ജീവിതത്തില് പണം സമ്ബാദിക്കണമെങ്കില് കഠിനാധ്വാനം അത്യാന്താപേക്ഷിതമാണ്. എത്ര ചെറിയ തുകയാണെങ്കിലും സ്വന്തമായി അധ്വാനിച്ച് കിട്ടുന്ന ആദ്യ ശമ്ബളം നല്കുന്ന സന്തോഷവും സംതൃപ്തിയും പറഞ്ഞറിയിക്കാന് പറ്റാത്തതാണ്.ഇപ്പോഴിതാ ഇത്തരം ലക്ഷ്യങ്ങള് കീഴടക്കാന് പ്രായം പോലും ഒരു തടസ്സമല്ലെന്ന് തെളിയിച്ചിരിക്കുകയാണ് 52 വയസ്സുകാരിയായ ഒരു വീട്ടമ്മ.
ജീവിതത്തിലാദ്യമായി സ്വന്തം പരിശ്രമത്തിലൂടെ വരുമാനം കണ്ടെത്തിയ സന്തോഷം പങ്കുവെക്കുന്ന ഇവരുടെ വീഡിയോ സോഷ്യല് മീഡിയയില് ശ്രദ്ധനേടുകയാണ്. വെറും ആറുമാസത്തെ പരിശ്രമത്തിലൂടെ യൂട്യൂബില് നിന്നാണ് ഇവര് ആദ്യ പ്രതിഫലം നേടിയെടുത്തത്.
അന്ഷുല് പരീഖ് എന്ന ഇന്സ്റ്റാഗ്രാം ഉപയോക്താവ് പങ്കുവെച്ച വീഡിയോയില്, തന്റെ ഫോണിലെ വരുമാന വിവരം കണ്ട് വികാരാധീനയായി ഇരിക്കുന്ന അമ്മയെ കാണാം. ‘എന്താണ് സംഭവിച്ചത്?’ എന്ന മകളുടെ ചോദ്യത്തിന്, ‘എന്റെ ജീവിതത്തിലെ ആദ്യത്തെ വരുമാനം ഞാന് നേടിയിരിക്കുന്നു. 52ാം വയസ്സില്, വെറും ആറുമാസം കൊണ്ടാണ് യൂട്യൂബിലൂടെ ഞാന് ഇത് നേടിയെടുത്തത്’ എന്ന് അഭിമാനത്തോടെ ഇവര് മറുപടി നല്കുന്നു. സ്വപ്നങ്ങള്ക്ക് പ്രായമില്ല, കഠിനാധ്വാനത്തിന് പ്രായപരിധിയില്ല’ എന്ന കുറിപ്പോടെയാണ് വീഡിയോ പങ്കുവെച്ചിരിക്കുന്നത്. യൂട്യൂബ് ക്രിയേറ്റേഴ്സ് ഇന്ത്യയും നേട്ടത്തെ അഭിനന്ദിച്ച് കമന്റിട്ടിട്ടുണ്ട്.
