മൂലക്കുരു അല്ലെങ്കില് പൈല്സ് എന്ന രോഗത്തെക്കുറിച്ച് തുറന്നുപറയാനോ ഡോക്ടറെ കണ്ട് ചികിത്സ തേടാനോ പലർക്കും ഇന്നും കടുത്ത മടിയാണ്.ഇതിനെച്ചൊല്ലിയുള്ള നാണക്കേടും രഹസ്യമായി വെക്കാനുള്ള പ്രവണതയും പലപ്പോഴും കാര്യങ്ങള് കൂടുതല് വഷളാക്കുകയേ ഉള്ളൂ. കൃത്യമായ വൈദ്യോപദേശം തേടുന്നതിന് പകരം, ഭൂരിഭാഗം ആളുകളും വേദന സഹിച്ച് മിണ്ടാതിരിക്കാനോ, വീട്ടുവൈദ്യങ്ങളെ ആശ്രയിക്കാനോ, ഇന്റർനെറ്റില് പരിഹാരം തിരയാനോ അല്ലെങ്കില് സ്വയം മരുന്ന് വാങ്ങി കഴിക്കാനോ ആണ് ശ്രമിക്കാറുള്ളത്.
“പൈല്സ് സ്വയം മാറുമോ?” എന്ന ചോദ്യത്തിന് ‘അതെ’ എന്നോ ‘അല്ല’ എന്നോ ഉള്ള മറുപടി നല്കാൻ കഴിയില്ലെന്ന് മനസിലായി. രോഗത്തിന്റെ തീവ്രതയെയും എത്രയും വേഗം നിങ്ങള് ഇതിന് പരിഹാരം കാണുന്നു എന്നതിനെയും ആശ്രയിച്ചാണ് ഇതിന്റെ മറുപടി ഇരിക്കുന്നത്.
“മലദ്വാരത്തിലെ ഞരമ്പുകളില് ഉണ്ടാകുന്ന അമിതമായ സമ്മർദമാണ് പൈല്സിന് കാരണമാകുന്നത്. വിട്ടുമാറാത്ത മലബന്ധവും മലവിസർജ്ജന സമയത്ത് അമിതമായി മുക്കുന്നതുമാണ് ഇതിലേക്ക് നയിക്കുന്ന പ്രധാന ഘടകങ്ങള്,” മുംബൈ ചെമ്പൂരിലെ സെൻ മള്ട്ടിസ്പെഷ്യാലിറ്റി ഹോസ്പിറ്റല് ഡയറക്ടറും ഗ്യാസ്ട്രോഇന്റസ്റ്റൈനല് ആൻഡ് ലാപ്രോസ്കോപ്പിക് സർജനുമായ ഡോ.റോയ് പതങ്കർ വിശദീകരിച്ചു. നാരുകള് കുറഞ്ഞ ഭക്ഷണക്രമം, ദീർഘനേരം ഒരേയിരുപ്പ് ഇരിക്കുന്നത്, അമിതവണ്ണം, ഗർഭാവസ്ഥ എന്നിവ രോഗാവസ്ഥയെ കൂടുതല് സങ്കീർണമാക്കുമെന്നും അദ്ദേഹം അഭിപ്രായപ്പെട്ടു.
പൈല്സ് സ്വയം മാറുമോ?
തുടക്കത്തിലുള്ളതോ അല്ലെങ്കില് നേരിയ തോതിലുള്ളതോ ആയ പൈല്സ് വലിയ മെഡിക്കല് ചികിത്സകള് ഇല്ലാതെ തന്നെ ഭേദമാകാറുണ്ട്. “നാരുകള് അടങ്ങിയ ഭക്ഷണം കഴിക്കുക, ധാരാളം വെള്ളം കുടിക്കുക, മലവിസർജന സമയത്ത് മുക്കുന്നത് ഒഴിവാക്കുക തുടങ്ങിയ ജീവിതശൈലി മാറ്റങ്ങളിലൂടെ നേരിയ തോതിലുള്ള പൈല്സ് സ്വയം മാറിയേക്കാം,” ഡോ.പതങ്കർ വ്യക്തമാക്കി. എന്നാല് വിട്ടുമാറാത്തതോ കഠിനമായതോ ആയ കേസുകളില് മെഡിക്കല് ചികിത്സ അത്യാവശ്യമാണെന്നും അദ്ദേഹം ഓർമ്മിപ്പിച്ചു.
പഴങ്ങള്, പച്ചക്കറികള്, ധാന്യങ്ങള് എന്നിവയടങ്ങിയ നാരുകളുള്ള ഭക്ഷണക്രമവും ആവശ്യത്തിന് വെള്ളം കുടിക്കുന്നതും മലം മൃദുവാക്കാനും മലവിസർജനം സുഗമമാക്കാനും സഹായിക്കും. ദിവസേനയുള്ള വ്യായാമവും ദീർഘനേരം ഇരിക്കുന്നത് ഒഴിവാക്കുന്നതും രോഗം കൂടാതെ നോക്കാൻ സഹായിക്കും.
പലരും ആശ്വാസത്തിനായി വീട്ടുവൈദ്യങ്ങളെയും ആശ്രയിക്കാറുണ്ട്. “ചെറുചൂടുവെള്ളത്തില് ഇരിക്കുന്നത്, ഐസ് ക്യൂബുകള് കൊണ്ടുള്ള കോംപ്രസ് എന്നിവ താല്ക്കാലികമായി വേദനയും വീക്കവും കുറയ്ക്കാൻ സഹായിക്കും. എങ്കിലും, ഇവ രോഗത്തിന്റെ യഥാർത്ഥ കാരണത്തെ ചികിത്സിക്കുന്നില്ലാത്തതിനാല്, ലക്ഷണങ്ങള് നീണ്ടുനില്ക്കുകയാണെങ്കില് ഡോക്ടറെ കാണേണ്ടത് അനിവാര്യമാണ്,” ഡോ.പതങ്കർ പറഞ്ഞു.
എപ്പോഴാണ് പൈല്സിനെ അവഗണിക്കരുതാത്തത്?
ഭക്ഷണക്രമവും ആരോഗ്യകരമായ ജീവിതശൈലിയും പൈല്സ് ചികിത്സയില് പ്രധാനമാണെങ്കിലും, അവ മാത്രം എപ്പോഴും രോഗം മാറ്റാൻ മതിയാകണമെന്നില്ല. ഭക്ഷണത്തില് മാറ്റങ്ങള് വരുത്തുന്നത് തുടക്കകാലത്ത് ഫലപ്രദമാണെങ്കിലും, രോഗം കൂടിയ അവസ്ഥകളില് ഭക്ഷണമാറ്റത്തോടൊപ്പം കൃത്യമായ മെഡിക്കല് ചികിത്സയും ആവശ്യമായി വരും.
രോഗലക്ഷണങ്ങള് എപ്പോഴാണ് അവഗണിക്കരുതാത്തത് എന്ന് തിരിച്ചറിയേണ്ടത് വളരെ പ്രധാനമാണ്. അസഹനീയമായ വേദന, മലവിസർജന സമയത്ത് നിർത്താതെയുള്ള രക്തസ്രാവം, പുറത്തേക്ക് തള്ളിനില്ക്കുന്നതും ഉള്ളിലേക്ക് പോകാത്തതുമായ മുഴകള് എന്നിവയൊക്കെ പൈല്സ് വഷളാകുന്നതിന്റെ ലക്ഷണങ്ങളാണെന്ന് ഡോ.പതങ്കർ വിശദീകരിച്ചു. മലദ്വാരത്തിലുണ്ടാകുന്ന എല്ലാ ലക്ഷണങ്ങളും പൈല്സ് ആകണമെന്നില്ലെന്നും അദ്ദേഹം പറഞ്ഞു.
“ചില രോഗികള്ക്ക് വൻകുടലിലെ കാൻസർ പോളിപ്പുകളോ കൊളൈറ്റിസോ ഇല്ലെന്ന് ഉറപ്പുവരുത്താൻ കൊളോണോസ്കോപ്പി പരിശോധന ചെയ്യേണ്ടി വന്നേക്കാം.” മാറിമാറി വരുന്ന വയറിളക്കവും മലബന്ധവും, മലത്തില് കഫത്തിന്റെ സാന്നിധ്യം, അല്ലെങ്കില് കുടുംബത്തില് വൻകുടല് കാൻസറിന്റെ ചരിത്രം എന്നിവയുണ്ടെങ്കില് നാണക്കേട് വിചാരിച്ച് സ്വയം ചികിത്സ നടത്താതെ കൃത്യമായ ഡോക്ടറുടെ പരിശോധനയ്ക്ക് വിധേയമാകേണ്ടത് അത്യാവശ്യമാണ്.
