പാതിവിലത്തട്ടിപ്പില് കേസെടുത്ത് എൻഫോഴ്സ്മെന്റ് ഡയറക്ടറേറ്റ്(ഇ.ഡി) . പ്രാഥമികാന്വേഷണത്തിന് ശേഷമാണ് ഇ.ഡിയുടെ കൊച്ചി യൂണിറ്റ് കേസ് രജിസ്റ്റർ ചെയ്തത്.സംസ്ഥാനത്തെ അന്വേഷണം ക്രൈം ബ്രാഞ്ചിന് വിട്ടതിന് പിന്നാലെയാണ് ഇ.ഡി കേസ് രജിസ്റ്റർ ചെയ്യുന്നത്. നേരത്തേ പാതിവിലത്തട്ടിപ്പുമായി ബന്ധപ്പെട്ട വിവരങ്ങള് പുറത്തുവന്നതിന് പിന്നാലെ ഇ.ഡി കൂടുതല് വിവരങ്ങളും രേഖകളും ശേഖരിച്ചിരുന്നു.
പാതിവിലത്തട്ടിപ്പില് കേസന്വേഷണം ക്രൈംബ്രാഞ്ചിന് കൈമാറിക്കൊണ്ട് സർക്കാർ ഉത്തരവ് അടുത്തിടെയാണ് പുറത്തുവന്നത്. ആദ്യം രജിസ്റ്റർ ചെയ്ത 34 കേസുകളാണ് ക്രൈംബ്രാഞ്ചിന് കൈമാറിയത്. എറണാകുളം 11 കേസുകള്, ഇടുക്കി 11, ആലപ്പുഴ എട്ട്, കോട്ടയം മൂന്ന്, കണ്ണൂർ ഒന്ന് എന്നിങ്ങനെയാണ് ക്രൈംബ്രാഞ്ചിന് കൈമാറിയിരിക്കുന്ന കേസുകള്. ഇവ പോലീസ് സ്റ്റേഷനുകളില് ആദ്യം ലഭിച്ച പരാതികളുടെ അടിസ്ഥാനത്തില് രജിസ്റ്റർ ചെയ്തവയാണ്.
ക്രൈംബ്രാഞ്ച് എ.ഡി.ജി.പി.എച്ച്. വെങ്കിടേഷിന്റെ മേല്നോട്ടത്തിലായിരിക്കും അന്വേഷണം. കേസന്വേഷണത്തിനായി പ്രത്യേക സംഘം രൂപവത്കരിക്കാൻ ക്രൈം ബ്രാഞ്ച് എഡിജിപിയ്ക്ക് നിർദേശം നല്കിക്കൊണ്ടാണ് ഡിജിപിയുടെ ഉത്തരവ് പുറത്തുവന്നത്. കേസിലെ ഒന്നാം പ്രതി സായിഗ്രാമം സ്ഥാപക ചെയർമാനും എൻ.ജി.ഒ. കോണ്ഫെഡറേഷൻ ആജീവനാന്ത രക്ഷാധികാരിയുമായ ആനന്ദകുമാറും രണ്ടാം പ്രതി നാഷണല് എൻ.ജി.ഒ. കോണ്ഫെഡറേഷൻ സംസ്ഥാന സെക്രട്ടറി അനന്തു കൃഷ്ണനുമാണ്. തട്ടിപ്പുമായി ബന്ധപ്പെട്ട കേസില് മുനമ്ബം അന്വേഷണ കമ്മിഷൻ റിട്ട. ജസ്റ്റിസ് സി.എൻ. രാമചന്ദ്രൻ നായരെ മൂന്നാംപ്രതിയാക്കിയിരുന്നു.
