കൊച്ചി: വീടുകളിലെയും ഓഫീസുകളിലെയും പാഴ്വസ്തുക്കള് വില്ക്കാന് ആക്രിക്കട ആപ്പ് എന്ന ആപ്ളിക്കേഷനുമായി കേരള സ്ക്രാപ്പ് മര്ച്ചന്റ്സ് അസോസിയേഷന്. ബുധനാഴ്ച തിരുവനന്തപുരത്ത് വ്യവസായ മന്ത്രി പി.രാജീവ് ആപ്പിന്റെ ഉദ്ഘാടനം നിര്വഹിക്കും.
ഗൂഗിള് സ്റ്റോറില് നിന്ന് ആപ്പ് ഇന്സ്റ്റാള് ചെയ്യാം. കേരളത്തിലെവിടെയും സേവനം ലഭിക്കും. പാഴ്വസ്തുക്കളുടെ ചിത്രം ആപ്പില് അപ്ലോഡ് ചെയ്താല് അവയുടെ വിലയ്ക്ക് ക്വട്ടേഷന് ലഭിക്കും. സൗകര്യപ്രദമായ സമയവും നിര്ദേശിക്കാം. യൂണിഫോം ധരിച്ച ജീവനക്കാര് പിക്കപ്പ് വാഹനത്തിലെത്തി തൂക്കത്തിനനുസരിച്ച് വിലനല്കി സാധനങ്ങള് ശേഖരിക്കും.
ആക്രിക്കച്ചവടത്തിന്റെയും കച്ചവടക്കാരുടെയും ജീവനക്കാരുടെയും ജീവിതനിലവാരവും ഇടപെടലുകളും ആധുനികമാക്കുന്നതിന്റെയും ജനോപകാരപ്രദമാക്കുന്നതിന്റെയും ഭാഗമായാണ് പുതിയ സംരംഭമെന്ന് രക്ഷാധികാരി വി.എം.സിറാജ് വാര്ത്താ സമ്മേളത്തില് പറഞ്ഞു.
3000ല്പ്പരം കച്ചവടക്കാര് ആപ്പിന്റെ ഭാഗമാണ്. അഞ്ച് കിലോമീറ്റര് പരിധിയില് ഒരാള് എന്നതാണ് കണക്ക്. പ്രസിഡന്റ് വി.എം. കുഞ്ഞിമുഹമ്മദ്, സെക്രട്ടറി കെ.പി.എ ഷരീഫ്, ട്രഷറര് അനില് കട്ടപ്പന എന്നിവരും വാര്ത്താസമ്മേളനത്തില് പങ്കെടുത്തു.