രജനികാന്തിനെ നായകനാക്കി ടി.ജെ.ജ്ഞാനവേല് തിരക്കഥയെഴുതി സംവിധാനംചെയ്യുന്ന വേട്ടയൻ എന്ന ചിത്രത്തിന്റെ ഓരോ അപ്ഡേറ്റും ആരാധകരും സിനിമാ പ്രേമികളും ആവേശത്തോടെയാണ് സ്വീകരിക്കുന്നത്. കഴിഞ്ഞദിവസമാണ് ചിത്രത്തില് ഒരു പ്രധാനവേഷത്തിലെത്തുന്ന ഫഹദ് ഫാസിലിന്റെ കഥാപാത്രത്തെ പരിചയപ്പെടുത്തിക്കൊണ്ടുള്ള വീഡിയോ അണിയറപ്രവർത്തകർ പുറത്തുവിട്ടത്.
രജനികാന്തിനും അമിതാഭ് ബച്ചനും ഒപ്പമുള്ള ഫഹദിന്റെ ലൊക്കേഷൻ ദൃശ്യങ്ങള് ഇതിനോടകം വൈറലായിക്കഴിഞ്ഞു. ലൈക്ക പ്രൊഡക്ഷൻസാണ് വേട്ടയൻ നിർമിക്കുന്നത്. ഇവരുടെ സോഷ്യല് മീഡിയാ പേജിലൂടെയാണ് ഫഹദിന്റെ കഥാപാത്രത്തെ പരിചയപ്പെടുത്തുന്ന വീഡിയോ പുറത്തുവന്നത്. പാട്രിക്ക് എന്നാണ് ഫഹദ് അവതരിപ്പിക്കുന്ന കഥാപാത്രത്തിന്റെ പേര്.
വീഡിയോയില് ഒരിടത്ത് അമിതാഭ് ബച്ചന് കൈകൊടുക്കുന്ന ഫഹദിനെ കാണാം. എന്നാല് ആരാധകർ ഏറ്റെടുത്തിരിക്കുന്നത് നിമിഷങ്ങള് മാത്രമുള്ള വീഡിയോയുടെ അവസാനഭാഗത്തുവരുന്ന മറ്റൊരു രംഗമാണ്. ഫഹദിന്റെ അഭിനയം കാണാൻ ആകാംക്ഷയോടെ അദ്ദേഹത്തിന്റെ പിന്നില് വന്നുനില്ക്കുകയാണ് രജനികാന്ത്. എന്നാല് തന്റെ പിന്നില് ഒരാള് ഉള്ള കാര്യം ഫഹദ് മനസിലാക്കുന്നേയില്ല.
അല്പനിമിഷം കഴിഞ്ഞ് തിരിഞ്ഞുനോക്കുമ്ബോഴാണ് പിന്നില് സൂപ്പർ സ്റ്റാർ നില്ക്കുന്നത് ഫഹദ് കാണുന്നതും ഞെട്ടുന്നത്. വിനയാന്വിതനാവുന്ന ഫഹദിന്റെ പുറത്ത് രജനികാന്ത് കളിയായി അടിക്കുന്നതും വീഡിയോയിലുണ്ട്. നിരവധി പേരാണ് വീഡിയോയ്ക്ക് പ്രതികരണവുമായെത്തിയത്. വീഡിയോയുടെ അവസാനഭാഗം മാത്രം നിരവധി തവണ കണ്ടെന്നാണ് പലരും പറഞ്ഞത്.
