മുസ്ലിം പെണ്കുട്ടികളെ വിവാഹം ചെയ്താല് ഹിന്ദുയുവാക്കള്ക്ക് അഞ്ചുലക്ഷം രൂപ പാരിതോഷികം നല്കുമെന്ന് ബിജെപി എംഎല്എ ബസനഗൗഡ പാട്ടീല്.ഈ വാഗ്ദാനവുമായി താൻ പ്രചാരണം നടത്തുമെന്നും ബിജാപൂർ സിറ്റി എംഎല്എ കൂടിയായ പാട്ടീല് വ്യക്തമാക്കി. കൊപ്പാളില് മുസ്ലിം യുവതിയെ പ്രണയിച്ച യുവാവിനെ ഒരു സംഘം ആളുകള് ചേർന്ന് കൊലപ്പെടുത്തിയ സംഭവത്തിന്റെ പശ്ചാത്തലത്തിലാണ് എംഎല്എയുടെ പ്രസ്താവന.
വാല്മീകി വിഭാഗത്തില് ഉള്പ്പെട്ട ഗവിസിദ്ധപ്പ നായിക്കാണ് (26) കഴിഞ്ഞദിവസം കൊല്ലപ്പെട്ടത്. പ്രധാന പ്രതി സാദിഖ് ഹുസൈൻ കൊലപാതകത്തിനുശേഷം പോലീസില് കീഴടങ്ങിയിരുന്നു. മറ്റ് മൂന്ന് പ്രതികളെ പിന്നീട് പോലീസ് അറസ്റ്റുചെയ്തു.
ഗവിസിദ്ധപ്പ പ്രണയിച്ചിരുന്ന പെണ്കുട്ടിയെ സാദിഖും പ്രണയിച്ചിരുന്നു. ഇതിന്റെ പേരിലുള്ള വൈരാഗ്യമാണ് കൊലപാതകത്തിന് പ്രേരിപ്പിച്ചതെന്നാണ് പോലീസ് പറയുന്നത്. എന്നാല്, ഇത് ദുരഭിമാനക്കൊലപാതകമാണ് എന്നാണ് ബസനഗൗഡയുടെ ആരോപണം.
