സ്കൂള് ഉച്ചഭക്ഷണപദ്ധതിക്കായുള്ള കേന്ദ്ര ഫണ്ടും വെട്ടി സംസ്ഥാനസര്ക്കാര്. 50 കുട്ടികള് വരെ എട്ടുരൂപ, അതിനുമേല് 500 വരെ ഏഴുരൂപ, 500-നുമേല് കുട്ടികള്ക്ക് ആറുരൂപ എന്നിങ്ങനെയാണ് ഉച്ചഭക്ഷണപദ്ധതിക്ക് 2016-ല് നിശ്ചയിച്ച നിരക്ക്. ഇതില് 60% കേന്ദ്രവിഹിതമാണ്. കേന്ദ്രവിഹിതം കഴിഞ്ഞ ഒക്ടോബറില് 8.17 രൂപയായി വര്ധിപ്പിച്ചെങ്കിലും സ്കൂളുകള്ക്ക് ഇപ്പോഴും കിട്ടുന്നത് 2016-ലെ നിരക്കാണ്.
പുതിയ അധ്യയനവര്ഷം നാളെ ആരംഭിക്കാനിരിക്കേ സംസ്ഥാനസര്ക്കാരിന്റെ പോഷകാഹാരപദ്ധതിയുടെ ഭാഗമായ പാല്, മുട്ട വിതരണം തടസപ്പെടാനും സാധ്യത. ഓരോ കുട്ടിക്കും ആഴ്ചയില് ഒരു മുട്ടയും രണ്ടുതവണ 150 മില്ലി ലിറ്റര് പാലുമാണു നല്കേണ്ടത്. അതിനു പ്രത്യേകം തുക അനുവദിച്ചിട്ടില്ല. മാവേലി സ്റ്റോറില്നിന്ന് അരി സ്കൂളില് എത്തിക്കാനുള്ള ചെലവിനു പുറമേ പാചകവാതകം, പച്ചക്കറി, പലവ്യഞ്ജനം, മുട്ട, പാല് എന്നിവയ്ക്കുള്ള പണവും പ്രധാനാധ്യാപകന് കണ്ടെത്തേണ്ട ഗതികേടിലാണ്.
ഉച്ചയൂണിനു കറിയും തോരനും നിര്ബന്ധമാണ്. അച്ചാറും രസവും കറിയായി പരിഗണിക്കില്ല. പാചകത്തൊഴിലാളികളുടെ മാര്ച്ചിലെ ശമ്ബളവും ഏപ്രില്, മേയ് മാസങ്ങളിലെ അവധിക്കാല അലവന്സും നല്കിയിട്ടില്ല. ഉച്ചഭക്ഷണപദ്ധതി വിഷയത്തില് പ്രധാനാധ്യാപകരുടെ സ്വതന്ത്രസംഘടനയായ കെ.പി.പി.എച്ച്.എ. ഹൈക്കോടതിയെ സമീപിച്ചു.