2026 പുതുവർഷത്തിലെ ആദ്യ അതി തീവ്രന്യൂനമർദം രൂപപ്പെടുന്നു. തെക്കുകിഴക്കൻ ബംഗാള് ഉള്ക്കടലിനും അതിനോട് ചേർന്ന കിഴക്കൻ ഭൂമധ്യരേഖക്ക് സമീപമുള്ള ഇന്ത്യൻ മഹാസമുദ്രത്തിനും മുകളിലായിസ്ഥിതി ചെയ്തിരുന്ന ശക്തി കൂടിയ ന്യൂനമർദം ( തീവ്ര ന്യൂനമർദമായി (Depression) ശക്തി പ്രാപിച്ചതായി കേന്ദ്ര കാലാവസ്ഥാ വകുപ്പ് അറിയിച്ചു.
തുടർന്നുള്ള 24 മണിക്കൂറില് ഇത് കൂടുതല് ശക്തിപ്പെട്ട് അതി തീവ്രന്യൂനമർദമായി (Deep Depression) മാറാൻ സാധ്യതയുണ്ട്. അടുത്ത 48 മണിക്കൂറിനിടെ ഇത് പടിഞ്ഞാറ് – വടക്കുപടിഞ്ഞാറ് ദിശയില് നീങ്ങി തെക്കുപടിഞ്ഞാറൻ ബംഗാള് ഉള്ക്കടലിലേക്കു സഞ്ചരിക്കാൻ സാധ്യതയെന്ന് കേന്ദ്ര കാലാവസ്ഥ വകുപ്പ് അറിയിച്ചു.
അതി തീവ്രന്യൂനമർദത്തിൻ്റെ ആശങ്ക തുടരുന്നതിനിടെ കേരളത്തില് വരും ദിവസങ്ങളില് മഴയ്ക്കുള്ള സാധ്യത തുടരുകയാണ്. ജനുവരി 9, 10, 11 തീയതികളില് നേരിയ – ഇടത്തരം മഴയ്ക്ക് സാധ്യത. ജനുവരി 10ന് ഒറ്റപ്പെട്ട ശക്തമായ മഴക്കും സാധ്യതയെന്ന് കേന്ദ്ര കാലാവസ്ഥ വകുപ്പ് അറിയിച്ചു.
സംസ്ഥാനത്ത് അഞ്ച് ദിവസം മഴ സാധ്യത തുടരുന്നതിനിനാല് പത്തനംതിട്ട, ഇടുക്കി ജില്ലകളില് ശനിയാഴ്ച (10/01/2026) യെല്ലോ അലേർട്ടാണ് പ്രഖ്യാപിച്ചിരിക്കുന്നത്. ഒറ്റപ്പെട്ട ശക്തമായ മഴയ്ക്കുള്ള സാധ്യതയാണ് ഈ ജില്ലകളില് പ്രവചിക്കപ്പെട്ടിരിക്കുന്നത്. 24 മണിക്കൂറില് 64.5 മില്ലിമീറ്റർ മുതല് 115.5 മില്ലിമീറ്റർ വരെ മഴ ലഭിക്കുന്ന സാഹചര്യത്തെയാണ് ശക്തമായ മഴ എന്നത് കൊണ്ട് അർഥമാക്കുന്നത്.
ഇന്ന് (07/01/2026) മുതല് വെള്ളിയാഴ്ച (09/01/2026) വരെ തെക്കുപടിഞ്ഞാറൻ ബംഗാള് ഉള്ക്കടല് അതിനോട് ചേർന്ന തെക്കു കിഴക്കൻ കിഴക്കൻ ബംഗാള് ഉള്ക്കടല്, മധ്യ പടിഞ്ഞാറൻ ബംഗാള് ഉള്ക്കടല് എന്നിവിടങ്ങളില് മണിക്കൂറില് 35 മുതല് 45 കിലോമീറ്റർ വരെയും ചില അവസരങ്ങളില് മണിക്കൂറില് 55 കിലോമീറ്റർ വരെയും വേഗതയില് ശക്തമായ കാറ്റിനും മോശം കാലാവസ്ഥയ്ക്കും സാധ്യതയുണ്ട്. മേല്പ്പറഞ്ഞ തീയതികളില് ഈ പ്രദേശങ്ങളില് മത്സ്യബന്ധനത്തിന് പോകാൻ പാടുള്ളതല്ല.അതേസമയം, സംസ്ഥാനത്ത് പകല് സമയങ്ങളില് തെളിഞ്ഞ കാലാവസ്ഥ തുടരുകയാണ്. എല്ലാ ജില്ലകളിലും സമാനമായ കാലാവസ്ഥയാണ് തുടരുന്നത്. മലയോര ജില്ലകളിലും പ്രദേശങ്ങളിലും ചൂടിന് നേരിയ കുറവുണ്ട്. വൈകീട്ടും രാത്രി സമയങ്ങളിലും മലയോര പ്രദേശങ്ങളില് തണുപ്പുള്ള അന്തരീക്ഷമാണുള്ളത്.
