സൂപ്പര് ലീഗ് കേരള ഫുട്ബോള് മത്സരത്തിന്റെ സമ്മാനദാന ചടങ്ങിനിടെ ‘ബേസിലിന്റെ കൈകൊടുക്കല്’ വലിയ രീതിയില് സോഷ്യല് മീഡിയയില് ചർച്ചയായിരുന്നു.ഫോഴ്സ കൊച്ചിയുടെ ഉടമസ്ഥനായ പൃഥ്വിരാജ് സുകുമാരനും, കാലിക്കറ്റ് എഫ്സിയുടെ ബ്രാൻഡ് അംബാസിഡർ ആയ ബേസില് ജോസഫും ഫൈനല് കാണാന് എത്തിയപ്പോഴായിരുന്നു സംഭവം.
സമ്മാനദാന ചടങ്ങിനിടെ, ബേസില് ഒരു കളിക്കാരന് നേരെ കൈ നീട്ടി. എന്നാല് ആ പ്ലെയർ അതുകാണാതെ പൃഥ്വിരാജിനു കൈകൊടുക്കുകയായിരുന്നു. ഇതോടെ ബേസില് ചമ്മി കൈ താഴ്ത്തി. മുൻപ് സമാനമായ അനുഭവം ടൊവിനോയ്ക്ക് ഉണ്ടായപ്പോള്, ടൊവിനോയെ കളിയാക്കി ബേസില് ചിരിച്ചതിനു കിട്ടിയ പണിയാണിത് എന്നായിരുന്നു ട്രോളന്മാരുടെ കണ്ടെത്തല്. എന്തായാലും സംഭവം ട്രോള് പേജുകളില് നിറഞ്ഞു.
പിന്നാലെ സമാനമായൊരു ചമ്മല് സുരാജ് വെഞ്ഞാറമൂടിനും ഉണ്ടായി. ഒരു വേദിയില് സുരാജ് വെഞ്ഞാറമൂടിന് കൈകൊടുക്കാതെ പോയ ഗ്രേസ് ആന്റണിയുടെ വീഡിയോ ആണ് വൈറലായത്. വീഡിയോ വൈറലായതോടെ, “ഞാന് മാത്രമല്ല ടൊവിയുമുണ്ട്,” എന്ന കമന്റുമായി സുരാജ് എത്തി. ‘ബേസില് സംഭവത്തിനു ശേഷം ഞാൻ ആർക്കും കൈ കൊടുക്കാറേ ഇല്ല!’എന്നായിരുന്നു ടൊവിനോയുടെമറുപടി.
ഇപ്പോഴിതാ, ആ ക്ലബ്ബിലേക്ക് രമ്യ നമ്ബീശനും എത്തിയിരിക്കുകയാണ്. ഭാവനയും രമ്യ നമ്ബീശനും പങ്കെടുത്ത ഒരു പരിപാടിയില് നിന്നുള്ള വീഡിയോ ആണ് വൈറലാവുന്നത്. കൈ കൊടുക്കാൻ ശ്രമിക്കുന്ന രമ്യയെ കാണാതെ പോവുന്ന ഒരു ക്രിക്കറ്റ് പ്ലെയറെ ആണ് വീഡിയോയില് കാണാനാവുക.
