നാംകഴിക്കുന്ന ആഹാരവും നമ്മുടെ മൊത്തത്തിലുള്ള ആരോഗ്യവും തമ്മില് നേരിട്ട് ബന്ധമുണ്ട്. നമ്മള് എന്ത് കഴിക്കുന്നു എന്നത് നമ്മുടെ ആരോഗ്യത്തെ മാത്രമല്ല, നമ്മുടെ ചർമ്മം, മുടി, ബാഹ്യരൂപം എന്നിവയെയും പ്രതിഫലിപ്പിക്കുന്നുണ്ട്.പോഷകഗുണമുള്ള ആഹാരക്രമം യുവത്വമുള്ളവരും ഊർജ്ജസ്വലരുമായി നിലനിർത്താൻ സഹായിക്കുമെന്ന് നമുക്കറിയാം.
എന്നാല് ദൈനംദിന ജീവിതത്തില് നാം കഴിക്കുന്ന ചില സാധാരണ ഭക്ഷണങ്ങള് ശരീരത്തിന്റെ വാർധക്യ പ്രക്രിയയെ രഹസ്യമായി വേഗത്തിലാക്കുന്നുണ്ടെന്നാണ് പുതിയ പഠനങ്ങള് പറയുന്നത്. ചർമ്മത്തില് ചുളിവുകള് വീഴ്ത്തുന്നത് മുതല് ചർമ്മത്തിന്റെ സ്വാഭാവിക തിളക്കം നഷ്ടപ്പെടുത്തുന്നത് വരെ, ചില ചേരുവകള് കാലക്രമേണ നിങ്ങളുടെ ബാഹ്യസൗന്ദര്യത്തെ സാരമായി ബാധിച്ചേക്കാം.
പ്രായമാകുന്നത് തടയാൻ കഴിയില്ല എന്നത് ശരിതന്നെ, എന്നാല് തെറ്റായ ഭക്ഷണരീതികള് മൂലമുണ്ടാകുന്ന അകാല വാർധക്യം മനസുവെച്ചാല് നമുക്ക് ഒഴിവാക്കാവുന്നതാണ്. വറുത്ത ഭക്ഷണങ്ങള്, ബിയർ, പിസ്സ തുടങ്ങിയ ചിലര് സ്ഥിരമായി കഴിക്കാറുണ്ട്. ചിലര് വല്ലപ്പോഴുമായിരിക്കും ഇവ കഴിക്കാറുള്ളത്. എന്നാല് ഇവ അടിക്കടി ശരീരത്തിലെത്തുന്നത് നിങ്ങളുടെ യഥാര്ഥ പ്രായത്തേക്കാള് കൂടുതല് പ്രായം തോന്നിപ്പിക്കാന് ഇടയാക്കുമെന്ന് പ്രശസ്ത ന്യൂറോ സയന്റിസ്റ്റായ റോബർട്ട് ലവ് പറയുന്നു. ഇന്സ്റ്റഗ്രാമില് പങ്കുവെച്ച വിഡിയോയിലാണ് ഇക്കാര്യം പറയുന്നത്.
വറുത്തതും പൊരിച്ചതുമായ ഭക്ഷണങ്ങള്
ഫ്രെഞ്ച് ഫ്രൈസ്, ഫ്രൈഡ് ചിക്കൻ, ഡോനട്സ് തുടങ്ങിയ വറുത്ത ഭക്ഷണങ്ങള് കഴിക്കാൻ രുചികരമാണെങ്കിലും ചർമ്മത്തിന് ഇവ വില്ലനാണ്. അവ എന്തൊക്കെയാണെന്ന് നോക്കാം.
കൊളാജൻ നശിക്കുന്നു
ചർമ്മത്തിന് ഇലാസ്തികതയും യുവത്വവും നല്കുന്ന ‘കൊളാജൻ’ എന്ന പ്രോട്ടീനെ നശിപ്പിക്കുന്ന ട്രാൻസ് ഫാറ്റുകളും അഡ്വാൻസ്ഡ് ഗ്ലൈക്കേഷൻ എൻഡ്-പ്രൊഡക്റ്റുകളും വറുത്ത ഭക്ഷണങ്ങളില് അടങ്ങിയിട്ടുണ്ട്. ഇത് ചർമ്മം തൂങ്ങുന്നതിനും ചുളിവുകള് വീഴുന്നതിനും കാരണമാകുന്നു. ഇവ ശരീരത്തിനുള്ളില് വിട്ടുമാറാത്ത നീര്ക്കെട്ടിന് കാരണമാകുന്നു. ഇത് ചർമ്മത്തെ മാത്രമല്ല, സന്ധിവേദന, ഹൃദ്രോഗം എന്നിവയിലേക്കും നയിക്കാം.
ഓക്സിഡേറ്റീവ് സ്ട്രെസ്
ഉയർന്ന താപനിലയില് വീണ്ടും വീണ്ടും ചൂടാക്കിയ എണ്ണയില് ഇത്തരം ഭക്ഷണങ്ങള് തയ്യാറാക്കുമ്പോള് ഉണ്ടാകുന്ന ഫ്രീ റാഡിക്കലുകള് ശരീരകോശങ്ങളെ ദോഷകരമായി ബാധിക്കുന്നു.
ബിയർ
പലരും വിനോദവേളകളില് ഉപയോഗിക്കുന്ന ബിയർ ശരീരത്തിന്റെ ജൈവിക പ്രായം വർധിപ്പിക്കുന്ന ഒന്നാണെന്ന് റോബർട്ട് ലവ് പറയുന്നു. ഇതിന്റെ അമിത ബിയർ ഉപയോഗം ഓർമ്മശക്തിയെയും തലച്ചോറിന്റെ പ്രവർത്തനങ്ങളെയും മന്ദഗതിയിലാക്കുന്നു. കുടലിലെ നല്ല ബാക്ടീരിയകളുടെ നാശത്തിന് ബിയർ കാരണമാകുന്നു. ഇത് ദഹനവ്യവസ്ഥയെ തകരാറിലാക്കുകയും ശരീരത്തില് അനാവശ്യ നീർക്കെട്ട് ഉണ്ടാക്കുകയും ചെയ്യും.
ബിയറിന്റെ ഉപയോഗം ആഴത്തിലുള്ള ഉറക്കത്തെ തടസ്സപ്പെടുത്തുന്നു. കോശങ്ങളുടെ പുനരുജ്ജീവനത്തിന് ഉറക്കം അത്യാവശ്യമാണെന്ന് നമുക്കറിയാം. അതുകൊണ്ട് ശരിയായ ഉറക്കമില്ലെങ്കില് അത് നിങ്ങളുടെ തിളക്കവും നഷ്ടപ്പെടുത്തും.
ബിയറില് അടങ്ങിയിരിക്കുന്ന ഗ്ലൂട്ടനും ഉയർന്ന കലോറിയും അടിവയറ്റില് കൊഴുപ്പ് അടിഞ്ഞുകൂടാൻ കാരണമാകുന്നു, ഇത് പ്രായക്കൂടുതല് തോന്നിപ്പിക്കും.
പിസ്സ
ഫാസ്റ്റ് ഫുഡ് പ്രേമികളുടെ പ്രിയപ്പെട്ട വിഭവമായ പിസ്സ, വാർധക്യം വേഗത്തിലാക്കുന്ന ഘടകങ്ങളുടെ കൂമ്പാരമാണെന്ന് വിദഗ്ധര് പറയുന്നു. റീഫൈൻ ചെയ്ത മൈദ കൊണ്ടാണ് പിസ്സയുടെ ബേസ് ഉണ്ടാക്കുന്നത്. ഇതിലടങ്ങിയിരിക്കുന്ന ഉയർന്ന അളവിലുള്ള ഗ്ലൂട്ടൻ ദഹനപ്രശ്നങ്ങള്ക്കും ശരീരത്തിലെ വീക്കത്തിനും കാരണമാകുന്നു. പിസ്സയിലെ ഉയർന്ന അളവിലുള്ള സോഡിയം ശരീരത്തിലെ ജലാംശം വറ്റിച്ചുകളയുന്നു. ഇത് കണ്ണിന് താഴെ കറുത്ത പാടുകള് വരാനും മുഖം വീർത്തിരിക്കാനും കാരണമാകും. കൂടാതെ ചീസിലെ പൂരിത കൊഴുപ്പ് ചർമ്മ സുഷിരങ്ങള് അടയാനും മുഖക്കുരു വരാനും കാരണമാകുന്നു. പിസ്സയില് ഉപയോഗിക്കുന്ന പെപ്പറോണി, സോസേജ് തുടങ്ങിയ പ്രോസസ് ചെയ്ത മാംസങ്ങളിലെ പ്രിസർവേറ്റീവുകള് സന്ധിവേദനയ്ക്കും ഊർജ്ജക്കുറവിനും കാരണമാകുന്നു.
പിസ്സയില് കലോറി കൂടുതലും പോഷകങ്ങള് കുറവുമാണ്, ഇത് കൊഴുപ്പ് അടിഞ്ഞുകൂടുന്നതിലേക്ക് നയിക്കുന്നു. ടൈപ്പ് 2 പ്രമേഹം, ഹൃദയ സംബന്ധമായ അസുഖങ്ങള്, ഹോർമോണ് അസന്തുലിതാവസ്ഥ തുടങ്ങിയവയിലേക്കും നയിക്കുന്നു. പ്രായമാകുന്നത് പ്രകൃതിനിയമമാണെങ്കിലും, തെറ്റായ ഭക്ഷണരീതികള് കാരണം അകാല വാർധക്യമുണ്ടാകുന്നത് ഒരു പരിധി വരെ നമുക്ക് തടയാനാകും. അതിനാല്, ഇത്തരം ഭക്ഷണങ്ങള് പരമാവധി ഒഴിവാക്കുകയോ നിയന്ത്രിക്കുകയോ ചെയ്ത് ആരോഗ്യകരമായ ഒരു ജീവിതശൈലി ശീലമാക്കുന്നത് നിങ്ങളുടെ മൊത്തത്തിലുള്ള ആരോഗ്യത്തിന് മാത്രമല്ല, യുവത്വം നിലനിര്ത്താനും അകാലവാര്ധക്യം തടയുന്നതിനും സഹായിക്കും.
