കോട്ടയം തോറ്റ്, രാജ്യസഭയും നിഷേധിച്ചാൽ ജോസ് കെ മാണിയും ബിജെപി പാളയത്തിലേക്ക്? എൻഡിഎയുടെ കണക്കുകൂട്ടലുകൾ ഇങ്ങനെ

കോട്ടയം പാർലമെന്റ് തിരഞ്ഞെടുപ്പ് കേരള കോൺഗ്രസ് ജോസ് വിഭാഗത്തിനും പാർട്ടി ചെയർമാൻ ജോസ് കെ മാണിക്കും അതിനിർനായകമാണ്. കോട്ടയം ജില്ലയിൽ തങ്ങൾക്കുണ്ട് എന്ന് അവകാശപ്പെടുന്ന ശക്തി ഇടതുമുന്നണിക്ക് തെളിയിച്ചു കൊടുക്കേണ്ട ബാധ്യതയും വെല്ലുവിളിയും ആണ് ജോസിനും കൂട്ടർക്കും ഉള്ളത്. 2019ലെ തെരഞ്ഞെടുപ്പിൽ ഏറ്റവും പ്രതികൂല സാഹചര്യങ്ങളിൽ വിഎൻ വാസവൻ നേടിയ വോട്ട് വിഹിതം സിപിഎമ്മിന്റെയും ഇടതുമുന്നണിയുടെയും അടിയുറച്ച വോട്ടുകളാണ്. അതിനു മുകളിലേക്ക് നേടുന്ന വോട്ടുകൾ മാത്രമേ ഇടതുമുന്നണി ജോസ് കെഎം മാണി വിഭാഗത്തിൻറെ വോട്ടായി കണക്കാക്കുകയുള്ളൂ.

2019 വി എൻ വാസവൻ അരിവാൾ ചുറ്റിക നക്ഷത്രം ചിഹ്നത്തിൽ മത്സരിച്ചപ്പോൾ കോട്ടയത്ത് സമാഹരിച്ചത് 314787 (34.58%) വോട്ടുകളാണ്. അന്ന് യുഡിഎഫ് സ്ഥാനാർഥിയായി മത്സരിച്ച തോമസ് ചാഴികാടന് ലഭിച്ചത് 421046 (46.26%) വോട്ടുകളും. അതായത് വാസവൻ സമാഹരിച്ചതിനെക്കാൾ ഒരു ലക്ഷത്തി പതിനായിരത്തോളം വോട്ടുകൾ കേരള കോൺഗ്രസ് പാർട്ടിക്ക് നേടാൻ കഴിഞ്ഞെങ്കിൽ മാത്രമേ കോട്ടയത്ത് വിജയം സാധ്യമാകൂ. ശബരിമല വിഷയം പോലെയുള്ള വിവാദങ്ങളില്ലെങ്കിലും സർക്കാർ വിരുദ്ധത അതിൻറെ പാരമ്യത്തിലാണ് കേരളത്തിൽ. അതിനാൽ തന്നെ തോമസ് ചാഴികാടന് വിജയം നേടുക എന്ന് പറയുന്നത് ഏകദേശം അസാധ്യമായ കാര്യമാണ്.