ലൈംഗികാതിക്രമക്കേസില് മുകേഷിന് മുൻകൂർ ജാമ്യം നല്കിയതിനെതിരെ സർക്കാർ അപ്പീലിനൊരുങ്ങുന്നു. വിഷയത്തില് ഹൈക്കോടതിയില് അപ്പീല് നല്കാമെന്ന് ഡയറക്ടർ ജനറല് ഓഫ് പ്രോസിക്യൂഷന്റെ നിയമോപദേശം പ്രത്യേകാന്വേഷണ സംഘത്തിന് ലഭിച്ചു. കോടതിയുടെ വിധി പരാതിക്കാരിയെ അവിശ്വസിക്കുന്നതാണെന്നും വർഷങ്ങള് പഴക്കമുള്ള കേസാണിതെന്നും ചൂണ്ടിക്കാട്ടിയാണ് അപ്പീല് നല്കുക.
എറണാകുളം സെഷൻസ് കോടതിയാണ് മുകേഷിന് ജാമ്യമനുവദിച്ചത്. ഇത് കേസിന്റെ തുടരന്വേഷണത്തെയും വിചാരണയെയും ബാധിക്കുമെന്നാണ് അപ്പീലില് ചൂണ്ടിക്കാട്ടുക. പരാതിക്കാരിയായ നടിയുടെ മൊഴിയില് വലിയ വൈരുദ്ധ്യങ്ങളുണ്ടെന്ന് കോടതി നിരീക്ഷിച്ചിരുന്നു.
ബലപ്രയോഗത്തിലൂടെയുള്ള ലൈംഗിക പീഡനം എന്ന വാദം കോടതി പൂർണമായും തള്ളിയിരുന്നു.എറണാകുളം സ്വദേശിയായ നടിയുടെ പരാതിയില് എം. മുകേഷ് എം.എല്.എയ്ക്കെതിരെ മരട് പോലീസ് കേസെടുത്തിരുന്നു. ഐ.പി.സി. 354, 509, 452 വകുപ്പുകള് ചുമത്തിയാണ് കേസെടുത്തിരുന്നത്.
