മദ്യപിച്ച ശേഷം ആളുകള്‍ പൊതുസ്ഥലങ്ങളില്‍ വാക്കേറ്റവും ശല്യവും സൃഷ്ടിക്കുന്ന വീഡിയോകള്‍ സാമൂഹിക മാധ്യമങ്ങളില്‍ നിരന്തരം പ്രചരിക്കാറുണ്ട്. അടുത്തിടെ നടന്ന സമാനമായ ഒരു സംഭവത്തിന്റെ വീഡിയോ ഇപ്പോള്‍ സോഷ്യല്‍ മീഡിയയില്‍ വൈറലാവുകയാണ്. മദ്യപിച്ചെത്തിയ യുവതി സെക്യൂരിറ്റി ഗാർഡിനെ അസഭ്യം പറയുകയും മർദ്ദിക്കുകയും ചെയ്യുന്നതിന്റെ ദൃശ്യങ്ങളായിരുന്നു പ്രചരിച്ചത്.
തന്റെ കാമുകന് വേണ്ടി സെക്യൂരിറ്റി ഗാർഡ് ചാരപ്പണി നടത്തുന്നു എന്നാരോപിച്ചായിരുന്നു യുവതിയുടെ ആക്രമണം. സുഹൃത്തുക്കള്‍ ചേർന്ന് യുവതിയെ തടയാൻ ശ്രമിച്ചെങ്കിലും അവർ അക്രമാസക്ത ആകുകയായിരുന്നു. ഉത്തർപ്രദേശിലെ നോയിഡയില്‍ ആണ് സംഭവം. സംഭവത്തിൻ്റെ വീഡിയോ സോഷ്യല്‍ മീഡിയയില്‍ വൈറലായതോടെ നെറ്റിസണ്‍സിന്റെ ശ്രദ്ധ പിടിച്ചുപറ്റി.
1 മിനിറ്റ് 22 സെക്കൻഡ് ദൈർഘ്യമുള്ള വീഡിയോയില്‍ യുവതി സെക്യൂരിറ്റി ഗാർഡിന്റെ കോളറില്‍ പിടിച്ച് അടിയ്ക്കാൻ ശ്രമിക്കുന്നതും അയാളുടെ തൊപ്പി വലിച്ചെറിയുന്നതും കാണാം. കാമുകന് വേണ്ടി ചാരപ്പണി ചെയ്തതിന് തനിക്ക് പണം കിട്ടിയോ എന്ന് സെക്യൂരിറ്റി ഗാർഡിനോട് യുവതി ചോദിക്കുന്നതും വീഡിയോയില്‍ കാണാം. സുഹൃത്തുക്കള്‍ ചേർന്ന് യുവതിയെ പിടിച്ചുമാറ്റാൻ ശ്രമിക്കുമ്ബോള്‍ അവർ കൂടുതല്‍ അക്രമാസക്തയാകുന്നതും ദൃശ്യങ്ങളിലുണ്ട്. സോഷ്യല്‍ മീഡിയ പോസ്റ്റില്‍ സംഭവത്തിൻ്റെ സമയവും തീയതിയും സ്ഥിരീകരിച്ചിട്ടില്ല. എന്നാല്‍, പോസ്റ്റ് പ്രകാരം സംഭവം നടന്നത് നോയിഡയിലാണ്.
അർഹാന്ത് ഷെല്‍ബി എന്ന X- ഉപയോക്താവാണ് വീഡിയോ പങ്കുവെച്ചത്. വീഡിയോ ഓണ്‍ലൈനില്‍ പങ്കിട്ടതിന് തൊട്ടുപിന്നാലെ, അത് പ്രേക്ഷകരുടെ ശ്രദ്ധ ആകർഷിക്കുകയും യുവതിയുടെ പെരുമാറ്റം ആളുകളെ അലോസരപ്പെടുത്തുകയും നിരവധിപ്പേർ വിമർശനം ഉയർത്തുകയും ചെയ്തു. വീഡിയോയ്ക്ക് താഴെ പലരും ഈ രാജ്യത്ത് ഒരു പുരുഷ കമ്മീഷൻ അത്യാവശ്യമാണന്നും യുവതിയെ പിടിച്ച് പൊലീസില്‍ ഏല്‍പ്പിക്കണമെന്നും അഭിപ്രായപ്പെട്ടു. ഇതിനോ‌ടകം രണ്ട് ലക്ഷത്തിലധികം ആളുകളാണ് ഈ വീഡിയോ കണ്ടത്.
