എറണാകുളം കളമശ്ശേരിയിലുള്ള റിക്രൂട്ട്മെൻറ് ഏജൻസി വിസ തട്ടിപ്പ് നടത്തുന്നു എന്ന് ആക്ഷേപം; കോതമംഗലം സ്വദേശിയെ പോളണ്ട് വർക്ക് വിസ വാഗ്ദാനം ചെയ്ത് കോർ ഇൻറർടെക് സർവീസസ് പ്രൈവറ്റ് ലിമിറ്റഡ് എന്ന സ്ഥാപനം തട്ടിച്ചത് ഒരു ലക്ഷം രൂപ: വിശദാംശങ്ങളും ചാറ്റ് സ്ക്രീൻഷോട്ടുകളും വാർത്തയോടൊപ്പം.

യുവാവ് താൽക്കാലിക വിസയിൽ യൂറോപ്പിൽ ജോലി ചെയ്തു വരവെയാണ് ഏജൻസി ഇയാളുമായി ബന്ധപ്പെട്ടത്. ഒരു ലക്ഷം രൂപ നൽകിയാൽ റസിഡൻസി കാർഡും വർക്ക് പെർമിറ്റും ശരിയാക്കി കൊടുക്കാം എന്നായിരുന്നു വാഗ്ദാനം. 2023 ലാണ് സംഭവം നടന്നത്. ഒരു മാസത്തിനകം എല്ലാം ശരിയാക്കാം എന്ന് വാഗ്ദാനം ചെയ്താണ് പണം കൈക്കലാക്കിയത്. ഒന്നും നടക്കാത്തതിനാൽ വിസ എക്സ്പെയർ ആയതോടെ യുവാവിനെ യൂറോപ്പിൽ നിന്ന് നാടു കടത്തി.

തിരികെ നാട്ടിലെത്തിയ യുവാവ് പണം ആവശ്യപ്പെട്ട് ഏജൻസിയെ സമീപിച്ചെങ്കിലും ഓരോ മുട്ടപോക്ക് ന്യായങ്ങൾ നിരത്തി ഇവർ പണം നൽകാതെ കബളിപ്പിക്കുകയാണ്. 2023 നവംബർ ഡിസംബർ മാസങ്ങളിൽ കൈമാറിയ പണം 2025 മാർച്ച് മാസത്തിൽ പോലും തിരികെ കിട്ടിയിട്ടില്ല. തന്റെ ദൈന്യത വെളിപ്പെടുത്തിക്കൊണ്ടു തന്നെയാണ് യുവാവ് പണം കൈമാറിയത്. എല്ലാം ശരിയാക്കാം എന്ന് ഏജൻസി ഉദ്യോഗസ്ഥൻ വാഗ്ദാനം ചെയ്യുന്ന സ്ക്രീൻഷോട്ടുകൾ ചുവടെ കാണാം.

Metro pillar number 299&300, Post office building, 37/170 A, First Floor, AK Tower, Changampuzha Nagar, South Kalamassery, Edappally, Kochi, Kerala 682033 എന്ന അഡ്രസ്സിൽ ആണ് ആരോപണ വിധേയമായ ഈ സ്ഥാപനം ഇപ്പോൾ പ്രവർത്തിക്കുന്നത്. ഇവരുമായി ബന്ധപ്പെടാൻ ശ്രമിക്കുമ്പോൾ ധാർഷ്ട്യം കടന്ന മറുപടികളാണ് ജീവനക്കാരിൽ നിന്ന് തിരികെ ലഭിക്കുന്നത്. കേസ് ആയി പോയാൽ പണം കിട്ടുന്നത് അനന്തമായി നീളുമെന്ന് ഭയത്തിലാണ് പലപ്പോഴും തട്ടിപ്പിനിരയാകുന്നവർ ഇതിനുമുതിരാത്തത്. ഈ ഭയം ചൂഷണം ചെയ്ത് തന്നെ തട്ടിപ്പുകാർ യഥേഷ്ടം തട്ടിപ്പ് തുടരുകയും ചെയ്യുന്നു. സമൂഹമാധ്യമങ്ങളിൽ അടക്കം വ്യാപകമായി ഇവർ വിദേശ റിക്രൂട്ട്മെൻറ് ഉള്ള പോസ്റ്ററുകൾ പങ്കുവെക്കുന്നുമുണ്ട്. അധികൃതരുടെ ഭാഗത്തുനിന്നുള്ള കാര്യക്ഷമമായ ഇടപെടൽ ഉണ്ടെങ്കിൽ മാത്രമേ ഇത്തരം തട്ടിപ്പുകാരെ നിയന്ത്രിക്കാൻ കഴിയുകയുള്ളൂ. കോടികളുടെ തട്ടിപ്പ് നടത്തി ജയിലിൽ പോകുന്ന പ്രവീണയെപ്പോലുള്ളവർ ഇപ്പോൾ ജാമ്യത്തിൽ ഇറങ്ങി മോട്ടിവേഷണൽ സ്പീക്കർമാരായി കസറുന്നതും തട്ടിപ്പുകാർക്ക് കൂടുതൽ പ്രചോദനം നൽകുന്ന സംഭവമാണ്.