കുർബാന അർപ്പണത്തിനിടെ മുതിർന്ന വൈദികനെ മർദ്ദിച്ചത് കേരള കോൺഗ്രസ് നേതാവ്: അൾത്താരയിൽ അഴിഞ്ഞാടിയ ബാബു ജോസഫ് കെഎം മാണിയുടെ മുൻ ഗൺമാനും കേരള കോൺഗ്രസ് പാർട്ടിയുടെ വൈക്കം നിയോജക മണ്ഡലം സെക്രട്ടറിയും: വിശ്വസ്തന്റെ അഴിഞ്ഞാട്ടം ജോസ് കെ മാണിക്ക് വിനയാകുമോ? വീഡിയോ

കെഎം മാണിയുടെ ഗൺമാൻ, ജോസ് കെ മാണി പാർട്ടി ചെയർമാൻ ആയപ്പോൾ വൈക്കം നിയോജകമണ്ഡലത്തിൽ സുപ്രധാന പാർട്ടി പദവി

ബാബു ജോസഫ് ദീർഘകാലം കെഎം മാണിയുടെ ഗൺമാനായിരുന്നു. ഈ കാലഘട്ടത്തിൽ തന്നെ ജോസ് കെ മാണിയുമായി ഇദ്ദേഹത്തിന് അടുത്ത ബന്ധം ഉണ്ടായിരുന്നു. അതുകൊണ്ടുതന്നെ ആവണം സർവീസിൽ നിന്ന് വിരമിച്ച ബാബു ജോസഫിന് ജോസ് കെ മാണി പാർട്ടിയിൽ നിർണായക പദവി നൽകിയതും. ഇയാൾ കേരള കോൺഗ്രസ് വൈക്കം നിയോജക മണ്ഡലം ജനറൽ സെക്രട്ടറിയാണ്.

സഭയ്ക്ക് അതൃപ്തി

കേരള കോൺഗ്രസ് നേതാവ് അൾത്താരയിൽ കാട്ടിയ അതിക്രമത്തിൽ കത്തോലിക്കാ സഭയ്ക്ക് കടുത്ത അതൃപ്തിയുണ്ട്. ബാബു ജോസഫിന്റെ അഴിഞ്ഞാട്ടം അതുകൊണ്ടുതന്നെ പാർട്ടിക്ക് വലിയ തിരിച്ചടിയാവുകയാണ്. കുർബാന അർപ്പണത്തെ ചൊല്ലി നിലനിൽക്കുന്ന തർക്കത്തിൽ പാലാ ചങ്ങനാശ്ശേരി കാഞ്ഞിരപ്പള്ളി രൂപതകളാണ് ഔദ്യോഗിക വിഭാഗത്തിൽ ഏറ്റവും ശക്തമായ നിലപാടുകൾ സ്വീകരിക്കുന്നത്. അതുകൊണ്ടുതന്നെ ഈ രൂപതകളുടെ നിലപാടിനെ തള്ളുകയും, ഏകീകൃത കുർബാന അർപ്പിക്കാൻ എത്തിയ വൈദികനെ മർദ്ദിക്കുകയും ചെയ്ത കേരള കോൺഗ്രസ് നേതാവിന്റെ നിലപാട് സഭയോടുള്ള വെല്ലുവിളിയായിട്ടാണ് നേതൃത്വം വിലയിരുത്തുന്നത്. സഭയുടെ അനിഷ്ടം കേരള കോൺഗ്രസ് മാണി വിഭാഗത്തിന് തങ്ങളുടെ ശക്തി കേന്ദ്രങ്ങളായ പാലായിലും കടുത്തുരുത്തിയിലും പൂഞ്ഞാറിലും കാഞ്ഞിരപ്പള്ളിയിലും പാർട്ടിക്ക് വലിയ തിരിച്ചടി ഉണ്ടാക്കും എന്ന കാര്യത്തിൽ തർക്കമില്ല.