ആഗോള മദ്യവിപണിയില് ശ്രദ്ധനേടി പ്രവാസി മലയാളി ജോണ് സേവ്യറിന്റെ പുതിയ ബ്രാൻഡ് ‘മണവാട്ടി കുട്ടിച്ചാത്തൻ’.96.2 ശതമാനം ആല്ക്കഹോള് അംശമുള്ള ഈ സ്പിരിറ്റ്, നിലവില് ഏറ്റവും ശക്തമായ മദ്യങ്ങളില് ഒന്നായി കണക്കാക്കപ്പെടുന്ന പോളണ്ടിന്റെ ‘സ്പിരൈറ്റസ് റെക്ടിഫിക്കോവാനി’-നെക്കാള് ഉയർന്ന ആല്ക്കഹോള് അളവോടെയാണ് അവതരിപ്പിച്ചിരിക്കുന്നത്.
യുകെ ആസ്ഥാനമായ ലണ്ടൻ ബാരണ് ലിമിറ്റഡ് പുറത്തിറക്കുന്ന ഈ ഉല്പ്പന്നം 50 മില്ലി കുപ്പികളിലാണ് വിപണിയിലെത്തുന്നത്. അതീവ ഉയർന്ന ആല്ക്കഹോള് അളവുള്ളതിനാല് സാധാരണയായി കോക്ടെയില് നിർമാണത്തിനും മറ്റ് പാനീയങ്ങളില് മിശ്രിതമായും ഉപയോഗിക്കാനാണ് ഇത് ലക്ഷ്യമിടുന്നത്.
കൊച്ചിയില് നിന്ന് ലോകവിപണിയിലേക്ക്
കൊച്ചി സ്വദേശിയായ ജോണ് സേവ്യർ, ലണ്ടനില് ഭക്ഷണശാലകളും പരമ്പരാഗത കേരള വിഭവശാലകളും വിജയകരമായി നടത്തിക്കൊണ്ടാണ് മദ്യവ്യവസായത്തിലേക്ക് കടന്നത്. കേരളത്തിന്റെ തനത് അരാക്ക് ശൈലിയെ ‘മണവാട്ടി’ എന്ന ബ്രാൻഡിലൂടെ രാജ്യാന്തര വിപണിയില് എത്തിച്ച അദ്ദേഹം ഇന്ന് ആഗോള സ്പിരിറ്റ് വിപണിയില് ശ്രദ്ധേയ സാന്നിധ്യമാണ്.
പുരസ്കാരങ്ങള് നേടിയ ബ്രാൻഡ്
മണവാട്ടി ബ്രാൻഡിന് ഇതിനകം തന്നെ നിരവധി അന്താരാഷ്ട്ര അംഗീകാരങ്ങള് ലഭിച്ചിട്ടുണ്ട്. ലണ്ടൻ സ്പിരിറ്റ്സ് കോംപറ്റീഷനില് വെങ്കല മെഡല് നേടിയതോടൊപ്പം ഇന്റർനാഷണല് വൈൻ ആൻഡ് സ്പിരിറ്റ് കോംപറ്റിഷൻ 2025-ല് ‘സ്പിരിറ്റ് ബ്രോണ്സ്’ പുരസ്കാരവും സ്വന്തമാക്കി.
വ്യത്യസ്ത വകഭേദങ്ങള്
നിലവില് മണവാട്ടി മൂന്ന് വകഭേദങ്ങളിലാണ് ലഭിക്കുന്നത്.
ഒറിജിനല് മണവാട്ടി- 44% ആല്ക്കഹോള്മണവാട്ടി ഓവർ പ്രൂഫ് – 71% ആല്ക്കഹോള്മണവാട്ടി മാജിക് ബ്ലൂ – 37.5% ആല്ക്കഹോള്
ഇവയ്ക്ക് പിന്നാലെയാണ് 96.2 ശതമാനം ആല്ക്കഹോള് അടങ്ങിയ ‘മണവാട്ടി കുട്ടിച്ചാത്തൻ’ അവതരിപ്പിച്ചിരിക്കുന്നത്.
ആഗോള വിപണിയിലേക്ക് വ്യാപനം
യുകെ, യൂറോപ്പ്, യുഎഇ, ആഫ്രിക്ക, ഓസ്ട്രേലിയ, ന്യൂസീലൻഡ് തുടങ്ങിയ വിപണികളില് ഇതിനകം തന്നെ മണവാട്ടി ബ്രാൻഡിന് സാന്നിധ്യമുണ്ട്. കൊച്ചി ഡ്യൂട്ടി ഫ്രീ ഷോപ്പുകളിലും ഉല്പ്പന്നം ലഭ്യമാണ്. പുതിയ ഉല്പ്പന്നവും ഡ്യൂട്ടി ഫ്രീ ഔട്ട്ലെറ്റുകളിലും മിഡില് ഈസ്റ്റ് ഉള്പ്പെടെയുള്ള വിദേശ വിപണികളിലും ഉടൻ ലഭ്യമാകുമെന്നാണ് കമ്പനി പ്രതീക്ഷിക്കുന്നത്.
കൃത്രിമ നിറങ്ങളോ ഫ്ലേവറുകളോ ചേർക്കാതെ, യുകെയിലെ ഗുണനിലവാര മാനദണ്ഡങ്ങള് പാലിച്ചാണ് പുതിയ സ്പിരിറ്റ് നിർമിക്കുന്നതെന്ന് കമ്പനി അവകാശപ്പെടുന്നു. അതേസമയം, 96.2 ശതമാനം ആല്ക്കഹോള് അടങ്ങിയ ഉല്പ്പന്നമായതിനാല് അതീവ ജാഗ്രതയോടെയും നിർമാതാക്കളുടെ നിർദേശങ്ങള് പാലിച്ചുമാത്രമേ ഉപയോഗിക്കാവൂ എന്നതാണ് വിദഗ്ധരുടെ മുന്നറിയിപ്പ്.
