ഡൽഹി: പാർട്ടി അധ്യക്ഷ സ്ഥാനത്തേക്കുള്ള തിരഞ്ഞെടുപ്പിൽ കോൺഗ്രസിൽ പ്രതിസന്ധി. വോട്ടർ പട്ടിക പ്രസിദ്ധീകരിക്കണമെന്ന് ആവശ്യപ്പെട്ട് മനീഷ് തിവാരി ഉൾപ്പെടെ മൂന്ന് എംപിമാർ പരസ്യമായി രംഗത്തെത്തിയെങ്കിലും ഈ രീതി ഒരിക്കലും നിലവിലില്ലെന്ന് പറഞ്ഞ് എഐസിസി നേതൃത്വം ആവശ്യം നിരസിച്ചു. ഞായറാഴ്ച നടന്ന കോൺഗ്രസ് പ്രവർത്തക സമിതി യോഗത്തിൽ ജി 23 നേതാവ് ആനന്ദ് ശർമ ഈ ആവശ്യം ഉന്നയിച്ചതിന് പിന്നാലെ മറ്റൊരു ജി 23 നേതാവ് മനീഷ് തിവാരിയും വോട്ടർ പട്ടിക പുറത്തുവിടണമെന്ന ആവശ്യവുമായി രംഗത്തെത്തി.
സ്വതന്ത്രവും നീതിയുക്തവുമായ തിരഞ്ഞെടുപ്പ് ഉറപ്പാക്കുന്നതിനും എഐസിസി പ്രസിഡന്റ് സ്ഥാനത്തേക്ക് മത്സരിക്കാൻ 10 പ്രതിനിധികളുടെ ഒപ്പ് ആവശ്യമുള്ള സ്ഥാനാർത്ഥികളെ സഹായിക്കുന്നതിനുമാണ് വോട്ടർ പട്ടിക പുറത്തിറക്കുന്നതെന്ന് മനീഷ് തിവാരി പറഞ്ഞു. മനീഷ് തിവാരിക്ക് പിന്തുണയുമായി തിരുവനന്തപുരം എംപി ശശി തരൂരും മുതിർന്ന നേതാവ് പി ചിദംബരത്തിന്റെ മകൻ കാർത്തി ചിദംബരവും രംഗത്തെത്തി.
ഏകീകൃത പട്ടിക സ്ഥാനാർത്ഥികൾക്ക് നൽകുമ്പോൾ പിസിസി പ്രതിനിധികളുടെ വോട്ടർ പട്ടിക സംസ്ഥാന ആസ്ഥാനത്ത് ലഭ്യമാകുമെന്ന് എഐസിസി സെൻട്രൽ ഇലക്ഷൻ അതോറിറ്റി ചെയർമാൻ മധുസൂദൻ മിസ്ത്രി അറിയിച്ചു. സംഘടനാ ചുമതലയുള്ള എഐസിസി ജനറൽ സെക്രട്ടറി കെസി വേണുഗോപാലും പട്ടിക പ്രസിദ്ധീകരിക്കണമെന്ന ആവശ്യം തള്ളി. “ഇതൊരു ഇൻ ഹൗസ് പ്രൊസീജറാണ്, എല്ലാവർക്കും കാണാനായി ഇത് പ്രസിദ്ധീകരിക്കരുത്, അങ്ങനെയൊരു രീതിയില്ല, ഞങ്ങൾ പഴയ രീതി തുടരും,” അദ്ദേഹം പറഞ്ഞു.
അതിനിടെ, “എല്ലാവർക്കും വോട്ടർപട്ടിക ലഭ്യമല്ലാതെ എങ്ങനെ ന്യായവും സ്വതന്ത്രവുമായ തിരഞ്ഞെടുപ്പ് സാധ്യമാകും? ന്യായവും സ്വതന്ത്രവുമായ പ്രക്രിയയുടെ സാരം വോട്ടർമാരുടെ പേരും വിലാസവുമാണ്…” തിവാരി ട്വീറ്റ് ചെയ്തു, “എന്തുകൊണ്ടാണ് ഒരാൾ എല്ലാ പിസിസി ഓഫീസുകളിലും പോകേണ്ടത്. മത്സരാർത്ഥികൾക്ക് വോട്ടർമാർ ആരാണെന്ന് കണ്ടെത്താൻ കഴിയണം,” മനീഷ് തിവാരി അഭിപ്രായപ്പെട്ടു.
വോട്ടർ പട്ടിക പുറത്തുവിടുന്നത് പ്രധാനമാണെന്ന് ഞാൻ കരുതുന്നു എന്നായിരുന്നു ശശി തരൂരിന്റെ പ്രതികരണം. ആർക്കൊക്കെ നോമിനേറ്റ് ചെയ്യാം, ആർക്കൊക്കെ വോട്ട് ചെയ്യാം എന്ന് എല്ലാവരും അറിഞ്ഞിരിക്കണം. അതിൽ തെറ്റൊന്നുമില്ല, അദ്ദേഹം പറഞ്ഞു. പരിഷ്കരണവാദികൾ വിമതർ അല്ലെന്ന് കാർത്തി ചിദംബരം ട്വീറ്റ് ചെയ്തു, “ഓരോ തിരഞ്ഞെടുപ്പിനും കൃത്യമായി നിർവചിക്കപ്പെട്ടതും വ്യക്തവുമായ വോട്ടർ പട്ടിക ആവശ്യമാണ്… ഒരു താൽക്കാലിക വോട്ടർ പട്ടിക മതിയാകില്ല.”- കാർത്തി ചിദംബരം കൂട്ടിച്ചേർത്തു.
അതേസമയം, എഐസിസി പ്രസിഡന്റ് തിരഞ്ഞെടുപ്പിനുള്ള വിജ്ഞാപനം സെപ്റ്റംബർ 22ന് പുറത്തിറങ്ങും. 24 മുതൽ 30 വരെ പേപ്പർ നൽകാം. ഒക്‌ടോബർ 17-ന് ഓരോ സംസ്ഥാനത്തെയും പിസിസി ആസ്ഥാനത്താണ് വോട്ടെടുപ്പ്. പിസിസികൾ തിരഞ്ഞെടുക്കുന്ന തൊള്ളായിരത്തിലധികം പ്രതിനിധികളാണ് വോട്ടർമാർ. 19ന് രാവിലെ 10 മണി മുതൽ എഐസിസി ആസ്ഥാനത്താണ് വോട്ടെണ്ണൽ.
