ദുഃഖ വെള്ളിയാഴ്ച മാത്രം പള്ളിയിൽ പോകുന്ന ആൾ; ചങ്ങനാശ്ശേരി സീറ്റ് നോട്ടമിട്ടപ്പോൾ സഭ എതിർത്തു: 39 വർഷം എംഎൽഎയും അഞ്ചുവർഷം മന്ത്രിയുമായിരുന്നിട്ടും കൊതി തീരാതെ “കുത്തിത്തിരിപ്പുമായി” കെ സി ജോസഫ് രംഗത്തിറങ്ങുന്നത് കോട്ടയം പാർലമെന്റ് സീറ്റ് ലക്ഷ്യമാക്കി എന്ന് സൂചന.

കോൺഗ്രസിൽ തലമുറ മാറ്റം എന്നത് നടപ്പാക്കാൻ ഒരുവിധത്തിലും അനുവദിക്കില്ല എന്ന നിലപാട് എടുത്തിരിക്കുന്ന ഒരുപറ്റം നേതാക്കൾ കേരളത്തിലെ പാർട്ടിയിൽ ഉണ്ട്. നിയമസഭാ തിരഞ്ഞെടുപ്പിലെ തുടർച്ചയായ പരാജയങ്ങളുടെ പശ്ചാത്തലത്തിൽ കെപിസിസി അധ്യക്ഷ പദവിയിൽ കെ സുധാകരനും, പ്രതിപക്ഷ നേതാവായി വി ഡി സതീശനും എത്തിയപ്പോൾ പാർട്ടിയുടെ പ്രവർത്തകരും, അനുഭാവികളും പൊതുസമൂഹവും ഇത് കോൺഗ്രസിന്റെ തിരിച്ചുവരവിന് കളമൊരുക്കും എന്ന് വിശ്വസിച്ചു. എന്നാൽ പാർട്ടിയെ അടിമുടി ഉറച്ചുവാർക്കുവാൻ രംഗത്തിറങ്ങിയ കെപിസിസി അധ്യക്ഷൻ സുധാകരനെതിരെ ഗ്രൂപ്പുകൾ ഒറ്റക്കെട്ടായി നിലകൊണ്ടു. ഗ്രൂപ്പ് പരിഗണനകൾക്ക് അതീതമായി ഡിസിസി അധ്യക്ഷന്മാരെ നിശ്ചയിക്കാൻ കഴിഞ്ഞെങ്കിലും പിന്നീട് അങ്ങോട്ട് ചെറുവിരൽ അനക്കുവാൻ സുധാകരനെ പാർട്ടിയിലുള്ള ഗ്രൂപ്പ് മാനേജർമാരും നേതാക്കന്മാരും അനുവദിച്ചില്ല.

ഇതിനിടയിൽ കോൺഗ്രസിലെ ഗ്രൂപ്പ് സമവാക്യങ്ങളും മാറിമറിഞ്ഞു. ഉമ്മൻചാണ്ടി സജീവരാഷ്ട്രീയം വിട്ടതും, രമേശ് ചെന്നിത്തലയെ വിട്ട് ഐ ഗ്രൂപ്പ് പ്രമുഖന്മാർ കെ സി വേണുഗോപാലിന് ഒപ്പം നിലപാടെടുത്തതും, കെപിസിസി പ്രസിഡണ്ടും പ്രതിപക്ഷ നേതാവും ഇരു ധ്രുവങ്ങളിൽ ആയതും പാർട്ടിയെ സ്തംഭനാവസ്ഥയിലാണ് എത്തിച്ചത്. പാർലമെന്റ് തിരഞ്ഞെടുപ്പ് പടിവാതിൽക്കൽ എത്തിയിട്ടും ജില്ലാ ബ്ലോക്ക് തലങ്ങളിലുള്ള പുനസംഘടന പൂർത്തിയാക്കുവാൻ കോൺഗ്രസിന് ഇതുവരെ കഴിഞ്ഞിട്ടില്ല.