“പേര് അംബിക നായർ, നല്ലൊരു പങ്കാളിയെ തേടുന്നു, വാട്സ്ആപ്പ് നമ്പർ 8129218699”: ചലച്ചിത്രതാരം മാലാപാർവ്വതിയുടെ ചിത്രങ്ങൾ ഉപയോഗിച്ച് ഫേസ്ബുക്കിൽ വ്യാജ പ്രചരണവുമായി രേഖാമേനോൻ എന്ന പ്രൊഫൈൽ; റിപ്പോർട്ട് ചെയ്യാൻ അഭ്യർത്ഥിച്ച് താരം; വിശദാംശങ്ങൾ വായിക്കാം.

സോഷ്യല്‍ മീഡിയയില്‍ വ്യാജന്മാര്‍ ധാരാളമാണ്. സമൂഹത്തില്‍ അറിയപ്പെടുന്ന സ്ത്രീകളുടെ ചിത്രങ്ങൾ ഉപയോഗിച്ച് ഇത്തരം വ്യാജന്മാർ നിരവധി തട്ടിപ്പുകളും നടത്താറുണ്ട്. ഇത്തരത്തിൽ ഒരു തട്ടിപ്പ് ആളുകളുടെ ശ്രദ്ധയിൽ കൊണ്ടുവന്നിരിക്കുകയാണ് ചലച്ചിത്ര നടി മാലാ പാർവതി. രേഖാ മേനോൻ എന്ന പേരുള്ള ഫേസ്ബുക്ക് പേജിൽ നിന്ന് നിരവധി സ്ത്രീകളുടെയും പെൺകുട്ടികളുടെയും ചിത്രങ്ങൾ നൽകിയാണ് തട്ടിപ്പുകാർ വല വിരിച്ചിരിക്കുന്നത്.

നല്ലൊരു പങ്കാളിയെ തേടുന്നു എന്ന കുറിപ്പിനൊപ്പം ചലച്ചിത്രതാരം മാലാ പാർവതിയുടെ ഒരു ചിത്രമാണ് നൽകിയിരിക്കുന്നത്. അംബിക നായർ എന്നാണ് പേരെന്നും, നല്ലൊരു പങ്കാളിയെ തേടുന്നു എന്നുമാണ് കുറുപ്പിലുള്ളത്. ഈ കുറുപ്പിനൊപ്പം ആണ് മാലാ പാർവതിയുടെ ചിത്രവും ചേർത്തിരിക്കുന്നത്. 8129218699 എന്നത് വാട്സ്ആപ്പ് നമ്പർ ആയും ചേർത്തിരിക്കുന്നു.