രാഷ്ട്രീയ പകപോക്കൽ ആരംഭിച്ച് ജോസ് കെ മാണി: കെപിസിസി പ്രസിഡൻറും, ഗവർണറുമായിരുന്ന കെ എം ചാണ്ടിയുടെ കൊച്ചു മകനെ കേസിൽ പെടുത്തി അറസ്റ്റ് ചെയ്യാൻ പാലാ പോലീസിൻറെ നാടകീയ നീക്കം ; കേസെടുത്തത് ജോസ് കെ മാണിയെ അപകീർത്തിപ്പെടുത്തി എന്ന സ്റ്റീഫൻ ജോർജിൻറെ പരാതിയിൽ.

ഐടി ആക്ടിലെ സെക്ഷൻ 67 എ ഉൾപ്പെടെ ജാമ്യമില്ലാ വകുപ്പുകൾ ചുമത്തിയാണ് കേസെടുത്തിരിക്കുന്നത്. ഏഴുവർഷംവരെ തടവും 10 ലക്ഷം രൂപ വരെ പിഴയും കിട്ടാവുന്ന വകുപ്പാണ് ഇത്. ഇതുകൂടാതെ ക്രിമിനൽ ഗൂഢാലോചന ഉൾപ്പെടെയുള്ള ഐപിസി വകുപ്പുകളും ചാർജ് ചെയ്തിട്ടുണ്ട്. മാണി സി കാപ്പനും ജോസ് കെ മാണിയും തമ്മിൽ വാശിയേറിയ മത്സരം നടന്ന പാലായിൽ മാണി സി കാപ്പനും, യുഡിഎഫിനും വേണ്ടി സാമൂഹ്യ മാധ്യമങ്ങളിൽ ഉൾപ്പെടെ തിരഞ്ഞെടുപ്പ് പ്രചരണം ഏകോപിപ്പിക്കാൻ മുൻനിരയിലുണ്ടായിരുന്ന വ്യക്തിയാണ് ഐടി വിദഗ്ധൻ കൂടിയായ സഞ്ജയ്. ഇതിൻറെ പ്രതികാര നടപടി എന്നവണ്ണം ആണ് കേസ് രജിസ്റ്റർ ചെയ്തതും അറസ്റ്റ് ചെയ്യാൻ നീക്കം നടത്തിയിരിക്കുന്നതും.

രാഷ്ട്രീയ ശത്രുക്കളെ അനാവശ്യമായി അപകീർത്തിപ്പെടുത്താനും, ഇവർക്കെതിരെ അടിസ്ഥാനരഹിതമായ കുറ്റങ്ങൾ ആരോപിച്ച് കേസ് എടുക്കുവാനും, കൽതുറങ്കിൽ അടയ്ക്കുവാനും ഉള്ള ആസൂത്രിത നീക്കമാണ് നടക്കുന്നത് എന്ന് സംശയമാണ് രാഷ്ട്രീയ കേന്ദ്രങ്ങളിൽ ഉയരുന്നത്. ഐടി ആക്ട് 67 എ എന്ന വകുപ്പ് പബ്ലിഷിംഗ് ആൻഡ് ട്രാൻസ്മിഷൻ ഓഫ് സെക്സ്ഷുവലി എക്സ്പ്ളിസിറ്റ് കണ്ടൻറ് എന്ന കുറ്റകൃത്യവും ആയി ബന്ധപ്പെട്ടതാണ്. തിരഞ്ഞെടുപ്പ് രംഗത്ത് ഇത്തരം യാതൊരു ആക്ഷേപങ്ങളും യുഡിഎഫ് കേന്ദ്രങ്ങൾ ജോസ് കെ മാണിക്കെതിരെ ഉപയോഗിച്ചിരുന്നില്ല എന്ന് യുഡിഎഫ് കേന്ദ്രങ്ങൾ വ്യക്തമാക്കിയിട്ടുണ്ട്. ഹൈക്കോടതിയിൽ തിരഞ്ഞെടുപ്പ് കേസ് ഫയൽ ചെയ്ത അവസരത്തിൽ പോലും ജോസ് കെ മാണിയോ, അദ്ദേഹത്തോട് അടുത്ത കേന്ദ്രങ്ങളോ ഇത്തരം ആരോപണങ്ങൾ ചൂണ്ടി കാണിച്ചിട്ടില്ല. അതു കൊണ്ടുതന്നെ പോലീസിനെ ഉപയോഗിച്ച് രാഷ്ട്രീയ പകപോക്കൽ നടത്തുവാനുള്ള നീക്കമാണ് നടത്തുന്നത് എന്ന വിമർശനമാണ് യുഡിഎഫ് ഉന്നയിക്കുന്നത്.

ഒരു പരാതി ലഭിച്ച് എഫ്ഐആർ ഇട്ടിട്ട് ഒരു മാസമായ കേസിൽ അദ്ദേഹത്തോട് നേരിട്ട് ഹാജരാകുവാൻ പോലും ആവശ്യപ്പെടാതെ തുടർ അവധി ദിവസങ്ങൾക്ക് തൊട്ടു തലേന്ന് പോലീസ് വീട്ടിലേക്ക് അപ്രതീക്ഷിതമായി കടന്നു കയറി നടത്തിയ നാടകീയ നീക്കങ്ങളാണ് സംശയം ജനിപ്പിക്കുന്നത്. ഇദ്ദേഹത്തിൻറെ പ്രായമായ മാതാപിതാക്കൾ മാത്രമാണ് ഈ അവസരത്തിൽ വീട്ടിൽ ഉണ്ടായിരുന്നത്. വീടിനുള്ളിൽ പോലീസ് പരിശോധന നടത്തിയെന്നും വിവരമുണ്ട്. എന്തെങ്കിലും പിടിച്ചെടുത്തിട്ട് ഉള്ളതായി സൂചനയൊന്നും ലഭ്യമായിട്ടില്ല.

നിയമപരമായും രാഷ്ട്രീയപരമായും ഈ വിഷയത്തെ കൈകാര്യം ചെയ്യുകയും, ജോസ് കെ മാണിയും കൂട്ടരും പ്രാവർത്തികമാക്കുന്ന അസഹിഷ്ണുതയുടെ രാഷ്ട്രീയം ജനങ്ങൾക്ക് മുന്നിൽ ബോധ്യപ്പെടുത്തുവാൻ ഉള്ള പ്രചാരണ പരിപാടികളുമായി മുന്നോട്ടു പോകും എന്ന് തന്നെയാണ് യുഡിഎഫ് വിഷയവുമായി ബന്ധപ്പെട്ട് കൈക്കൊണ്ടിട്ടുള്ള നിലപാട്. കോൺഗ്രസിലെ ഏറ്റവും ബഹുമാന്യനായ ഒരു നേതാവിൻറെ കുടുംബത്തിനെതിരെ നടത്തുന്ന രാഷ്ട്രീയ പകപോക്കൽ നീക്കങ്ങൾ യുഡിഎഫ് അതീവ ഗൗരവത്തോടെയാണ് കാണുന്നത്.