പുതുവത്സര ദിനത്തില് സംസ്ഥാനത്ത് വിവിധയിടങ്ങളിലുണ്ടായ വാഹനാപകടങ്ങളിലായി പൊലിഞ്ഞത് 10 ജീവനുകള്. തിരുവനന്തപുരം, അടിമാലി, ആലപ്പുഴ, ഏനാത്ത്, തിരുവല്ല, കോഴിക്കോട്, കൊയിലാണ്ടി എന്നിവിടങ്ങളില് നടന്ന വാഹനാപകടങ്ങളിലാണ് ഇത്രയും പേര്ക്ക് ജീവന് നഷ്ടമായത്. ആലപ്പുഴയില് പൊലീസ് വാഹനത്തില് ബൈക്കിടിച്ച് രണ്ടു യുവാക്കളാണ് മരിച്ചത്. തിരുവനന്തപുരത്ത് ബൈക്ക് നിയന്ത്രണം വിട്ടുമറിഞ്ഞ് സൈനികന് ജീവന് നഷ്ടമായി.
ആലപ്പുഴയില് ജില്ലാ ക്രൈം റേക്കോര്ഡ്സ് ബ്യൂറോ ഡി.വൈ.എസ്.പിയുടെ വാഹനത്തില് ബൈക്കിടിച്ചാണ് അപകടമുണ്ടായത്. കോട്ടയം സ്വദേശികളായ ജസ്റ്റിന്, അലക്സ് എന്നിവരാണ് മരിച്ചത്. പത്തനംതിട്ടയില് രണ്ട് വാഹനാപകടങ്ങളിലായി മൂന്ന് പേര്ക്ക് ജീവന് നഷ്ടമായി. തിരുവല്ല റെയില്വേ സ്റ്റേഷന് സമീപം ബൈക്കും ടാങ്കര് ലോറിയും കൂട്ടിയിടിച്ച് ചിങ്ങവനം സ്വദേശി ശ്യാം, കുന്നന്താനം സ്വദേശി അരുണ് കുമാര് എന്നിവരാണ് മരിച്ചത്. അടൂര് ഏനാത്ത് നിയന്ത്രണം തെറ്റിയ ബൈക്ക് പോസ്റ്റിലിടിച്ച് ഏനാത്ത് സ്വദേശിയായ തുളസീധരന് മരിച്ചു.
തിരുവനന്തപുരത്ത് രണ്ട് വ്യത്യസ്ത അപകടങ്ങളില് രണ്ടു ജീവനുകളാണ് പൊലിഞ്ഞത്. കിളിമാനൂരില് ബൈക്കിന്റെ നിയന്ത്രണം വിട്ടാണ് സൈനികനായ ആരോമല് (25) മരിച്ചത്. ഉച്ചയോടെ മേല്പ്പുറത്ത് കാര് മതിലില് ഇടിച്ച് ഒറ്റശേഖരമംഗലം സ്വദേശി വിജിന്ദാസും മരിച്ചു. കഴിഞ്ഞദിവസം കുളച്ചലിലെ കേറ്ററിങ് സര്വീസ് കഴിഞ്ഞ് ഇന്ന് രാവിലെ വീട്ടിലേക്ക് തിരിച്ചുവരവെയാണ് അപകടമുണ്ടായത്.
ഇടുക്കി അടിമാലിയില് ബസ് മറിഞ്ഞാണ് ഒരു വിദ്യാര്ഥി മരിച്ചത്. മലപ്പുറം സ്വദേശിയായ മില്ഹാജാണ് മരിച്ചത്. വളാഞ്ചേരി റീജ്യണല് കോളജിലെ വിദ്യാര്ഥികള് സഞ്ചരിച്ച ടൂറിസ്റ്റ് ബസാണ് പുലര്ച്ചെ ഒന്നരയോടെ അപകടത്തില്പ്പെട്ടത്. 70 അടി താഴ്ചയിലേക്ക് മറിഞ്ഞുണ്ടായ അപകടത്തില് 40ലേറെ വിദ്യാര്ഥികള്ക്ക് പരിക്കേല്ക്കുകയും ചെയ്തു.
കോഴിക്കാട് കൊയിലാണ്ടിയില് ബസ് ഇടിച്ച് നെല്യാളി സ്വദേശി ശ്യമള (65)യ്ക്ക് ജീവന് നഷ്ടമായി. ഇന്നു രാവിലെ പുതിയ ബസ് സ്റ്റാന്്റിന് സമീപമായിരുന്നു അപകടം. കോഴിക്കോട് കക്കോടിയില് നടന്ന അപകടത്തില് ബൈക്ക് യാത്രികനാണ് ജീവന് നഷ്ടമായത്. കക്കോടി സ്വദേശി ചെറിയേടത്ത് ബിജുവാണ് മരിച്ചത്. പുതുവത്സരാഘോഷം കഴിഞ്ഞ് മടങ്ങുന്നതിനിടയിലായിരുന്നു അപകടം.
പത്തനംതിട്ട ളാഹയില് പമ്ബയില് നിന്നും തിരുവനന്തപുരത്തിന് പുറപ്പെട്ട കെ.എസ്.ആര്.ടി.സി ബസ് മറിഞ്ഞു. 15 ശബരിമല തീര്ഥാടകര്ക്ക് അപകടത്തില് പരിക്കേറ്റു. ആരുടെയും നില ഗുരുതരലമല്ല. വയനാട് പിണങ്ങോട് പുഴക്കലില് നിയന്ത്രണം വിട്ട വാന് കടയിലേക്ക് ഇടിച്ചു കയറി. പടിഞ്ഞാറത്ത സ്വദേശികള് സഞ്ചരിച്ച കാറാണ് അപകടത്തില്പ്പെട്ടത്. ആര്ക്കും കാര്യമായ പരിക്കുകളില്ല. കടയുടെ ഒരു ഭാഗം പൂര്ണമായി തകര്ന്നു.