മണിപ്പൂരില് രാഷ്ട്രപതി ഭരണം ഏര്പ്പെടുത്തി. മുഖ്യമന്ത്രിയായിരുന്ന ബിരേന് സിങ് രാജിവെച്ചതിനെ തുടര്ന്നാണ് ഇപ്പോഴത്തെ നടപടി.പുതിയ മുഖ്യമന്ത്രിയെ തിരഞ്ഞെടുക്കാന് ബിജെപി കേന്ദ്ര നേതൃത്വം പരമാവധി ശ്രമിച്ചിരുന്നുവെങ്കിലും ഒരു പേരിലേക്ക് എത്താന് സാധിച്ചിരുന്നില്ല. ഇതിനെ തുടര്ന്നാണ് രാഷ്ട്രപതി ഭരണം ഏര്പ്പെടുത്തിയിരിക്കുന്നത്.
മണിപ്പൂർ കലാപത്തിൻ്റെ പശ്ചാത്തലത്തില് സഭയില് കോണ്ഗ്രസ് അവിശ്വാസപ്രമേയം സമർപ്പിക്കാനിരിക്കെയായിരുന്നു ബിരേന് സിങിന്റെ രാജി. രാജി കലാപം തുടങ്ങി രണ്ട് വർഷത്തിന് ശേഷമാണ് രാജി. രാജിക്കത്ത് ഗവർണർ അജയ് ഭല്ലയ്ക്ക് കൈമാറി. കേന്ദ്ര ആഭ്യന്തര മന്ത്രി അമിത് ഷായുമായുള്ള കൂടിക്കാഴ്ചയ്ക്ക് പിന്നാലെയാണ് രാജി പ്രഖ്യാപനം നടത്തിയത്.
നേരത്തേ കോണ്റാഡ്സിങ്മയുടെ നാഷണല് പീപ്പിള്സ് പാർട്ടി (എൻപിപി) ബിരേൻ സിങ് സർക്കാരിനുള്ള പിന്തുണപിൻവലിച്ചിരുന്നു. കലാപം നടക്കുന്ന സംസ്ഥാനത്തെ ക്രമസമാധാനം പൂർവസ്ഥിതിയിലാക്കുന്നതില് സംസ്ഥാന സർക്കാർ പരാജയപ്പെട്ടുവെന്ന് ചൂണ്ടിക്കാട്ടിയായിരുന്നു നടപടി.
എന്നാല്, എൻപിപിയുടെ പിന്തുണ പിൻവലിച്ചത് സർക്കാരിനെ ബാധിക്കുമായിരുന്നില്ല. ഏഴ് എംഎല്മാരാണ് എൻപിപിക്കുള്ളത്. 37 ബിജെപി എംഎല്എമാരുടെ പിന്തുണയും നാഗാ പീപ്പിള്സ് ഫ്രണ്ടിൻ്റെ (എൻപിഎഫ്) അഞ്ച് എംഎല്എമാരും മൂന്ന് സ്വതന്ത്രരുടെ പിന്തുണയും ബിരേൻ സിങ് സർക്കാരിനുണ്ടായിരുന്നു. എന്നാല് 12 ഓളം എം.എല്.എമാർ നേതൃമാറ്റത്തിനായി മുന്നോട്ടുവന്നത് സർക്കാരിനെ സംബന്ധിച്ച് നിർണായകമായിരുന്നു. സ്പീക്കറും മുഖ്യമന്ത്രിയും തമ്മില് ഭിന്നതയുണ്ടെന്നും റിപ്പോർട്ടുകളുണ്ടായിരുന്നു.
വിശ്വാസവോട്ടെടുപ്പിൻ്റെ സാഹചര്യത്തില് ഈ എംഎല്എമാർ പാർട്ടിക്കെതിരായ നിലപാട് സ്വീകരിച്ചാല് സർക്കാർ പ്രതിസന്ധിയിലാകുമായിരുന്നു. ഡല്ഹി തിരഞ്ഞെടുപ്പ് വിജയത്തില് പാര്ട്ടി തിളങ്ങി നില്ക്കവേ മണിപ്പൂരില് അവിശ്വാസ പ്രമേയം പാസായാല് അത് തിരിച്ചടിയാവുമെന്ന് കണ്ടാണ് ബിജെപി കേന്ദ്ര നേതൃത്വത്തിന്റെ പൊടുന്നനേയുള്ള തീരുമാനം.
