ലോക്സഭാ തിരഞ്ഞെടുപ്പില്‍ സംസ്ഥാനത്ത് മികച്ച വിജയം നേടാൻ കഴിഞ്ഞെങ്കിലും കോണ്‍ഗ്രസ് സംഘടനാ സംവിധാനത്തിലെ പോരായ്മകള്‍ അക്കമിട്ട് നിരത്തി കോണ്‍ഗ്രസ് വാർ റൂം – സുനില്‍ കനുഗോലു റിപ്പോർട്ട്. 10 ജില്ലകളില്‍ തിരഞ്ഞെടുപ്പ് പ്രവർത്തനത്തില്‍ വലിയ അപചയം സംഭവിച്ചതായാണ് റിപ്പോർട്ട്. തിരുവനന്തപുരം, കൊല്ലം, ആലപ്പുഴ, പത്തനംതിട്ട, കോട്ടയം, ഇടുക്കി, തൃശൂർ, പാലക്കാട്, വയനാട്, കണ്ണൂർ ജില്ലകളിലാണ് സംഘടനാതലത്തില്‍ വീഴ്ചകള്‍ സംഭവിച്ചതായി സംഘം കണ്ടെത്തിയിരിക്കുന്നത്.
ഈ ജില്ലകളിലെ ഡി.സി.സി. പ്രസിഡന്റുമാരെ മാറ്റണമെന്ന് റിപ്പോർട്ടില്‍ നിർദേശമുള്ളതായാണ് കോണ്‍ഗ്രസ് വൃത്തങ്ങളില്‍നിന്നു ലഭിക്കുന്ന സൂചന. ഉപതിരഞ്ഞെടുപ്പുകള്‍ക്ക് ശേഷം ജില്ലാ നേതൃത്വങ്ങളില്‍ മാറ്റമുണ്ടായേക്കുമെന്നുള്ള സൂചനകളാണ് പുറത്തുവരുന്നത്. കോണ്‍ഗ്രസ് ബൂത്ത് കമ്മിറ്റികളില്‍ പകുതിയും നിർജീവമായിരുന്നെന്നും കണ്ടെത്തലുണ്ട്. കെ.പി.സി.സി. ഭാരവാഹികളുടെ പ്രവർത്തനങ്ങളെക്കുറിച്ചും റിപ്പോർട്ടില്‍ വിമർശനമുണ്ട്.
-->
ബ്ലോക്ക്, മണ്ഡലം പുനഃസംഘടന പരാജയം: കോണ്‍ഗ്രസില്‍ തിരഞ്ഞെടുപ്പിനു മുന്നേ നടന്ന ബ്ലോക്ക്, മണ്ഡലം പുനഃസംഘടന പരാജയമായിരുന്നെന്നും റിപ്പോർട്ടിലുണ്ട്. ഗ്രൂപ്പ് അടിസ്ഥാനത്തില്‍ നിയമിച്ചവർ പലരും സംഘടന പ്രവർത്തനത്തില്‍ വീഴ്ച വരുത്തിയെന്നാണ് കണ്ടെത്തല്‍. ഇവരെ മാറ്റുന്നുതും പരിഗണിക്കണമെന്നും റിപ്പോർട്ടില്‍ നിർദേശമുണ്ട്.
ബൂത്ത് കമ്മിറ്റികളില്‍ പകുതിയും നിർജീവം: സംസ്ഥാനത്ത് 25,177 ബൂത്ത് കമ്മിറ്റികള്‍ ഉള്ളതില്‍ പകുതിയിലും കോണ്‍ഗ്രസിന് ആളില്ലെന്ന ഞെട്ടിക്കുന്ന വിവരമായിരുന്നു വാർ റൂം അന്വേഷണത്തില്‍ കണ്ടെത്തിയത്. തിരുവനന്തപുരം, ആറ്റിങ്ങള്‍ മണ്ഡലങ്ങളിലും രാഹുല്‍ ഗാന്ധി മത്സരിച്ച വയനാട്ടിലും കോണ്‍ഗ്രസ് ജയിച്ച മറ്റ് മണ്ഡലങ്ങളിലും ഇത്തരത്തില്‍ കോണ്‍ഗ്രസിന്റെ ബൂത്തുകമ്മിറ്റികള്‍ നിർജീവമാണെന്നുമുള്ള റിപ്പോർട്ട് നേതൃത്വത്തിന് കൈമാറുകയും ചെയ്തിരുന്നു. ജില്ലാ കോണ്‍ഗ്രസ് കമ്മിറ്റികളോട് ബൂത്തുകമ്മിറ്റികള്‍ സജീവമാക്കണമെന്ന മുന്നറിയിപ്പുകള്‍ നല്‍കിയിട്ടും തിരഞ്ഞെടുപ്പായിട്ടും പല ജില്ലാ നേതൃത്വവും അത് ഗൗരവമായി കണ്ടില്ലെന്നാണ് വിമർശനം.
സംഘടനാ പ്രവർത്തനത്തിലുണ്ടായ ഗുരുതര വീഴ്ചകള്‍ പരിഗണിച്ച്‌ ജില്ലാ നേതൃത്വത്തില്‍ മാറ്റങ്ങള്‍ വരുത്തി സംഘടനയെ താഴെ തട്ടില്‍ ഉടച്ചുവാർക്കുന്നതിനുള്ള നടപടികള്‍ സ്വീകരിക്കണമെന്നാണ് വാർ റൂം – സുനില്‍ കനഗോലു റിപ്പോർട്ടിലെ നിർദേശം. യുവതയുടെ പ്രാതിനിധ്യവും ഉറപ്പുവരുത്തണമെന്നും നിർദേശമുണ്ട്.
വോട്ടു നിലയില്‍ വലിയ കുറവ്: തിരുവനന്തപുരം ലോക്സഭാ മണ്ഡലത്തിലെ മൂന്നു നിയമസഭാമണ്ഡലങ്ങളിലും ബി.ജെ.പിയായിരുന്നു മുന്നിലെത്തിയത്. ഇത് കോണ്‍ഗ്രസിന് വലിയ തിരിച്ചടി തന്നെയാണെന്ന് തിരഞ്ഞെടുപ്പ് അവലോകന യോഗങ്ങളില്‍ വിലയിരുത്തപ്പെട്ടിട്ടുണ്ട്. സമാന രീതിയില്‍ വിവിധ ജില്ലകളില്‍ നിയോജക മണ്ഡലാടിസ്ഥാനത്തിലുള്ള കണക്കുകളില്‍ വോട്ടുനിലയില്‍ വലിയ കുറവ് വന്നിട്ടുണ്ട്. രാജ്യത്ത് കോണ്‍ഗ്രസിന് 4.63% വോട്ടുകള്‍ വർധിച്ചിട്ടുണ്ട്. എന്നാല്‍ കേരളത്തില്‍ അഞ്ചു ശതമാനത്തോളം വോട്ട് കുറയുകയാണ് ചെയ്തിട്ടുള്ളത്. ഇതും പരിശോധിക്കപ്പെടുമ്ബോള്‍ സംഘടനാപരമായ വീഴ്ചയിലെത്തി ചേരുമെന്നാണ് കോണ്‍ഗ്രസ് വൃത്തങ്ങള്‍ പറയുന്നത്
ഇവിടെ ക്ലിക്ക് ചെയ്ത് ഞങ്ങളുടെ യൂട്യൂബ് ചാനൽ സബ്സ്ക്രൈബ് ചെയ്യുക
