മലപ്പുറം ചുങ്കത്തറ പഞ്ചായത്തില് എല്ഡിഎഫിന് ഭരണം നഷ്ടമായി. യുഡിഎഫിൻ്റെ അവിശ്വാസ പ്രമേയം പാസായി. ഒമ്ബതിനെതിരെ പതിനൊന്ന് വോട്ടുകള്ക്കാണ് പ്രസിഡൻ്റിനെതിരായ അവിശ്വാസ പ്രമേയം പാസായത്.അവിശ്വാസ പ്രമേയത്തില് എല്ഡിഎഫ് അംഗവും പഞ്ചായത്ത് വൈസ് പ്രസിഡന്റുമായ നുസൈബ സുധീർ യുഡിഎഫിനെ പിന്തുണച്ചതോടെയാണ് എല്ഡിഎഫിന് ഭരണം നഷ്ടമായത്.
കഴിഞ്ഞ ദിവസം നുസൈബ സുധീറിനെ കാണാനില്ലെന്ന് പരാതിയുമായി സിപിഐഎം രംഗത്തെത്തിയിരുന്നു. യുഡിഎഫിൻ്റെ അവിശ്വാസ പ്രമേയത്തിന് അനുകൂലമായി നുസൈബ നില്ക്കുമെന്ന് അഭ്യൂഹങ്ങളുയർന്നിരുന്നു. തൃണമൂല് കോണ്ഗ്രസ് മണ്ഡലം ചെയർമാൻ സുധീർ പുന്നപ്പാലയുടെ ഭാര്യയാണ് നുസൈബ.
പിവി അൻവറിൻ്റെ ഇടപെടലോടെയായിരുന്നു നുസൈബ യുഡിഎഫിന് അനുകൂലമായ നിലപാട് സ്വീകരിച്ചത്. ചുങ്കത്തറ പഞ്ചായത്തില് നിലവില് ഇരുമുന്നണികള്ക്കും പത്ത് വീതം അംഗങ്ങളാണുള്ളത്. അതിനാല് തന്നെ നുസൈബയുടെ നിലപാടാണ് യുഡിഎഫിൻ്റെ അവിശ്വാസം പാസാകുന്നതില് നിർണായകമായത്.
