സിജെപി സമരവുമായി ബന്ധപ്പെട്ട് മലയാള സിനിമാ താരങ്ങളുടെ സോഷ്യല് മീഡിയ പ്രതികരണങ്ങള് വലിയ ചർച്ചയായിക്കൊണ്ടിരിക്കുന്നതിനിടെ, നടി നവ്യാ നായർ പങ്കുവെച്ച ഒരു ഇൻസ്റ്റഗ്രാം പോസ്റ്റും ശ്രദ്ധ നേടുകയാണ്.മുംബൈയില് സിജെപി സമരത്തിനിടെ വൈറലായ ഒരു പ്രതിഷേധ ചിത്രത്തെ അനുസ്മരിപ്പിക്കുന്ന രീതിയില് പകർത്തിയ ഫോട്ടോയാണ് നവ്യാ ഇൻസ്റ്റഗ്രാമില് പങ്കുവെച്ചത്. എന്നാല് പോസ്റ്റ് അധികനേരം തുടർന്നില്ല. വളരെ ചുരുങ്ങിയ സമയത്തിനുള്ളില് തന്നെ താരം അത് ഡിലീറ്റ് ചെയ്തു.
കൊല്ക്കത്തയില് ഒരു പൊലീസ് വാഹനത്തിന് മുന്നില് കൈവെച്ച് നില്ക്കുന്ന ദൃശ്യമാണ് താരം പങ്കുവച്ചത്. പോസ്റ്റിന് പശ്ചാത്തല സംഗീതമായി ‘വന്ദേ മാതരം’ ചേർത്തിരുന്നതും ശ്രദ്ധേയമായി. സിജെപി സമരത്തോടുള്ള പരോക്ഷ പിന്തുണയായാണ് നിരവധി സോഷ്യല് മീഡിയ ഉപയോക്താക്കള് പോസ്റ്റിനെ വിലയിരുത്തിയത്. എന്നാല് ഇതുസംബന്ധിച്ച് നവ്യാ നായർ യാതൊരു വിശദീകരണവും നല്കിയിട്ടില്ല.
വൈറലായ മുംബൈ പ്രതിഷേധ ചിത്രം
നവ്യയുടെ പോസ്റ്റുമായി താരതമ്യം ചെയ്യപ്പെടുന്ന യഥാർത്ഥ ചിത്രം മുംബൈയിലെ സിജെപി അനുകൂല പ്രതിഷേധത്തിനിടെയായിരുന്നു പകർത്തപ്പെട്ടത്. കനത്ത മഴയ്ക്കിടെ പ്രതിഷേധക്കാരെ കയറ്റിയ പൊലീസ് വാഹനത്തിന് മുന്നില് നിന്ന യുവതിയുടെ ദൃശ്യം സമരത്തിന്റെ ശ്രദ്ധേയ ചിത്രങ്ങളിലൊന്നായി മാറി.
നടിയും മോഡലും സംരംഭകയുമായ റിയ എന്ന യുവതിയാണ് പോലീസ് വാഹനത്തെ തടഞ്ഞ് വാർത്തകളില് ഇടം നേടിയത്. ഡല്ഹിയില് നടന്ന ‘സൻസദ് ചലോ’ മാർച്ചിനെതിരായ പൊലീസ് നടപടിയില് പ്രതിഷേധിച്ചുകൊണ്ട് മുംബൈയില് നടന്ന ഐക്യദാർഢ്യ സമരത്തിനിടെയായിരുന്നു ഈ സംഭവം. പ്രതിഷേധക്കാരെ കൊണ്ടുപോകുന്ന പൊലീസ് വാൻ തടയാൻ ശ്രമിക്കുന്ന റിയയുടെ ചിത്രം സാമൂഹ്യമാധ്യമങ്ങളില് വ്യാപകമായി പ്രചരിക്കുകയും സമരത്തിന്റെ പ്രതീകാത്മക ചിത്രങ്ങളിലൊന്നായി മാറുകയും ചെയ്തു.
സോഷ്യല് മീഡിയയില് ചർച്ച
നവ്യാ നായർ പങ്കുവെച്ച ചിത്രവും മുംബൈയില് വൈറലായ ചിത്രവും തമ്മിലുള്ള സാമ്യം ചൂണ്ടിക്കാട്ടി നിരവധി പേർ സമൂഹമാധ്യമങ്ങളില് പ്രതികരിച്ചു. പ്രത്യേകിച്ച് പൊലീസ് വാഹനത്തിന് മുന്നില് ഒരേ രീതിയില് കൈവെച്ച് നില്ക്കുന്ന പോസും, ‘വന്ദേ മാതരം’ പശ്ചാത്തല സംഗീതവും ചേർന്നതോടെ, വിദ്യാർത്ഥി പ്രക്ഷോഭത്തോടുള്ള ഐക്യദാർഢ്യ പ്രകടനമായാണ് പലരും ഇതിനെ വ്യാഖ്യാനിച്ചത്.
അതേസമയം, നവ്യാ നായർ പോസ്റ്റില് എവിടെയും സിജെപി സമരത്തെയോ പ്രതിഷേധത്തെയോ നേരിട്ട് പരാമർശിച്ചിട്ടില്ല. അതിനാല് പോസ്റ്റിന്റെ ഉദ്ദേശ്യം സംബന്ധിച്ച് താരം ഔദ്യോഗികമായി ഒന്നും വ്യക്തമാക്കിയിട്ടില്ല. എന്നാല് പോസ്റ്റ് പങ്കുവെച്ചതിന് പിന്നാലെ അത് പിൻവലിച്ചതും സോഷ്യല് മീഡിയയില് കൂടുതല് ചർച്ചകള്ക്ക് വഴിവെച്ചു.
കഴിഞ്ഞ ദിവസങ്ങളിലായി മലയാള സിനിമയിലെ നിരവധി താരങ്ങള് സിജെപി സമരവുമായി ബന്ധപ്പെട്ട് വിവിധ രീതിയില് പ്രതികരിച്ചതിന് പിന്നാലെയാണ് നവ്യാ നായരുടെ ഈ പോസ്റ്റും ശ്രദ്ധ നേടുന്നത്.
