2014-ന് മുൻപ് വിരമിച്ച്, വിവിധ കോടതിവിധികളുടെ അടിസ്ഥാനത്തില് ഉയർന്ന പെൻഷൻ കൈപ്പറ്റിയിരുന്ന ലക്ഷക്കണക്കിന് ഗുണഭോക്താക്കള്ക്ക് കനത്ത പ്രഹരമേകി പ്രൊവിഡന്റ് ഫണ്ട് ഓർഗനൈസേഷന്റെ (EPFO) കൂട്ടനടപടി.ഈ വിഭാഗത്തില്പ്പെട്ടവരുടെ അധിക പെൻഷൻ റദ്ദാക്കിയ ഇ.പി.എഫ്.ഒ., ഇതുവരെ കൈപ്പറ്റിയ തുക ഒന്നിച്ച് തിരിച്ചടയ്ക്കാൻ ആവശ്യപ്പെട്ട് പെൻഷൻകാർക്ക് നോട്ടീസ് അയച്ചുതുടങ്ങി.
വിരമിക്കുന്നതിന് മുൻപ് ജീവനക്കാരും തൊഴിലുടമയും സംയുക്തമായി നല്കേണ്ട ‘ജോയിന്റ് ഓപ്ഷൻ’ സമർപ്പിച്ചില്ല എന്ന സാങ്കേതിക കാരണം ചൂണ്ടിക്കാട്ടിയാണ് വർഷങ്ങളായി വാങ്ങിയിരുന്ന പെൻഷൻ തുക ഒരൊറ്റ രാത്രികൊണ്ട് റദ്ദാക്കിയിരിക്കുന്നത്.
പ്രായസഹജമായ അസുഖങ്ങളും മരുന്നിനുള്ള ചിലവുകളുമായി ജീവിതത്തിന്റെ സായാഹ്നത്തില് കഷ്ടപ്പെടുന്ന പ്രായമായ പെൻഷൻകാരെയാണ് ഇ.പി.എഫ്.ഒ.യുടെ ഈ കടുംവെട്ട് പ്രതിസന്ധിയിലാക്കിയിരിക്കുന്നത്. ലക്ഷക്കണക്കിന് രൂപ ഒന്നിച്ച് ഡിമാൻഡ് ഡ്രാഫ്റ്റായി (DD) അടയ്ക്കണമെന്നാണ് നോട്ടീസിലെ കർശന നിർദേശം.
ഉദാഹരണത്തിന്, തിരുവനന്തപുരത്ത് താമസിക്കുന്ന ഒരു മുതിർന്ന പത്രപ്രവർത്തകന് ലഭിച്ച നോട്ടീസില് $2,90,336$ രൂപ ഉടൻ തന്നെ റീജണല് പി.എഫ്. കമ്മിഷണർ ഓഫീസില് അടയ്ക്കാനാണ് ആവശ്യപ്പെട്ടിരിക്കുന്നത്. 2011-ല് വിരമിച്ച ഇദ്ദേഹം നീണ്ട നിയമപോരാട്ടത്തിനൊടുവിലാണ് യഥാർഥ വേതനത്തിന് ആനുപാതികമായ ഉയർന്ന പെൻഷൻ നേടിയെടുത്തത്.
കഴിഞ്ഞ 15 വർഷമായി വാങ്ങിയ അധിക തുകയാണ് ഇപ്പോള് ഒറ്റയടിക്ക് തിരിച്ചുചോദിക്കുന്നത്.2022 നവംബറിലെ സുപ്രീംകോടതി വിധിയുടെ മാനദണ്ഡങ്ങള് പ്രകാരം 2014-ന് മുൻപ് വിരമിച്ചവർക്ക് ഉയർന്ന പെൻഷന് അർഹതയില്ലെന്നാണ് ഇ.പി.എഫ്.ഒ.യുടെ വാദം. എന്നാല്, സുപ്രീംകോടതിയുടെയും വിവിധ ഹൈക്കോടതികളുടെയും മുൻ ഉത്തരവുകളുടെ അന്തസ്സത്തയ്ക്ക് വിരുദ്ധമാണ് ഇ.പി.എഫ്.ഒ.യുടെ ഈ നടപടിയെന്ന് പെൻഷൻകാർ ആരോപിക്കുന്നു.
തൊഴിലുടമയുടെ വീഴ്ചയ്ക്ക് തൊഴിലാളി പിഴയൊടുക്കണോ?
“ഒരു ജീവനക്കാരൻ തൊഴിലുടമ വഴിയാണ് പ്രോവിഡന്റ് ഫണ്ടിലേക്ക് കൃത്യമായി പണമടയ്ക്കുന്നതും രേഖകള് സമർപ്പിക്കുന്നതും. സമയബന്ധിതമായി ‘ജോയിന്റ് ഓപ്ഷൻ’ നല്കാതിരുന്നത് തൊഴിലുടമയുടെ ഭാഗത്തുനിന്നുണ്ടായ വീഴ്ചയാണ്. കമ്പനികളുടെയോ സ്ഥാപനങ്ങളുടെയോ ഭാഗത്തുനിന്നുണ്ടായ അനാസ്ഥയ്ക്ക്, പ്രായമായ തൊഴിലാളികളുടെ അവകാശങ്ങള് നിഷേധിക്കുന്നതും പണം തിരിച്ചുപിടിക്കുന്നതും കടുത്ത നീതിനിഷേധമാണ്.” – പെൻഷൻ കൂട്ടായ്മ ഭാരവാഹികള് വ്യക്തമാക്കി.
തൊഴിലുടമയുടെ വീഴ്ചയ്ക്ക് തൊഴിലാളി പിഴയൊടുക്കണോ?
പെൻഷൻ തുക തിരിച്ചുപിടിക്കാനുള്ള ഇ.പി.എഫ്.ഒ.യുടെ ഏകപക്ഷീയമായ നീക്കത്തിനെതിരെ സംസ്ഥാനവ്യാപകമായി ശക്തമായ പ്രതിഷേധങ്ങള്ക്കും നിയമപോരാട്ടങ്ങള്ക്കും ഒരുങ്ങുകയാണ് പെൻഷൻകാരുടെ സംഘടനകള്.
