ഷിരൂരില് മണ്ണിടിച്ചിലില് മരിച്ച ലോറി ഡ്രൈവര് അര്ജുന്റെ കുടുംബം നല്കിയ പരാതിയില് പൊലീസ് കേസെടുത്തു.സൈബര് ആക്രമണത്തിനെതിരെയാണ് കേസ് എടുത്തിരിക്കുന്നത്. ലോറി ഉടമ മനാഫിനെ പ്രതിചേർത്താണ് എഫ്ഐആർ രജിസ്റ്റർ ചെയ്തിരിക്കുന്നത്. അർജുന്റെ സഹോദരി അഞ്ജുവാണ് കോഴിക്കോട് സിറ്റി പൊലീസ് കമ്മീഷണർക്ക് പരാതി നല്കിയത്. സഹിക്കാന് ആകാത്ത വിധത്തിലുള്ള സൈബര് ആക്രമണമാണ് നടക്കുന്നത് എന്നാണ് കുടുംബം നല്കിയ പരാതിയില് പറയുന്നത്.
കോഴിക്കോട് മെഡിക്കല് കോളജ് എസിപി എ ഉന്മേഷിനാണ് അന്വേഷണ ചുമതല. ബിഎൻഎസ് 192 വകുപ്പ് ചേർത്താണ് കോഴിക്കോട് സിറ്റി പോലീസ് കേസ് എടുത്തത്. ഭാരതീയ ന്യയ സംഹിതയിലെ കടുത്ത വകുപ്പ് ചുമത്തിയാണ് എഫ്ഐആർ. കെപി ആക്ട് ലെ 120 വകുപ്പും ചുമത്തിയിട്ടുണ്ട്.
സമൂഹത്തില് ചേരിതിരിവ് ഉണ്ടാക്കാന് ശ്രമം നടത്തിയെന്ന വകുപ്പ് ചുമത്തിയാണ് കേസെടുത്തത്. സോഷ്യല് മീഡിയ പേജുകള് പരിശോധിക്കുമെന്നും ഇന്ന് കുടുംബത്തിന്റെ മൊഴി എടുക്കുമെന്നും പൊലീസ് അറിയിച്ചു. സംഭവത്തില് ശക്തമായ നടപടി എടുക്കുമെന്ന് പൊലീസ് പറഞ്ഞു. സൈബര് ആക്രമണങ്ങള്ക്ക് എതിരെ ഇന്നലെയാണ് അര്ജുന്റെ കുടുംബം പരാതി നല്കിയത്.
ലോറി ഉടമ മനാഫിനെതിരെ ഗുരുതര ആരോപണങ്ങളുമായി അര്ജുന്റെ കുടുംബം ഇന്നലെ രംഗത്തെത്തിയിരുന്നു. മനാഫ് മാധ്യമങ്ങളില് പറഞ്ഞ ചില കാര്യങ്ങള് മൂലം കടുത്ത സൈബര് ആക്രമണമാണ് കുടുംബം നേരിടുന്നതെന്നും ഭാര്യയടക്കമുള്ള കുടുംബത്തോടൊപ്പം മാധ്യമങ്ങള്ക്ക് മുന്നിലെത്തി അര്ജുന്റെ സഹോദരി ഭര്ത്താവ് ജിതിന് മാധ്യമങ്ങളോട് പറഞ്ഞിരുന്നു.
മനാഫിനെതിരെ ആരോപണം ഉന്നയിച്ചതിന് പിന്നാലെ ഇക്കാര്യത്തില് വിശദീകരണവുമായി മനാഫും രംഗത്തെത്തിയിരുന്നു. സൈബര് ആക്രമണം രൂക്ഷമായതോടെ ഇന്നലെ മനാഫ് വാര്ത്താസമ്മേളനം നടത്തി അര്ജുന്റെ കുടുംബത്തോട് നിരുപാധികം മാപ്പു പറഞ്ഞു. അര്ജുന്റെ കുടുംബത്തിനെതിരായ നടക്കുന്ന സൈബര് ആക്രമണങ്ങള് ഉണ്ടാകരുതെന്നും ഇത്തരം വിവാദങ്ങള് അവസാനിപ്പിക്കണമെന്നും മനാഫ് ആവശ്യപ്പെട്ടിരുന്നു.
