എം ഡി എം എയുമായി യുവതിയെയും യുവാവിനെയും പൊലീസ് അറസ്റ്റുചെയ്തു. തൃശൂർ സ്വദേശിനിയും ഇരുപത്തിനാലുകാരിയുമായ ശ്രുതി, എറണാകുളം സ്വദേശിയും ഇരുപത്തെട്ടുകാരനുമായ മുഹമ്മദ് റോഷൻ എന്നിവരാണ് പിടിയിലായത്. കൊച്ചി കറുകപ്പള്ളിയില്‍ ഇവർ താമസിക്കുന്ന ഫ്ളാറ്റില്‍ പൊലീസ് നടത്തിയ പരിശോധനയിലാണ് ഇരുവരും പിടിയിലായത്. 57 ഗ്രാം എം ഡി എം എയാണ് ഇവിടെനിന്ന് പിടിച്ചെടുത്തത്.
ഇവർ ഏറെനാളായി മയക്കുമരുന്ന് കച്ചവടം നടത്തിവരികയായിരുന്നു എന്നാണ് പൊലീസ് സംശയിക്കുന്നത്. സംഭവത്തെക്കുറിച്ച്‌ കൂടുതല്‍ അന്വേഷണം ആരംഭിച്ചു. മയക്കുമരുന്ന് വിതരണശൃംഖലയിലെ കണ്ണിയായ പള്ളുരുത്തി എസ്.ഡി.പി.വൈ റോഡില്‍ ആസിഫിനെ (23) മട്ടാഞ്ചേരി അസി.കമ്മിഷ‌ണർ കെ.ആർ. മനോജ്, ഇൻസ്പെക്ടർ എ.വി. ബിജു എന്നിവരുടെ നേതൃത്വത്തില്‍ കഴിഞ്ഞദിവസം അറസ്റ്റുചെയ്തിരുന്നു. കഴിഞ്ഞ ഡിസംബറില്‍ അഞ്ചുകിലോ കഞ്ചാവുമായി രാകേഷ് എന്നയാളെ മട്ടാഞ്ചേരി പൊലീസ് അറസ്റ്റുചെയ്തിരുന്നു.
ഇയാളെ ചോദ്യംചെയ്തതില്‍നിന്നാണ് മയക്കുമരുന്ന് വിതരണ ശൃംഖലയിലെ ആസിഫിനെ സംബന്ധിച്ച്‌ വിവരം ലഭിക്കുന്നത്. തിങ്കളാഴ്ച രാത്രി തോപ്പുംപടി ചൂലേഴം ഭാഗത്തുനിന്ന് ഇയാളെ പിടികൂടുകയായിരുന്നു.എസ്.ഐമാരായ ജിമ്മി ജോസ്, ശിവൻകുട്ടി, കെ.കെ. മധുസൂദനൻ, സീനിയർ സി.പി.ഒമാരായ എഡ്വിൻ റോസ്, എ.ടി. ശ്രീകുമാർ, ഹരി പ്രസാദ്, സി.പി.ഒ ഫെബിൻ എന്നിവരും പൊലീസ് സംഘത്തിലുണ്ടായിരുന്നു.
