തിരഞ്ഞെടുപ്പ് പ്രചരണത്തിനായി മേജർ ആർച്ച് ബിഷപ്പിന് ഒപ്പമുള്ള വീഡിയോ ദുരുപയോഗം ചെയ്ത് തോമസ് ചാഴികാടൻ; പ്രചരിപ്പിക്കുന്നത് സ്വകാര്യ ചടങ്ങിൽ റാഫേൽ തട്ടിൽ പിതാവിന് ഒപ്പം പങ്കെടുത്ത ദൃശ്യങ്ങൾ: തിരഞ്ഞെടുപ്പ് കമ്മീഷൻ ഗൗരവമായി കണക്കിലെടുത്താൽ സ്ഥാനാർത്ഥിക്ക് അയോഗ്യത ഭീഷണി- വിവാദ വീഡിയോ കാണാം.

തോമസ് ചാഴികാടൻ ക്നാനായ സമുദായ അംഗമാണ്. ക്നാനായ വോട്ടുകളുടെ ഏകീകരണം ചാഴികാടനെ വിജയിപ്പിക്കും എന്നുള്ള കേരളാ കോൺഗ്രസ് കേന്ദ്രങ്ങളുടെ ആദ്യഘട്ട പ്രചരണം മറ്റ് സഭാ വിശ്വാസികൾക്ക് നീരസം ഉണ്ടാക്കി എന്ന തിരിച്ചറിവിലാണ് ഇപ്പോൾ മേജർ ആർച്ച് ബിഷപ്പിന്റെ ദൃശ്യങ്ങൾ ദുരുപയോഗം ചെയ്ത് വോട്ടു പിടുത്തം എന്നാണ് അനുമാനിക്കാവുന്നത്. മതപരമായ ചിഹ്നങ്ങൾ തിരഞ്ഞെടുപ്പ് പ്രചരണത്തിന് ഉപയോഗിക്കരുതെന്ന് തിരഞ്ഞെടുപ്പ് കമ്മീഷന്റെ കർശന നിർദേശം നിലനിൽക്കുമ്പോഴാണ് വർഗീയത പ്രചരിപ്പിച്ചുള്ള ഈ വോട്ട് പിടുത്തം എന്നത് ഗൗരവതരമായ പ്രശ്നമാണ്.

സഭയുമായി ഏറ്റവും അഗാധമായ ബന്ധം സൂക്ഷിച്ചിരുന്ന കെഎം മാണി പോലും സഭാ പിതാക്കന്മാരെ പ്രത്യക്ഷ രാഷ്ട്രീയത്തിലേക്ക് ഒരിക്കലും ഇത്തരത്തിൽ വലിച്ചിഴച്ചിരുന്നില്ല. യുഡിഎഫിന് മേൽകൈ ഉള്ള മണ്ഡലത്തിൽ വലിയ തിരിച്ചടി തങ്ങൾ നേരിടുമെന്ന കേരള കോൺഗ്രസിന്റെ തിരിച്ചറിവ് ആവാം ഇത്തരത്തിൽ അസാന്മാർഗികമായ തന്ത്രങ്ങൾ ആദ്യഘട്ടത്തിൽ തന്നെ സ്വീകരിക്കുവാൻ അവരെ പ്രേരിപ്പിക്കുന്നത് എന്ന് യുഡിഎഫ് വൃത്തങ്ങൾ ചൂണ്ടിക്കാട്ടി.

പിതാവിന്റെ ദൃശ്യങ്ങൾ ദുരുപയോഗം ചെയ്തതു മാത്രമല്ല ക്രിസ്തുമത ചിഹ്നങ്ങളും വീഡിയോയിൽ വളരെ വ്യക്തമായി ഉപയോഗിക്കുന്നുണ്ട്. തിരഞ്ഞെടുപ്പ് കമ്മീഷന്റെ ശ്രദ്ധയിൽപ്പെട്ടാൽ സ്ഥാനാർത്ഥിക്ക് ആയോഗ്യത കൽപ്പിക്കുന്നത് ഉൾപ്പെടെയുള്ള കടുത്ത നടപടികൾ സ്വീകരിക്കാവുന്ന കുറ്റമാണ് ഇത്. വരും ദിവസങ്ങളിൽ യുഡിഎഫ്, എൽഡിഎ മുന്നണികൾ ഇത് ചൂണ്ടിക്കാട്ടി ഔദ്യോഗിക പരാതി കൊടുക്കാനും സാധ്യതകൾ നിലനിൽക്കുന്നു.