യുഎഇയിൽ പുതിയ വിസ നിയമങ്ങൾ; വിസ-ഓൺ-അറൈവൽ മുതൽ പ്രോപ്പർട്ടി വിസ വരെ നിർണായക മാറ്റങ്ങൾ, വിശദാംശങ്ങൾ വായിക്കാം

ഫെഡറല്‍ അതോറിറ്റി ഫോർ ഐഡന്റിറ്റി, സിറ്റിസണ്‍ഷിപ്പ്, കസ്റ്റംസ് ആൻഡ് പോർട്ട് സെക്യൂരിറ്റി (ഐസിപി) ആറ് രാജ്യങ്ങളിലെ പൗരന്മാർക്ക് യുഎഇ പ്രവേശന വിസയ്ക്കുള്ള യോഗ്യത വിപുലീകരിച്ചു. 14 ദിവസത്തെയും 60 ദിവസത്തെയും വിസയിലാണ് മാറ്റം കൊണ്ടുവന്നത്.

മുമ്പ് ഇന്ത്യൻ പൗരന്മാർക്ക് മാത്രം ലഭ്യമായിരുന്ന ഈ വിസയ്ക്കായി ഇപ്പോള്‍ ഇന്തോനേഷ്യ, വിയറ്റ്നാം, തായ്‌ലൻഡ്, ഫിലിപ്പീൻസ്, കെനിയ, ദക്ഷിണാഫ്രിക്ക എന്നിവിടങ്ങളിലെ പൗരന്മാർക്കും അപേക്ഷിക്കാം. താമസത്തിന് യോഗ്യതയുള്ള രാജ്യങ്ങളുടെ പട്ടികയും ഐസിപി വിപുലീകരിച്ചു. യുഎസ്‌എ, യുകെ, യൂറോപ്യൻ യൂണിയൻ അംഗരാജ്യങ്ങള്‍ എന്നിവയ്ക്ക് പുറമേ, സിംഗപ്പൂർ, ജപ്പാൻ, ദക്ഷിണ കൊറിയ, ഓസ്‌ട്രേലിയ, ന്യൂസിലാൻഡ്, കാനഡ എന്നിവിടങ്ങളില്‍ റെസിഡൻസിയുള്ളവർക്കും ഇപ്പോള്‍ അപേക്ഷിക്കാം.

ദുബായ് ടൂറിസ്റ്റ് വിസ

ദുബായിലേയ്ക്ക് യാത്ര ചെയ്യാനിരിക്കുന്ന വിനോദസഞ്ചാരികള്‍ക്ക് സിംഗിള്‍ എൻട്രി ടൂറിസ്റ്റ് വിസയ്ക്ക് 48 മണിക്കൂറിനുള്ളില്‍ അംഗീകാരം ലഭിക്കും. 30 മുതല്‍ 60 ദിവസം വരെയാണ് വിസയുടെ കാലാവധി. അംഗീകൃത ടൂറിസം ഓഫീസുകള്‍ വഴി അപേക്ഷിക്കുന്നവർക്ക് ടൂറിസ്റ്റ് വിസകള്‍ ലഭ്യമാകുമെന്ന് ജനറല്‍ ഡയറക്ടറേറ്റ് ഓഫ് ഐഡന്റിറ്റി ആൻഡ് ഫോറിനേഴ്സ് അഫയേഴ്സ് – ദുബായ് (ജിഡിആർഎഫ്‌എ) അറിയിച്ചിട്ടുണ്ട്.

രണ്ടുവർഷ റെസിഡൻസി വിസ നിയമം

രണ്ട് വർഷത്തെ പ്രോപ്പർട്ടി – ലിങ്ക്ഡ് റെസിഡൻസി പെർമിറ്റ് അനുവദിക്കുന്നതിനുള്ള പുതുക്കിയ വ്യവസ്ഥകള്‍ പ്രകാരം വ്യക്തിഗത നിക്ഷേപകർക്ക് ഏറ്റവും കുറഞ്ഞ പ്രോപ്പർട്ടി മൂല്യം 750,000 ദിർഹം എന്ന നിബന്ധന നീക്കം ചെയ്തു. എന്നാല്‍ അപേക്ഷകൻ സ്വത്തിന്റെ ഏക ഉടമയായിരിക്കണം.

സ്വത്ത് സംയുക്ത ഉടമസ്ഥതയിലാണെങ്കില്‍ ഉടമസ്ഥാവകാശം തുല്യമായി വിഭജിക്കപ്പെട്ടാലും, റെസിഡൻസി വിസയ്ക്ക് അപേക്ഷിക്കാൻ യോഗ്യത നേടുന്നതിന് ഓരോ നിക്ഷേപകനും കുറഞ്ഞത് 400000 ദിർഹത്തിന്റെ ഓഹരി ഉണ്ടായിരിക്കണം.

താല്‍ക്കാലിക ഓവർസ്റ്റേ പിഴ ഇളവ്

പ്രാദേശിക വ്യോമാതിർത്തി അടച്ചിടലുകളും വിമാന തടസങ്ങളും കാരണം ഓവർസ്റ്റേ പിഴകളില്‍ നിന്ന് ഒഴിവാക്കപ്പെട്ട സന്ദർശകർക്ക് ഐസിപി 30 ദിവസത്തെ ഇളവ് പ്രഖ്യാപിച്ചു. അസാധാരണമായ സാഹചര്യങ്ങള്‍ അവസാനിച്ചതിനാല്‍ അധികമായി തങ്ങിയവർ ജൂലായ് ഒൻപതിന് മുമ്പ് അവരുടെ വിസ സ്റ്റാറ്റസ് ശരിയാക്കുകയോ യുഎഇ വിടുകയോ ചെയ്യണമെന്നാണ് നിർദേശം.

സ്‌മാർട്ട് മെഡിക്കല്‍ വിസ

ചികിത്സയ്ക്കായി എമിറേറ്റിലേക്ക് പോകുന്ന രോഗികള്‍ക്ക് ‘സ്മാർട്ട് മെഡിക്കല്‍ വിസ’യും കൂടുതല്‍ തടസമില്ലാത്ത സേവനങ്ങളും ലഭ്യമാകും. ദുബായ് ജനറല്‍ ഡയറക്ടറേറ്റ് ഓഫ് ഐഡന്റിറ്റി ആൻഡ് ഫോറിനേഴ്‌സ് അഫയേഴ്‌സും ദുബായ് ഹെല്‍ത്ത് അതോറിറ്റിയും ഒപ്പുവച്ച പുതിയ കരാർ പ്രകാരമാണ് പ്രഖ്യാപനം.