വിവാഹ ദിനത്തില് മുങ്ങിയതിന് പിന്നാലെ പ്രതിശ്രുത വധു നല്കിയ പീഡന പരാതിയില് പ്രതിശ്രുത വരൻ അറസ്റ്റില്.വെള്ളരിക്കുണ്ട് ബളാല് സ്വദേശി വിഷ്ണു നാരായണനെയാണ് (24) വെള്ളരിക്കുണ്ട് പൊലീസ് അറസ്റ്റ് ചെയ്തത്.
കോടതിയില് ഹാജരാക്കിയ പ്രതിയെ റിമാൻഡ് ചെയ്തു. വിഷ്ണുവും യുവതിയും പ്രണയത്തിലായിരുന്നു. മേയ് പത്തിന് ബളാലിലെ ഒരു ക്ഷേത്രത്തില് വിവാഹം നടത്താൻ തീരുമാനിച്ചു.
വിവാഹത്തിനുള്ള ഒരുക്കങ്ങള് പൂർത്തിയാക്കി വധുവും ബന്ധുക്കളും ക്ഷേത്രത്തിലെത്തി. എന്നാല് മുഹൂർത്തമായിട്ടും വരനും സംഘവും എത്തിയില്ല. ഇതിനിടെ വരന്റെ ബന്ധുക്കള് ക്ഷേത്രത്തിലെത്തി വരനെ കാണാനില്ലെന്ന് അറിയിച്ചു.
ഇതോടെ വിവാഹം മുടങ്ങുകയും വധുവും വീട്ടുകാരും വീട്ടിലേക്ക് മടങ്ങുകയുമായിരുന്നു. പിന്നാലെ വിഷ്ണു ലൈംഗികമായി പീഡിപ്പിച്ചതായി യുവതി പൊലീസില് പരാതി നല്കി. തുടർന്ന് പൊലീസ് നടത്തിയ അന്വേഷണത്തില് യുവാവിനെ അറസ്റ്റ് ചെയ്യുകയായിരുന്നു.
