നെയ്‌ച്ചോറും ചിക്കനും കൂട്ടി ഒരു പിടിപിടിച്ചാല്‍…ഭക്ഷണപ്രേമികളുടെ ഏറ്റവും ഇഷ്ടപ്പെട്ട വിഭവം ഏതെന്ന് ചോദിച്ചാല്‍ നെയ്‌ച്ചോറെന്ന് നിസംശയം പറയാം. കിടുക്കാച്ചി നെയ്‌ച്ചോറിന് വേണ്ടി കിലോമീറ്ററുകള്‍ സഞ്ചരിക്കാൻ മടിയില്ലാത്തവർ തന്നെയുണ്ട്. ചിക്കനും ബീഫുമൊന്നുമല്ലാതെ ഇഷ്ടപ്പെട്ടതെന്തും ഇതിനൊപ്പം ചേർത്ത് കഴിക്കാം എന്ന പ്രത്യേകതയും ഉണ്ട്.
അങ്ങനെയുള്ള നെയ്‌ച്ചോറില്‍ അല്പം വെറൈറ്റി നടപ്പാക്കുന്ന വീഡിയോയാണ് ഇപ്പോള്‍ സോഷ്യല്‍ മീഡിയയില്‍ തകർത്തോടുന്നത്. നെയ്‌ച്ചോറിന്റെ നിറമാണ് വീഡിയോയുടെ ഹൈലൈറ്റ്. നിറം നീലയാണ്.’ദി കുക്കിംഗ് അമ്മ’ എന്ന ഇൻസ്റ്റഗ്രാം പേജിലാണ് വീഡിയോ പ്രത്യക്ഷപ്പെട്ടത്. മണിക്കൂറുകള്‍ക്കകം ഇത് വെൈറലാവുകയും ചെയ്തു. നീല നെയ്‌ച്ചോറിന്റെ പാചകക്കുറിപ്പും വീഡിയോയ്‌ക്കൊപ്പം പാേസ്റ്റുചെയ്തിട്ടുണ്ട്.
സാധാരണ നെയ്‌ച്ചോറുണ്ടാക്കാൻ ഉപയോഗിക്കുന്ന ചേരുവകളാണ് ഇതിലും ഉപയോഗിക്കുന്നത്. പിന്നെങ്ങനെ നിറം നീലയായെന്നല്ലേ സംശയം. ശംഖുപുഷ്പം എന്നാണ് അതിനുള്ള ഉത്തരം. ശംഖുപുഷ്പപത്തിന്റെ ഇതളുകള്‍ നെയ്‌ച്ചോറിനുള്ള അരിയോടൊപ്പം വേവിച്ചാല്‍ മാത്രം മതി.ശംഖുപുഷ്പത്തിന്റെ പൂക്കള്‍ നന്നായി കഴുകിയെടുക്കുന്ന രംഗത്തോടെയാണ് വീഡിയോ തുടങ്ങുന്നത്. പൂക്കളുടെ ഇതളുകള്‍ വേർപെടുത്തിയശേഷം അത് ചട്ടിയില്‍ തിളയ്ക്കുന്ന വെള്ളത്തിലേക്ക് ഇടുന്നു. അല്പം കഴിയുന്നതോടെ വെള്ളം നല്ല നീല നിറമാകും. ഇതോടെ പൂക്കള്‍ വെള്ളത്തില്‍ നിന്ന് കോരിമാറ്റിയശേഷം അതിലേക്ക് കഴുകി വൃത്തിയാക്കിയ അരി ഇടുന്നു. അല്പം കഴിഞ്ഞതോടെ അരിയുടെ നിറവും നീലയാകും. അതിലേക്ക് നറുനെയ്‌ ചേർത്തിളക്കി നെയ്യില്‍ വറുത്ത കിസ്മിസും ചേർക്കുന്നതോടെ ആവി പറക്കുന്ന നീല സൂപ്പർ നെയ്‌ച്ചോറ് റെഡി.
