മുംബൈ:മഹാരാഷ്ട്രയിലെ തദ്ദേശ തെരഞ്ഞെടുപ്പുമായി ബന്ധപ്പെട്ട് പ്രതിപക്ഷ മഹാ വികാസ് അഘാഡി (എംവിഎ) സഖ്യം തമ്മിലുള്ള അഭിപ്രായ വ്യത്യാസങ്ങൾക്കിടയിൽ, ശിവസേന (യുബിടി) നേതാവ് ഉദ്ധവ് താക്കറെ എൻസിപി (എസ്പി) തലവൻ ശരദ് പവാറിനെ മുംബൈയിലെ വസതിയായ സിൽവർ ഓക്കിൽ സന്ദർശിച്ചു. തെരഞ്ഞെടുപ്പിൽ സ്വതന്ത്രമായി മത്സരിക്കുമെന്ന ശിവസേനയുടെ (യുബിടി) പ്രഖ്യാപനത്തെത്തുടർന്ന് ഈ യോഗം രാഷ്ട്രീയ വൃത്തങ്ങളിൽ ശ്രദ്ധ പിടിച്ചുപറ്റി.
വരാനിരിക്കുന്ന ബിഎംസി തിരഞ്ഞെടുപ്പിൽ 227ൽ 50 സീറ്റുകളിലും മത്സരിക്കുമെന്ന ശരദ് പവാറിൻ്റെ നേതൃത്വത്തിലുള്ള എൻസിപിയുടെ പ്രഖ്യാപനം യോഗത്തിൻ്റെ ശ്രദ്ധാകേന്ദ്രമായി. എംവിഎയും ഇന്ത്യ സഖ്യവും ലോക്സഭാ, സംസ്ഥാന നിയമസഭാ തിരഞ്ഞെടുപ്പുകൾക്കായാണ് രൂപീകരിച്ചതെന്നും തദ്ദേശ തിരഞ്ഞെടുപ്പുമായി ബന്ധപ്പെട്ട് കരാറുകളൊന്നും ഉണ്ടായിട്ടില്ലെന്നും ശരദ് പവാർ അടുത്തിടെ നടത്തിയ പത്രസമ്മേളനത്തിൽ വ്യക്തമാക്കി. എന്നിരുന്നാലും, വരാനിരിക്കുന്ന തദ്ദേശ തെരഞ്ഞെടുപ്പിൽ സംയുക്ത സമീപനത്തിന് അന്തിമരൂപം നൽകാൻ മൂന്ന് പാർട്ടികളും തമ്മിൽ ഉടൻ ചർച്ചകൾ നടക്കുമെന്ന് അദ്ദേഹം ഉറപ്പുനൽകി.
