തിരുവനന്തപുരം: കേരളാ സര്വകലാശാലയില് അസാധാരണ നടപടിയിലേക്ക് ഗവര്ണര് ആരിഫ് മുഹമ്മദ് ഖാന്. സര്വകലാശാലയിലെ 15 സെനറ്റ് അംഗങ്ങളെ ഗവര്ണര് പിന്വലിച്ചു. ചാന്സലറെന്ന നിലയില് താന് നോമിനേറ്റ് ചെയ്ത അംഗങ്ങളെയാണ് പിന്വലിച്ചത്. വിസി നിര്ണയ സമിതിയിലേക്കുള്ള കേരള സര്വകലാശാല പ്രതിനിധിയെ നിര്ദ്ദേശിക്കാന് ചേര്ന്ന സെനറ്റ് യോഗത്തില് നിന്നും വിട്ടു നിന്ന അംഗങ്ങളെയാണ് അയോഗ്യരാക്കിയത്.
പ്രതിനിധിയെ നിര്ദ്ദേശിക്കണമെന്ന ഗവര്ണറുടെ അന്ത്യശാസനത്തെ തുടര്ന്ന് കഴിഞ്ഞ ദിവസം ചേര്ന്ന സെനറ്റ് യോഗത്തില് നിന്ന് ഇടത് അംഗങ്ങള് കൂട്ടത്തോടെ വിട്ടുനിന്നിരുന്നു. 91 അംഗങ്ങളുള്ള സെനറ്റില് പങ്കെടുക്കാനെത്തിയത് വി.സി. ഡോ. വി.പി. മഹാദേവന് പിള്ളയടക്കം 13 പേര് മാത്രമായിരുന്നു.ഇതോടെ ക്വാറം തികയാതെ യോഗം പിരിഞ്ഞു. ഇതിന് പിന്നാലെയാണ് അസാധാരണ നടപടിയിലേക്ക് ഗവര്ണര് നീങ്ങിയത്.
അപൂര്വ്വമായി മാത്രം ഉപയോഗിക്കുന്ന നടപടിയിലേക്ക് ചാന്സിലര് ആരിഫ് മുഹമ്മദ് ഖാന് കടക്കുകയായിരുന്നു. രണ്ടും കല്പ്പിച്ചെന്ന വ്യക്തമായ സൂചന നല്കിയാണ് 15 അംഗങ്ങളെയും അയോഗ്യരാക്കി വിസിക്ക് ഗവര്ണര് കത്ത് നല്കിയത്. നാമനിര്ദേശം ചെയ്യപ്പെട്ടവരുടെ പ്രവര്ത്തനം തൃപ്തികരമല്ലെങ്കില് പിന്വലിക്കാന് ഗവര്ണര്ക്ക് അധികാരമുണ്ട്.