പാലായിലെ സിപിഎം നിയന്ത്രണത്തിലുള്ള സഹകരണ ബാങ്കുകളെ ലക്ഷ്യമിട്ട് കേരള കോൺഗ്രസ് മാണി ഗ്രൂപ്പ് നീക്കം: പാർലമെന്റ് തിരഞ്ഞെടുപ്പിന് മുന്നേ കളം മാറി യുഡിഎഫിലെത്താനുള്ള കരുനീക്കമോ? രാഷ്ട്രീയ വൃത്തങ്ങളിൽ ചർച്ച മുറുകുന്നു.

കിഴതടിയൂരും, കടനാടും ഉയർത്തിക്കാട്ടുമ്പോഴും വലവൂർ ബാങ്കിൻറെ കാര്യത്തിൽ മൗനം: പതിറ്റാണ്ടുകളായി കേരള കോൺഗ്രസ് എം നിയന്ത്രണത്തിലുള്ള വലവൂർ സഹകരണ ബാങ്കിലും വ്യാപക ക്രമക്കേടുകൾ ആണ് നടന്നിട്ടുള്ളത്. എന്നാൽ പാലായിലെ മറ്റ് ബാങ്കുകളുടെ ക്രമക്കേടുകൾ ചൂണ്ടിക്കാട്ടിരിക്കുന്ന കേരള കോൺഗ്രസ് വലവൂർ ബാങ്കിലെ ക്രമക്കേടുകളെ കുറിച്ച് മൗനം പാലിക്കുകയാണ്. കെഎം മാണിയുടെയും ജോസ് കെ മാണിയുടെയും ഏറ്റവും വിശ്വസ്തനായ പാലാ മുൻനിയോജക മണ്ഡലം പ്രസിഡൻറ് ഫിലിപ്പ് കുഴികുളം ആണ് വലവൂർ ബാങ്കിൻറെ തലപ്പത്തുള്ളത്. സ്വാഭാവികമായും കേരള കോൺഗ്രസ് മറ്റു ബാങ്കുകളെ ആക്രമിക്കുമ്പോൾ വലവൂർ വിഷയം ചൂണ്ടിക്കാട്ടി അവർക്കെതിരെ സിപിഎം ഉൾപ്പെടെ രംഗത്തിറങ്ങാനുള്ള സാധ്യതകൾ പോലും അവഗണിച്ചുകൊണ്ട് ഇത്തരം ഒരു നീക്കം നടത്തുന്നതാണ് പിന്നിൽ മറ്റ് അജണ്ടകൾ ഉണ്ടോ എന്ന സംശയം ബലപ്പെടുത്തുന്നത്.

രാഷ്ട്രീയ നീക്കങ്ങൾ: സാധ്യതകൾ ഇങ്ങനെ

കോട്ടയം യുഡിഎഫിന്റെ തട്ടകമാണ്. അതുകൊണ്ടുതന്നെ ഭേദപ്പെട്ട ഒരു സ്ഥാനാർത്ഥി ഉണ്ടായാൽ കേരള കോൺഗ്രസ് ജോസ് വിഭാഗത്തിന് കോട്ടയം പാർലമെന്റ് സീറ്റിൽ പരാജയം ഏതാണ്ട് ഉറപ്പിക്കാം. ഉടനടി യുഡിഎഫിൽ എത്തി കോട്ടയം തിരിച്ചുപിടിക്കാൻ കഴിയില്ല എന്ന് കേരള കോൺഗ്രസിന് ഉത്തമ ബോധ്യമുണ്ട്. അതുകൊണ്ടുതന്നെ ഒരുപക്ഷേ കോട്ടയത്തെ പരാജയത്തിന്റെ പേരിൽ ഇടതുമുന്നണിയെ തള്ളിപ്പറയാനാവും കേരള കോൺഗ്രസ് ഉദ്ദേശിക്കുക. അങ്ങനെ പാർലമെന്റ് തിരഞ്ഞെടുപ്പോട് കൂടി ആരംഭിക്കുന്ന പൊട്ടിത്തെറി മുതലെടുത്ത് തദ്ദേശ തെരഞ്ഞെടുപ്പിന് അസംബ്ലി തിരഞ്ഞെടുപ്പിനു മുന്നേ യുഡിഎഫിൽ സുഗമമായി കയറിക്കൂടുക എന്നതാവും ഒരുപക്ഷേ കേരള കോൺഗ്രസ് അജണ്ട. ജോസഫ് ഗ്രൂപ്പിൽ നിന്ന് കോട്ടയം സീറ്റ് കോൺഗ്രസ് ഏറ്റെടുത്താൽ സ്വാഭാവികമായും പിജെ ജോസഫും, കോൺഗ്രസും തമ്മിലുള്ള ബന്ധത്തിൽ ഇടർച്ചയുണ്ടാകും. ഇതും താങ്ങൾക്ക് അനുകൂലമാകും എന്ന വിലയിരുത്തൽ കേരള കോൺഗ്രസിന് ഉണ്ടാവാൻ ഇടയുണ്ട്.