സംസ്ഥാനത്തെ താമസക്കാർക്കായി ജന്മദേശം തെളിയിക്കുന്ന ആധികാരിക രേഖയായി നേറ്റിവിറ്റി സർട്ടിഫിക്കറ്റിനെ മാറ്റാൻ സർക്കാർ നീക്കം.’താന് ഈ നാട്ടില് ജനിച്ചു ജീവിക്കുന്നയാളാണെന്നോ, സ്ഥിരതാമസക്കാരനാണെന്നോ ആരൂടെ മുന്നിലും അനായാസം തെളിയിക്കാന് പ്രാപ്ത’മാക്കുന്ന രേഖ സൃഷ്ടിക്കുമെന്നാണ് മുഖ്യമന്ത്രി വാർത്താ സമ്മേളനത്തില് അറിയിച്ചത്.
“ഒരാളും പുറന്തള്ളപ്പെടുന്ന അവസ്ഥ വരരുത്. അതിനായി ആധികാരികവും നിയമ പിന്ബലമുള്ളതുമായ രേഖ ആ വ്യക്തിയുടെ കൈവശമുണ്ടാകണം. അത്തരമൊരു രേഖ കേരളത്തില് ആവിഷ്കരിക്കാന് സര്ക്കാര് ഉദ്ദേശിക്കുന്നു,” മുഖ്യമന്ത്രി പറഞ്ഞു.
സംസ്ഥാനത്ത് ഇപ്പോള് നല്കി വരുന്ന നേറ്റിവിറ്റി സര്ട്ടിഫിക്കറ്റിന് പകരം ഫോട്ടോ പതിപ്പിച്ച സ്ഥിരം നേറ്റിവിറ്റി കാര്ഡ് നല്കാനാണ് ശ്രമം. ഈ തീരുമാനം മന്ത്രിസഭായോഗം തത്വത്തില് അംഗീകരിച്ചതായി മുഖ്യമന്ത്രി പറഞ്ഞു. നേറ്റിവിറ്റി സര്ട്ടിഫിക്കറ്റിന് പകരമായി എക്കാലത്തും ഉപയോഗിക്കാവുന്നതായിരിക്കും ഈ കാർഡ്. സംസ്ഥാന സര്ക്കാരുമായി ബന്ധപ്പെട്ട സേവനങ്ങള്ക്കും മറ്റ് സാമൂഹ്യ ആവശ്യങ്ങള്ക്കും ഈ കാർഡ് ഉപയോഗപ്പെടത്താനാകും. നിയമ പിന്ബലത്തോടുകൂടിയ ആധികാരിക രേഖ ആയാണ് കാര്ഡ് നല്കുകയെന്നും മുഖ്യമന്ത്രി വ്യക്തമാക്കി.
നിലവില് നേറ്റിവിറ്റി സർട്ടിഫിക്കറ്റ് നിയമ പ്രാബല്യമുള്ള രേഖയല്ലെന്ന് മുഖ്യമന്ത്രി ചൂണ്ടിക്കാട്ടി. ഓരോ ആവശ്യങ്ങളുമായി ബന്ധപ്പെട്ട് പല പ്രാവശ്യം നേറ്റിവിറ്റി സര്ട്ടിഫിക്കറ്റ് വാങ്ങേണ്ടിവരുന്ന സ്ഥിതിയുണ്ട്. ഈ വിഷയം പരാതിയായിത്തന്നെ സര്ക്കാരിനു മുന്നിലുണ്ടെന്ന് അദ്ദേഹം പറഞ്ഞു. ജനങ്ങളുടെ നിരന്തരമായ അഭ്യര്ത്ഥനയും ഇക്കാര്യത്തില് വന്നിട്ടുണ്ട്. കാര്ഡ് വരുന്നതോടെ ഈ പ്രശ്നങ്ങള്ക്ക് പരിഹാരമാകും. നേറ്റിവിറ്റി കാര്ഡിന് നിയമ പ്രാബല്യം നല്കുന്നതിനുള്ള നിയമത്തിന്റെ കരട് നിയമ വകുപ്പുമായി കൂടിയാലോചിച്ച് മന്ത്രിസഭയുടെ പരിഗണനയ്ക്ക് സമര്പ്പിക്കുവാന് റവന്യു വകുപ്പിനെ ചുമലതലപ്പെടുത്തിയതായി മുഖ്യമന്ത്രി പറഞ്ഞു.
ഒരു സംസ്ഥാനത്ത് വ്യക്തിയുടെ ജനനവും ദീര്ഘകാല താമസവും തെളിയിക്കുന്ന രേഖയായ നേറ്റിവിറ്റി സര്ട്ടിഫിക്കറ്റ് ഇപ്പോഴത്തെ താല്ക്കാലിക രേഖ എന്ന സ്ഥിതിയില് നിന്ന് സ്ഥിരം രേഖ എന്ന സ്ഥിതിയിലേക്ക് മാറും. സര്ക്കാര് സേവനങ്ങള്ക്ക് ഗുണഭോക്തൃ തിരിച്ചറിയല് രേഖയായി കാര്ഡിനെ ഉപയോഗപ്പെടുത്താനാകും. തഹസില്ദാര്മാര്ക്കായിരിക്കും കാര്ഡിന്റെ വിതരണച്ചുമതല.
