പ്രശസ്ത ഫാഷൻ ഡിസൈനറും സംരംഭകയുമായ ശോഭ വിശ്വനാഥിനെതിരായ കഞ്ചാവ് കേസില് നിരപരാധിത്വം തെളിയിച്ചു. 2021-ല് ശോഭയുടെ ഉടമസ്ഥതയിലുള്ള ‘വീവേഴ്സ് വില്ലേജ്’ എന്ന സ്ഥാപനത്തില് നിന്ന് 400 ഗ്രാം കഞ്ചാവ് പിടിച്ചെടുത്ത സംഭവത്തില്, യഥാർത്ഥ പ്രതികളെ ക്രൈംബ്രാഞ്ച് കണ്ടെത്തുകയും നിയമപോരാട്ടത്തിലൂടെ ശോഭ കുറ്റവിമുക്തയാവുകയുമായിരുന്നു. മുൻ ജീവനക്കാരും തന്നോട് പ്രൊപ്പോസല് നടത്തിയ വ്യക്തിയും ചേർന്നാണ് 10,000 രൂപയ്ക്ക് വേണ്ടി തന്നെ കേസില് കുടുക്കിയതെന്ന് ശോഭ വെളിപ്പെടുത്തി.2021 ജനുവരി 12-നായിരുന്നു സംഭവം.
സ്ഥാപനത്തിനുള്ളില് മഫ്തിയിലെത്തിയ രണ്ട് പോലീസ് ഉദ്യോഗസ്ഥർ തന്റെ ഫോണ് പിടിച്ചെടുക്കുകയും ചോദ്യം ചെയ്യുകയും ചെയ്തതായി ശോഭ പറയുന്നു. എന്ത് തരം ബിസിനസ്സാണ് ചെയ്യുന്നതെന്നും ഈ “പരിപാടികള്” എന്നാണ് തുടങ്ങിയതെന്നുമായിരുന്നു അവരുടെ ചോദ്യങ്ങള്. സംഭവത്തിന്റെ വ്യക്തമായ വിവരങ്ങള് നല്കാതെ തന്നെ പഴയ സ്റ്റോറിലേക്ക് കൊണ്ടുപോയെന്നും, പോലീസ് ജീപ്പില് കയറാൻ വിസമ്മതിച്ചപ്പോള് തന്റെ വാഹനം പോലീസ് ഓടിച്ചുകൊണ്ടുപോയെന്നും ശോഭ വിശദീകരിച്ചു.പഴയ സ്റ്റോറിലെത്തിയപ്പോള് മുപ്പതോളം പോലീസ് ഉദ്യോഗസ്ഥർ അവിടെയുണ്ടായിരുന്നെന്നും, തന്നെ കുടുക്കുകയായിരുന്നുവെന്നും ശോഭ പറഞ്ഞു.
ഈ വാർത്ത മാതാപിതാക്കള് അറിഞ്ഞാല് എന്തു സംഭവിക്കുമെന്ന ആശങ്ക തനിക്കുണ്ടായെന്നും, അവർക്ക് എന്തെങ്കിലും സംഭവിച്ചാല് പോലീസുകാരെ വെറുതെ വിടില്ലെന്ന് താൻ പറഞ്ഞതായും ശോഭ ഓർമ്മിച്ചു. തന്റെ ഡിവോഴ്സ് കേസ് നടക്കുന്നതിനാല് മുൻ ഭർത്താവോ അല്ലെങ്കില് താൻ നിരസിച്ച പ്രൊപ്പോസല് നടത്തിയ വ്യക്തിയോ ആയിരിക്കാം ഇതിന് പിന്നിലെന്ന് താൻ പോലീസിനോട് അന്നുതന്നെ പറഞ്ഞിരുന്നതായും ശോഭ കൂട്ടിച്ചേർത്തു.പോലീസില് നിന്ന് മോശം പെരുമാറ്റം നേരിടേണ്ടി വന്നെങ്കിലും, നിരന്തരമായ നിയമപോരാട്ടങ്ങളിലൂടെയാണ് ശോഭ തന്റെ നിരപരാധിത്വം തെളിയിച്ചത്. ഒടുവില് ക്രൈംബ്രാഞ്ച് നടത്തിയ അന്വേഷണത്തില് യഥാർത്ഥ പ്രതികളെ കണ്ടെത്തുകയും ശോഭയ്ക്ക് നീതി ലഭിക്കുകയും ചെയ്തു. ബിഗ് ബോസ് മലയാളം സീസണ് 5-ലൂടെ പ്രേക്ഷകർക്ക് കൂടുതല് പരിചിതയായ ശോഭ, തന്റെ ജീവിതത്തിലെ ഈ നിർണ്ണായക സംഭവത്തെക്കുറിച്ച് അടുത്തിടെ തുറന്നു പറഞ്ഞിരുന്നു.
