കുട്ടികള് പാട്ടുപാടുന്നതിന്റെയും ഡാൻസ് കളിക്കുന്നതിന്റെയുമൊക്കെ വീഡിയോകള് സോഷ്യല് മീഡിയയില് വൈറലാകാറുണ്ട്. ചില സമയങ്ങളില് കുട്ടികള് മുതിര്ന്നവരെപ്പോലെ, വളരെ പക്വതയോടെയൊക്കെ പെരുമാറാറുണ്ട്. അത്തരത്തില് ഒരമ്മയുടെയും മകന്റെയും വീഡിയോയാണ് ഇപ്പോള് സമൂഹമാദ്ധ്യമങ്ങളില് പ്രചരിച്ചുകൊണ്ടിരിക്കുന്നത്.
അമ്മയും കുട്ടിയും സീബ്ര ക്രോസിലൂടെ റോഡ് മുറിച്ചുകടക്കുന്നതാണ് വീഡിയോയുടെ തുടക്കത്തിലുള്ളത്. പെട്ടെന്ന് ഒരു കാര് വന്ന് അമ്മയെ ഇടിച്ചിടുകയാണ്. കുട്ടി പേടിച്ചുപോയി. തുടര്ന്ന് വീണുകിടക്കുന്ന അമ്മയെ പിടിച്ചെഴുന്നേല്പ്പിക്കുകയാണ്. പിന്നാലെ അമ്മയെ ഇടിച്ചിട്ട വണ്ടിയില് ദേഷ്യത്തോടെ ചവിട്ടുകയാണ് കുട്ടി. ഈ സമയം കാറില് നിന്നൊരാള് ഇറങ്ങിവരുന്നു. കൂടാതെ ആളുകള് യുവതിയെ സഹായിക്കാനായി തടിച്ചുകൂടി. ഈ സമയം കുട്ടി അമ്മയ്ക്കരികിലേക്ക് കരഞ്ഞുകൊണ്ട് ഓടുകയാണ്. തുടര്ന്ന് എല്ലാവരും കൂടി യുവതിയെ പിടിച്ച് കാറില് കയറ്റുന്നതാണ് വീഡിയോയിലുള്ളത്.
ഇൻസ്റ്റഗ്രാം അടക്കമുള്ള സോഷ്യല് മീഡിയയിലാണ് വീഡിയോ വ്യാപകമായി പ്രചരിക്കുന്നത്. നിരവധി പേരാണ് ലൈക്ക് ചെയ്തത്. തന്റെ അമ്മയെ രക്ഷിക്കാൻ ഒരു കുട്ടി പോരാടിയാല് ലോകം മുഴുവൻ കൂടെയുണ്ടാകും എന്ന അടിക്കുറിപ്പോടെയാണ് ദൃശ്യങ്ങള് പോസ്റ്റ് ചെയ്തത്.നിരവധി പേരാണ് വീഡിയോയ്ക്ക് കമന്റ് ചെയ്തിരിക്കുന്നത്. ‘ഒരമ്മയും മകനും തമ്മിലുള്ള സ്നേഹത്തിന്റെ നേര്ചിത്രമാണ് ഈ വീഡിയോ’, ‘സ്നേഹവും കരുണയുമൊക്കെ ഇപ്പോഴും നിലനില്ക്കുന്നുണ്ടെന്നതിന്റെ ഉത്തമ ഉദാഹരണമാണ് ഈ വീഡിയോ’ തുടങ്ങി നിരവധി കമന്റുകളാണ് പോസ്റ്റിന് വന്നുകൊണ്ടിരിക്കുന്നത്.