പബ്ജി അല്ല, ഇത് റിയൽ വീഡിയോ: വീട്ടിൽ കയറിയ മോഷ്ടാവിനെ ഫ്രയിങ് പാൻ കൊണ്ട് അടിച്ചോടിച്ച് യുവാവ് – വീഡിയോ കാണാം.
പാചകത്തിനപ്പുറം ഫ്രൈയിങ് പാൻ ആയുധമായും ഉപയോഗിക്കാമെന്ന് നമുക്ക് കാണിച്ചുതന്നത് പബ്ജി എന്ന മൊബൈല്‍ ഗെയിമാണ്. എന്നാല്‍ ഇപ്പോഴിതാ, റിയല്‍ ലൈഫിലും ഫ്രൈയിങ് പാനിനെ ആയുധമാക്കിയിരിക്കുകയാണ് ഒരാള്‍. അത് പക്ഷേ പബ്ജിയിലെ പോലെ എതിരാളിയെ കൊല്ലാനായിരുന്നില്ലെന്നുമാത്രം.
യു.എസ്സിലെ ഷിക്കാഗോയിലാണ് സംഭവം. ജെയ്സണ് വില്യംസ് എന്നയാളാണ് ഈ കഥയിലെ താരം. ജൂണ്‍ 20-ന് ജോലി കഴിഞ്ഞ് വീട്ടിലേക്ക് വരികയായിരുന്ന ജെയ്സണ് വീട്ടില്‍ ആരോ അതിക്രമിച്ചുകയറിയതായി സുരക്ഷാ സംവിധാനത്തില്‍ നിന്ന് മുന്നറിയിപ്പ് ലഭിച്ചു. അപ്പോഴേക്ക് വീടിന് തൊട്ടടുത്തെത്തിയിരുന്ന ജെയ്സണ് ഉടൻ വീട്ടിലേക്ക് കുതിച്ചു.’വീട്ടിലേക്ക് ഓടിക്കയറിയ ഞാൻ ആദ്യം തിരഞ്ഞത് എന്തെങ്കിലും ആയുധം അവിടെയുണ്ടോ എന്നാണ്. അപ്പോഴാണ് ഫ്രൈയിങ് പാൻ അവിടെ കിടക്കുന്നത് കണ്ടത്. ഞാൻ മറ്റൊന്നും ആലോചിക്കാതെ അത് കയ്യിലെടുത്തു. അതേസമയം വീട്ടില്‍ കയറിയ കള്ളൻ മുകളിലെ നിലയില്‍ നിന്ന് താഴോട്ട് ഇറങ്ങിവന്നു.’ -ജെയ്സണ് വില്യംസ് പറഞ്ഞു.
പിന്നെ നടന്നതൊക്കെ കണ്ണടച്ചുതുറക്കുന്ന വേഗത്തിലായിരുന്നു. ഫ്രൈയിങ് പാൻ എന്ന തന്റെ ‘ആയുധം’ ഉപയോഗിച്ച്‌ ജെയ്സണ് കള്ളനെ വീടിന് പുറത്തേക്ക് ഓടിച്ചു. വീടിന് പുറത്തെത്തിയിട്ടും അദ്ദേഹം കള്ളനെ വിടാതെ പിന്നാലെ ഓടി. അപ്പോഴേക്ക് വിവരം ലഭിച്ച ഷിക്കാഗോ പോലീസ് സ്ഥലത്തേക്ക് പാഞ്ഞെത്തുകയും തെരുവില്‍ വെച്ച്‌ കള്ളനെ അറസ്റ്റ് ചെയ്യുകയും ചെയ്തു.
Here is the video of the burglar being caught: got some good licks inside and the back. Keystone cops theme should be added for laughs. I’m ok. Guys gonna have a headache tomorrow and was taken away by the ambulance. pic.twitter.com/ry1hr89A54
— Jason Williams (@Bashido) June 20, 2024
‘ഓടിയൊളിച്ച്‌ രക്ഷപ്പെടുക, അല്ലെങ്കില്‍ പൊരുതിനില്‍ക്കുക എന്നീ രണ്ട് ഓപ്ഷനുകള്‍ മാത്രമേ ആ സമയം എന്റെ മുന്നിലുണ്ടായിരുന്നുള്ളൂ. ഞാൻ പോരാടാൻ തീരുമാനിച്ചു. ചിലപ്പോള്‍ ഇതിന്റെ അവസാനം മറ്റൊരു തരത്തിലായേനെ. പക്ഷേ എല്ലാം ശുഭമായി അവസാനിച്ചു.’ -ജെയ്സണ് തുടർന്നു.സംഭവത്തിന്റെ ദൃശ്യങ്ങള്‍ ജെയ്സന്റെ വീട്ടില്‍ സ്ഥാപിച്ചിരുന്ന സി.സി.ടി.വി. ക്യാമറയില്‍ പതിഞ്ഞിരുന്നു. ഈ ദൃശ്യങ്ങള്‍ അദ്ദേഹം തന്റെ എക്സ് അക്കൗണ്ടില്‍ പങ്കുവെച്ചു. ജെയ്സണ് പോസ്റ്റ് ചെയ്ത വീഡിയോ ഇതിനകം പത്തുലക്ഷത്തിലേറെ പേർ കണ്ടുകഴിഞ്ഞു.
