കൊച്ചി: യുവാവിനെ കടത്തിക്കൊണ്ടുപോയി മര്ദിച്ച സംഭവത്തില് ഗുണ്ടാനേതാവ് കണ്ടെയ്നര് സാബു അറസ്റ്റില്. 22ന് വൈകീട്ട് 8.30ഓടെ എം.ജി റോഡിലാണ് കേസിനാസ്പദമായ സംഭവം. പ്രതികള് യുവാവിനെ കാറില് തട്ടിക്കൊണ്ടുപോയി മര്ദിക്കുകയായിരുന്നു. കേസിലെ ഒന്നാം പ്രതിയായ കിരണും പരാതിക്കാരനും ബന്ധുക്കളാണ്. ഇവര് തമ്മിലുള്ള ഏറെനാളായുള്ള കുടുംബ പ്രശ്നമാണ് സംഭവത്തിന് പിന്നില്.
കഴിഞ്ഞ വെള്ളിയാഴ്ച ഒന്നാം പ്രതി കിരണ് തന്റെ പഴയ സുഹൃത്തായ കണ്ടെയ്നര് സാബുവിനെയും സുഹൃത്തുക്കളെയും വിളിച്ചുവരുത്തുകയായിരുന്നു. തുടര്ന്ന് പരാതിക്കാരനെ വിളിച്ച് സ്ഥലം മനസ്സിലാക്കി. വൈകീട്ട് ഏഴുമണിയോടെ എം.ജി റോഡിലുള്ള ഹോട്ടലില്നിന്നും പരാതിക്കാരനെ കണ്ടെയ്നര് സാബുവും കിരണും സംഘവും ചേര്ന്ന് കാറില് കയറ്റി എസ്.ആര്.എം റോഡിലുള്ള മുറിയില് കൊണ്ടുപോയി മര്ദിക്കുകയായിരുന്നു. തുടര്ന്ന് പ്രതികള് ഒളിവില് പോയി.
പരാതിക്കാരന് പിന്നീട് സുഹൃത്തുക്കളെ വിളിച്ചുവരുത്തി പോലീസില് പരാതി നല്കുകയായിരുന്നു. പോലീസിന്റെ അന്വേഷണത്തില് തട്ടിക്കൊണ്ടുപോയ വാഹനത്തിന്റെ ഉടമയും സംഘത്തില് ഉള്പ്പെട്ട ആളുമായ പച്ചാളം ചെറുപുനത്തില് മെറിലാക് മെഷല് ലൂയിസ്(36) അറസ്റ്റിലായി. കോടതിയില് ഹാജരാക്കിയ ഇയാളെ കോടതി റിമാന്ഡ് ചെയ്തു.തുടര്ന്ന് തിരുവല്ല പൊലീസിന്റെ സഹായത്തോടെ കണ്ടെയ്നര് സാബുവിനെ കസ്റ്റഡിയിലെടുത്തു. മറ്റു പ്രതികള്ക്കായുള്ള അന്വേഷണം ഊര്ജിതമാക്കിയതായി പൊലീസ് പറഞ്ഞു.