വണ്ടിപ്പെരിയാര്‍ മഞ്ചുമല രാജമുടി ഭാഗത്ത് 3 വയസ് പ്രായമുള്ള പെണ്‍ പുള്ളിപുലിയെ ചത്ത നിലയില്‍ കണ്ടെത്തി. വനം വകുപ്പ് സ്ഥലത്തെത്തി പ്രാഥമിക നടപടികള്‍ക്ക് ശേഷം പോസ്റ്റുമോര്‍ട്ടത്തിനായി കൊണ്ടുപോയി. മഞ്ജുമലയ്ക്കും രാജഗിരിയ്ക്കും ഇടയിലുള്ള തോടിന് കരയിലായാണ് ചത്ത പുലിയെ കണ്ടെത്തിയത്.
ഇന്ന് രാവിലെ ഈ ഭാഗത്തെ എസ്റ്റേറ്റില്‍ ജോലിക്കെത്തിയ തൊഴിലാളികളാണ് പുള്ളി പുലിയെ ചത്ത നിലയില്‍ കണ്ടെത്തിയത് തുടര്‍ന്ന് തൊഴിലാളികള്‍ എസ്റ്റേറ്റ് വാച്ചറെ വിവരമറിയിച്ചു. എസ്റ്റേറ്റ് വാച്ചര്‍ വിവരമറിയിച്ചതിനെ തുടര്‍ന്ന് വനപാലകര്‍ സ്ഥലത്തെത്തി പരിശോധന നടത്തി. പ്രദേശത്ത് 2 പുലികളെ കണ്ടതായും 3 മാസങ്ങള്‍ക്ക് മുന്‍പ് 4 ഓളം വളര്‍ത്തു മൃഗങ്ങളെ പുലി പിടിച്ച നിലയില്‍ കണ്ടെത്തിയതായും പ്രദേശവാസികള്‍ പറഞ്ഞു.
എരുമേലി ഫോറസ്റ്റ് റേഞ്ച് ഓഫീസറുടെ നേതൃത്വത്തിലുള്ളവനപാലക സംഘമാണ് സ്ഥലത്തെത്തി പുലിയുടെ മൃതദേഹം പരിശോധന നടത്തിയത്. ചത്ത പുലിയെ പെരിയാര്‍ ടൈഗര്‍ റിസര്‍വ്വിലെത്തിച്ച്‌ പോസ്റ്റ്മോര്‍ട്ടനടപടികള്‍ക്ക് ശേഷമേ മരണകാരണം കണ്ടെത്തുവാന്‍ കഴിയു എന്ന് അധികൃതര്‍ അറിയിച്ചു. പുലിയുടെ ദേഹത്ത് മുറിപ്പാടുകള്‍ ഒന്നുമില്ലെന്ന് ഉദ്യോഗസ്ഥര്‍ കൂട്ടിച്ചേര്‍ത്തു.
