കോട്ടയം കാഞ്ഞിരപ്പള്ളി കൂവപ്പള്ളിയില് വീട്ടിനുള്ളില് രണ്ടു പേരെ മരിച്ച നിലയില് കണ്ടെത്തിയ സംഭവത്തിന് പിന്നില് സാമ്പത്തിക ഇടപാടുകളുമായി ബന്ധപ്പെട്ട തകര്ക്കമെന്ന് സൂചന.ഇന്നലെ രാത്രിയോടെയാണ് കൂവപ്പള്ളിയിലെ വീട്ടിൽ ഷേർളിയുടെയും ജോബിനെയും മരിച്ച നിലയില് കണ്ടെത്തിയത്. യുവതിയെ കഴുത്തറുത്ത് കൊന്നശേഷം യുവാവ് തൂങ്ങി മരിക്കുകയായിരുന്നു.
ഇടുക്കി കല്ലാർഭാഗം സ്വദേശി ഷേർളി മാത്യുവും കോട്ടയം താഴത്തങ്ങാടി സ്വദേശി ജോബ് സകറിയയും ആണ് മരിച്ചത്. ഇന്നലെ അര്ധരാത്രിയോടെയാണ് വീടിനുള്ളില് ഇരുവരെയും മരിച്ച നിലയില് കണ്ടെത്തിയത്. സാമ്പത്തിക ഇടപാടിനെ തുടർന്നുള്ള കൊലപാതകമെന്നാണ് പൊലീസ് നിഗമനം. ഷേര്ളിക്ക് മറ്റൊരാളുമായി ബന്ധമുണ്ടെന്ന ആക്ഷേപം ഉന്നയിച്ചും ഇരുവരും തമ്മില് തര്ക്കമുണ്ടായിരുന്നുവെന്നുമാണ് പൊലീസ് പറയുന്നത്.
കാഞ്ഞിരപ്പള്ളിക്ക് അടുത്ത് കൂവപ്പള്ളിയിലെ ഷേർളിയുടെ വീട്ടില് ആണ് ഇരുവരുടെയും മൃതദേഹം കണ്ടത്. ഇന്നലെ രാത്രി ഷേർലിയെ ഫോണില് വിളിച്ചിട്ട് കിട്ടാതിനെ തുടർന്ന് സുഹൃത്ത് പൊലീസ് സ്റ്റേഷനില് വിവരം അറിയിച്ചു. പൊലീസ് സ്ഥലത്ത് എത്തി പരിശോധിച്ചപ്പോഴാണ് സംഭവം പുറത്ത് അറിയുന്നത്. വീടിന്റെ പിൻവശത്തെ വാതില് തുറന്ന നിലയില് ആയിരുന്നു. മറ്റ് ബലപ്രയാഗത്തിന്റെ സൂചനകള് ഒന്നും പരിശോധനയില് കണ്ടെത്താനായില്ല. ഷേർളിയുടെ മൃതദേഹം കിടപ്പുമുറിയിലും ജോബിന്റെ മൃതദേഹം സ്റ്റെയർകേസിനോട് ചേർന്നുമാണ് ഉണ്ടായിരുന്നത്. ഷെർളിയുടെ ശരീരത്തില് നിരവധി മുറിവുകളുണ്ട്. ആറുമാസം മുമ്പാണ് ഷേര്ളി കൂവപ്പള്ളിയില് വീട് വാങ്ങി താമസം തുടങ്ങിയത്.
കുറെ നാളുകളായി ഷേര്ളിയും ജോബും തമ്മില് അടുപ്പത്തിലായിരുന്നു. ജോബ് ഇടയ്ക്കിടെ കൂവപ്പള്ളിയിലെ വീട്ടില് എത്തുമായിരുന്നു. നാട്ടുകാരുമായി ഇരുവർക്കും ബന്ധം ഉണ്ടായിരുന്നില്ല. ഇരുവരും തമ്മില് സാമ്പത്തിക ഇടപാടുകള് ഉണ്ടായിരുന്നു. ഷേർളി ജോബിന്റെ കൈയ്യില് നിന്ന് പലതവണയായി പണം വാങ്ങിയിട്ടുണ്ട്. പണമിടപാടുകളെ ചൊല്ലി ഇരുവരും തമ്മില് അടുത്തിടെ തർക്കത്തിലായി. ഇതിനു പിന്നാലെ ജോബ് ഉപദ്രവിക്കുന്നെന്ന പരാതിയുമായി ഷേര്ളി കാഞ്ഞിരപ്പള്ളി പൊലീസിനെ സമീപിച്ചു. ഇതിനിടെ ഷേർളിക്ക് മറ്റൊരാളുമായി ബന്ധമുണ്ടെന്ന് ആക്ഷേപം ഉന്നയിച്ചും ഇരുവരും തമ്മില് വാക്കേറ്റം ഉണ്ടായിട്ടുണ്ട്. രണ്ടു പേരുടെയും ബന്ധുക്കളില് നിന്ന് പൊലീസ് കൂടുതല് വിവരം തേടി. ഫോറെൻസിക് സംഘം വീട്ടില് എത്തി പരിശോധന നടത്തി. മൃതദേഹങ്ങള് പോസ്റ്റ്മോര്ട്ടത്തിനായി കോട്ടയം മെഡിക്കല് കോളേജിലേക്ക് മാറ്റി.
