ന്യൂഡല്‍ഹി: 1988ല്‍ ദൂരദര്‍ശനില്‍ സംപ്രേഷണം ചെയ്ത ബി.ആര്‍. ചോപ്രയുടെ മഹാഭാരത് ടെലിവിഷന്‍ പരന്പരയില്‍ ഭീമനായി വേഷമിട്ട നടനും ഒളിന്പിക്സ് താരവും ബിഎസ്‌എഫ് ജവാനുമായിരുന്ന പ്രവീണ്‍കുമാര്‍ സോബ്തി (74)അന്തരിച്ചു. ഹൃദയാഘാതത്തെത്തുടര്‍ന്ന് ഇന്നലെ ഡല്‍ഹി അശോക് വിഹാറിലെ വസതിയില്‍ രാത്രി 10.30നായിരുന്നു അന്ത്യം.
അമൃത്‌സര്‍ സ്വദേശിയായ പ്രവീണ്‍കുമാര്‍ 20-ാം വയസിലാണ് ബിഎസ്‌എഫില്‍ ചേര്‍ന്നത്. ഏഷ്യന്‍ ഗെയിംസിലും കോമണ്‍വെല്‍ത്ത് ഗെയിംസിലും ഹാമര്‍ത്രോ, ഡിസ്കസ് ത്രോ ഇനങ്ങളില്‍ രണ്ടു സ്വര്‍ണവും വെള്ളിയും വെങ്കലവും ഉള്‍പ്പെടെ നാലു മെഡലുകള്‍ കരസ്ഥമാക്കി. അര്‍ജുന അവാര്‍ഡ് ജേതാവാണ്.
1966ലെ കോമണ്‍വെല്‍ത്ത് ഗെയിംസിലെ ആദ്യ വെള്ളി മെഡല്‍ സോബ്തിയുടേതാണ്. 1968ലും 72ലും ഒളിന്പിക്സില്‍ പങ്കെടുത്തു. അന്‍പതിലധികം സിനിമകളില്‍ സഹനടനായി വേഷമിട്ടു.
