ചൈനയിലെ സിചുവാൻ പ്രവിശ്യയിലെ നാമ പർവതത്തില് നിന്ന് (5,588 മീറ്റർ) ഫോട്ടോയെടുക്കാൻ സുരക്ഷാ കയർ അഴിച്ചുമാറ്റിയതിനെ തുടർന്ന് 31 വയസ്സുള്ള ഒരു ഹൈക്കർ വീണു മരിച്ചു. സെപ്റ്റംബർ 25-നാണ് സംഭവം നടന്നത്. ഹോങ് എന്നറിയപ്പെടുന്ന ഇയാള് സുരക്ഷാ കയർ അഴിച്ചുമാറ്റിയ ശേഷമാണ് അപകടത്തില്പ്പെട്ടതെന്ന് ദൃക്സാക്ഷികള് പറയുന്നു.പർവതത്തിന്റെ ഉച്ചകോടിക്കടുത്ത് (summit) ഒരു വിള്ളലിന്റെ (crevasse) അടുത്തേക്ക് ചിത്രമെടുക്കാനായാണ് ഇയാള് മാറിയത്. ഈ സമയം ഇയാള് സുരക്ഷാ കയർ നീക്കം ചെയ്യുകയും ഐസ് ആക്സ് (ice axe) ഉപയോഗിക്കാതിരിക്കുകയും ചെയ്തിരുന്നു.
മഞ്ഞുമൂടിയ ചരിവില് കാല് വഴുതി നിയന്ത്രണം വിട്ട ഹോങ് ഏകദേശം 200 മീറ്ററോളം തെന്നി താഴേയ്ക്ക് വീഴുകയായിരുന്നു. ചൈനീസ് സോഷ്യല് മീഡിയയില് പ്രചരിക്കുന്ന വീഡിയോകളില് അദ്ദേഹം മലഞ്ചെരുവില് നിന്ന് വഴുതി അപ്രത്യക്ഷനായതിന്റെ ഭയാനകമായ നിമിഷം കാണിക്കുന്നു. രക്ഷാപ്രവർത്തകർ സ്ഥലത്തെത്തിയെങ്കിലും ഹോങ്ങിനെ അവിടെ എത്തിച്ചപ്പോഴേക്കും മരിച്ചിരുന്നുവെന്ന് സ്ഥിരീകരിച്ചു. അദ്ദേഹത്തിന്റെ മൃതദേഹം പിന്നീട് അടുത്തുള്ള ഗോംഗ മൗണ്ടൻ ടൗണിലേക്ക് കൊണ്ടുപോയി.
മലകയറാനുള്ള ഹോങ്ങിന്റെ ആദ്യ ശ്രമമാണിതെന്ന് അദ്ദേഹത്തിന്റെ കസിൻ പ്രാദേശിക മാധ്യമങ്ങളോട് പറഞ്ഞു. ഫോട്ടോയെടുക്കാൻ മറ്റുള്ളവരെ സഹായിക്കുന്നതിനായി ഹോങ് സുരക്ഷാ കയർ അഴിച്ചുമാറ്റിയതാകാം എന്നും അതിനുശേഷം സ്വന്തം ക്രാംപോണുകളില് (crampons-മഞ്ഞില് നടക്കാൻ ബൂട്ടില് ഘടിപ്പിക്കുന്ന ലോഹ സ്പൈക്കുകള്) തട്ടി വീഴാൻ സാധ്യതയുണ്ടെന്നും ഹോങ്ങിന്റെ ബന്ധുക്കള് പ്രാദേശിക മാധ്യമങ്ങളോട് പറഞ്ഞു.ഓണ്ലൈനില് പ്രചരിക്കുന്ന അവകാശവാദങ്ങള്ക്ക് വിരുദ്ധമായി, ഹോങ് ഒരു പ്രൊഫഷണല് പർവത ഗൈഡ് ആയിരുന്നില്ലെന്ന് സിചുവാൻ പർവതാരോഹണ അസോസിയേഷൻ വ്യക്തമാക്കി. അദ്ദേഹത്തിന് ഒരു ക്ലൈംബിംഗ് അസിസ്റ്റന്റ് സർട്ടിഫിക്കറ്റ് മാത്രമേ ഉണ്ടായിരുന്നുള്ളൂ, ഇടയ്ക്ക് മലകയറ്റ യാത്രകള്ക്ക് നേതൃത്വം നല്കിയിട്ടുണ്ടെന്നും സിചുവാൻ മൗണ്ടനീയറിംഗ് അസോസിയേഷൻ വ്യക്തമാക്കി.
ഹോങ്ങിന്റെ സംഘം ആവശ്യമായ ക്ലൈംബിംഗ് പെർമിറ്റുകള് വാങ്ങിയിട്ടില്ലെന്നും അധികാരികളെ അവരുടെ യാത്രയെക്കുറിച്ച് അറിയിച്ചിട്ടില്ലെന്നും പ്രാദേശിക ഉദ്യോഗസ്ഥർ അറിയിച്ചു. ഈ സംഘം അടിസ്ഥാന സുരക്ഷാ നിയമങ്ങള് ലംഘിച്ചതായി കാങ്ഡിംഗ് മുനിസിപ്പല് എജ്യുക്കേഷൻ ആൻഡ് സ്പോർട്സ് ബ്യൂറോ പറഞ്ഞു. “ക്രാംപോണുകള് നീക്കം ചെയ്യുകയും കയർ അഴിക്കുകയും ചെയ്തിരുന്നില്ലെങ്കില് ഒരുപക്ഷേ ഇത് സംഭവിക്കില്ലായിരുന്നു” എന്ന് ഒരു ഉദ്യോഗസ്ഥൻ അഭിപ്രായപ്പെട്ടതായി ദി സണ് റിപ്പോർട്ട് ചെയ്യുന്നു
