ഐപിഎല് താരലേലത്തില് കൗമാര താരം വൈഭവ് സൂര്യവന്ശിയെ സ്വന്തമാക്കി രാജസ്ഥാന് റോയല്സ്. 30 ലക്ഷം രൂപ അടിസ്ഥാന വിലയുണ്ടായിരുന്ന വൈഭവിനെ ഡല്ഹി ക്യാപിറ്റല്സുമായുള്ള വാശിയേറിയ ലേലം വിളിക്കൊടുവില് 1.10 കോടി നല്കിയാണ് രാജസ്ഥാന് റോയല്സ് ടീമിലെത്തിച്ചത്.
ഐപിഎല് ടീമിലെത്തുന്ന ഏറ്റവും പ്രായം കുറഞ്ഞ താരവും ഏറ്റവും പ്രായം കുറഞ്ഞ കോടിപതിയുമാണ് വൈഭവ് സൂര്യവൻശി. രാജസ്ഥാനും ഡല്ഹിയും മാത്രമാണ് വൈഭവിനായി രംഗത്തെത്തിയ രണ്ട് ടീമുകള്.
2011 മാര്ച്ച് 27ന് ജനിച്ച വൈഭവ് ഈ വര്ഷം ജനുവരിയില് തന്റെ 12-ാം വയസില് ബിഹാറിനായി ഫസ്റ്റ് ക്ലാസ് ക്രിക്കറ്റില് അരങ്ങേറിയിരുന്നു. ഫസ്റ്റ് ക്ലാസ് ക്രിക്കറ്റില് 1986നുശേഷം കളിക്കുന്ന ഏറ്റവും പ്രായം കുറഞ്ഞ താരമെന്ന റെക്കോര്ഡും ഇതോടെ വൈഭവ് സ്വന്തമാക്കിയിരുന്നു. ഇപ്പോള് ഐപിഎല്ലിലെ ഏറ്റവും പ്രായം കുറഞ്ഞ താരമെന്ന റെക്കോര്ഡും വൈഭവിന്റെ പേരിലായി. ഇടം കൈയന് ബാറ്ററാണ് വൈഭവ്.
സെപ്റ്റംബറില് ഓസ്ട്രേലിയക്കെതിരായ അണ്ടര് 19 യൂത്ത് ടെസ്റ്റില് ഇന്ത്യക്കായി കളിച്ച വൈഭവ് 62 പന്തില് 104 റണ്സടിച്ചതോടെയാണ് ശ്രദ്ധേയനായത്. ഇതോടെ വരാനിരിക്കുന്ന അണ്ടര് 19 ഏഷ്യാ കപ്പിനുള്ള ഇന്ത്യൻ ടീമിലും വൈഭവിന് ഇടം ലഭിച്ചു. ഇതുവരെ കളിച്ച അഞ്ച് ഫസ്റ്റ് ക്ലാസ് മത്സരങ്ങളില് നിന്ന് 100 റണ്സാണ് വൈഭവ് നേടിയത്. 41 റണ്സാണ് ഉയര്ന്ന സ്കോര്. രഞ്ജി ട്രോഫിയില് നിലവില് ബിഹാറിന്റെ താരമാണ് വൈഭവ്. നേരത്തെ അഫ്ഗാിസ്ഥാന്റെ മിസ്റ്ററി സ്പിന്നറായ 18കാരന് അള്ളാ ഗസൻഫറിനെ മുംബൈ ഇന്ത്യൻസ് 4.8 കോടിക്ക് ടീമിലെടുത്ത് ഞെട്ടിച്ചിരുന്നു.
