരയ്ക്ക് ആരംഭിച്ച കാല്നട യാത്ര രാത്രി 8:50-ഓടെ ശബരിമല സന്നിധാനത്ത് സമാപിച്ചു.
