തെരുവോരങ്ങളില് ചായ വിറ്റ് ചരിത്രം രചിച്ച ഡോളി ചായ് വാല എന്ന സുനില് പാട്ടീല് ഇപ്പോള് തന്റെ ബ്രാൻഡായ ‘ഡോളി കി തപ്രി’ എന്ന പേരില് ഇന്ത്യയിലുടനീളം വ്യാപിപ്പിക്കാനുള്ള ഫ്രാഞ്ചൈസി പദ്ധതി പ്രഖ്യാപിച്ചു. മൈക്രോസോഫ്റ്റ് സഹസ്ഥാപകൻ ബില് ഗേറ്റ്സുമായുള്ള സഹകരണത്തിലൂടെയും വിചിത്രമായ രീതിയില് ചായ വിളമ്ബുന്നത് സോഷ്യല് മീഡിയയില് വൈറലായ ഡോളി, മൂന്ന് ഫ്രാഞ്ചൈസി ഫോർമാറ്റുകളാണ് അവതരിപ്പിച്ചിരിക്കുന്നത്:
- ഉന്തുവണ്ടി (കാർട്ട് സ്റ്റാള്): 4.5 ലക്ഷം മുതല് 6 ലക്ഷം രൂപ വരെ
- ചെറിയ സ്റ്റോർ: 20 ലക്ഷം മുതല് 22 ലക്ഷം രൂപ വരെ
- ഫ്ലാഗ്ഷിപ്പ് കഫേ: 39 ലക്ഷം മുതല് 43 ലക്ഷം രൂപ വരെ
ഇന്ത്യയിലെ ആദ്യത്തെ വൈറല് സ്ട്രീറ്റ് ബ്രാൻഡ് ഇതാണ്. ഇപ്പോള് ഇത് ഒരു ബിസിനസ് അവസരമാണ്. കാർട്ടുകള് മുതല് ഫ്ലാഗ്ഷിപ്പ് കഫേകള് വരെ, ഞങ്ങള് രാജ്യവ്യാപകമായി വ്യാപിക്കുകയാണ്. യഥാർത്ഥ അഭിനിവേശമുള്ളവരെ ഞങ്ങള് തേടുന്നു. വലിയ, ദേശി, ഐതിഹാസികമായ എന്തെങ്കിലും നിർമ്മിക്കാൻ ആഗ്രഹിക്കുന്നവർക്ക് ഇതാണ് നിന്റെ നിമിഷം. പരിമിതമായ നഗരങ്ങള്, പരിധിയില്ലാത്ത ചായ. അപേക്ഷകള് ഇപ്പോള് തുറന്നിരിക്കുന്നു. സോഷ്യല് മീഡിയയിലൂടെയാണ് പദ്ധതികള് വിവരിച്ച് പ്രഖ്യാപനം നടത്തിയത്. പദ്ധതിയുടെ ഭാഗമായി, അപേക്ഷാ ഫോമിലേക്കുള്ള ലിങ്ക് ഇൻസ്റ്റാഗ്രാം സ്റ്റോറീസ് വഴി പങ്കുവെച്ചിട്ടുണ്ട്.
സോഷ്യല് മീഡിയയില് വൻ പ്രതികരണം: പ്രഖ്യാപനം വൈറലായതോടെ സോഷ്യല് മീഡിയയില് വൻ ചർച്ചകള്ക്ക് തുടക്കമായി. ഒരു വിഭാഗം ഡോളിയെ അഭിനന്ദിച്ചപ്പോള്, മറ്റുചിലർ ബിസിനസ്സ് ലോകത്തേക്കുള്ള വൈറല് താരങ്ങളുടെ കടന്നുവരവിനെ വിമർശിച്ചു. “ഇന്ത്യയില് വിദ്യാഭ്യാസം ഒരു തട്ടിപ്പാണ്,” ഒരു ഉപയോക്താവ് കുറിച്ചു.എന്നാല്, ഫ്രാഞ്ചൈസി എടുക്കരുത്, ചോരക്കണ്ണീർ വാർക്കും. ഇവർ പണം സമ്ബാദിച്ച് ദുബായിലേക്ക് പോകും, നിന്നെ ബാങ്ക് ലേലത്തില് കുടുക്കും, എന്ന് മുന്നറിയിപ്പ് നല്കിയവരും ഉണ്ടായിരുന്നു.
ആരാണ് ഡോളി? നാഗ്പൂരില് ജനിച്ച സുനില് പാട്ടീല് എന്ന ഡോളിചായ് വാല ചെറുപ്പം മുതല് കുടുംബത്തിന്റെ ചായക്കടയില് സഹായിച്ചിരുന്നു. തന്റെ വിചിത്രമായ ചായ വിളമ്ബുന്ന ശൈലിയും ഫാഷൻ ബോധവും കൊണ്ട് സോഷ്യല് മീഡിയയില് വൻ ജനപ്രീതി നേടി. 2024-ല് ബില് ഗേറ്റ്സുമായുള്ള കൂടിക്കാഴ്ചയോടെ അദ്ദേഹം ഒറ്റ രാത്രികൊണ്ട് ഇന്റർനെറ്റ് സെൻസേഷനായി മാറി. ഇപ്പോള്, ഫ്രാഞ്ചൈസി മോഡലിലൂടെ തന്റെ ബ്രാൻഡിനെ ഇന്ത്യയിലുടനീളം വ്യാപിപ്പിക്കാനുള്ള ഒരുക്കത്തിലാണ് ഡോളി.
