
യൂട്യൂബിലെ പ്രശസ്ത വ്ളോഗറായ സ്വാതി കൃഷ്ണ ലഹരിമരുന്നുമായി പിടിയിലായ സംഭവത്തില് കൂടുതല് വിവരങ്ങള് പുറത്ത്. കൊച്ചി എക്സൈസിന്റെ ഏറെനാളായുള്ള നിരീക്ഷണത്തിനൊടുവിലാണ് 28കാരിയായ സ്വാതിക്ക് പിടിവീണത്. എറണാകുളം കാലടിയില് നിന്നാണ് ലഹരി പദാര്ത്ഥങ്ങളുമായി കുന്നത്തുനാട് സ്വദേശിയായ സ്വാതി കൃഷ്ണ എക്സൈസിന്റെ പിടിയിലായത്.
കോളജ് വിദ്യാര്ഥികള്ക്കിടയിലടക്കം സിന്തറ്റിക് ലഹരിമരുന്നുകളടക്കം എത്തിച്ച് വില്പന നടത്തുന്ന സംഘത്തിലെ കണ്ണിയാണ് സ്വാതിയെന്നാണ് വ്യക്തമാകുന്നത്. ഇവരില് നിന്നും മൂന്ന് ഗ്രാം എം ഡി എം എ യും 20 ഗ്രാം കഞ്ചാവും പിടികൂടിയതായി എക്സൈസ് ഉദ്യോഗസ്ഥര് വ്യക്തമാക്കി.