ന്യൂഡല്‍ഹി: പ്രമുഖ ബോളിവുഡ് താരം സുരേഖ സിക്രി(75) അന്തരിച്ചു. ഹൃദയാഘാതത്തെത്തുടര്‍ന്നായിരുന്നു അന്ത്യം. മൂന്നു തവണ മികച്ച സഹനടിക്കുള്ള ദേശീയ പുരസ്കാരം നേടിയ നടിയാണ് സുരേഖ. 1998ല്‍ പുറത്തിറങ്ങിയ ജന്മദിനം എന്ന മലയാള സിനിമയിലും ഇവര്‍ അഭിനയിച്ചു. ബാലികാവധു എന്ന ടെലിവിഷന്‍ പരന്പരയിലെ അഭിനയം ഏറെ ശ്രദ്ധ പിടിച്ചുപറ്റി. മികച്ച സഹനടിക്കുള്ള ദേശീയ പുരസ്കാരം ഏറ്റവും അധികം തവണ നേടിയതിന്‍റെ റിക്കാര്‍ഡ് സുരേഖയ്ക്കാണ്.
ഡല്‍ഹിയില്‍ ജനിച്ച സുരേഖയുടെ കുട്ടിക്കാലം ഉത്തരാഖണ്ഡിലെ കുമയൂണിലായിരുന്നു. 1978ല്‍ പുറത്തിറക്കിയ”കിസാ കുര്‍ത്തി കാ” ആണ് ആദ്യ ചിത്രം. ഗോവിന്ദ് നിഹ്‌ലാനിയുടെ തമസ്(1986) എന്ന ചിത്രത്തിലെ അഭിനയത്തിനാണ് ആദ്യ ദേശീയ അവാര്‍ഡ് ലഭിച്ചത്. 1989ല്‍ രണ്ടാമത്തെ ദേശീയ അവാര്‍ഡ് ലഭിച്ചു. 2019ല്‍ ബഥായി ഹോയിലൂടെ മൂന്നാമത്തെ ദേശീയ അവാര്‍ഡ് ലഭിച്ചു.
2018ല്‍ പുറത്തിറങ്ങിയ “ബധായി ഹോ”ആ വര്‍ഷത്തെ ഹിറ്റുകളിലൊന്നായിരുന്നു. നീന ഗുപ്ത, ഗജരാജ് റാവു, ആയുഷ്മാന്‍ ഖുറാന എന്നിവരാണു ചിത്രത്തിലെ മറ്റു താരങ്ങള്‍.ശ്യാം ബെനഗലിന്‍റെ ചലച്ചിത്രം മാമ്മോ(1994) സുരേഖയുടെ സിനിമാ ജീവിതത്തിലെ ശ്രദ്ധേയ ചിത്രങ്ങളിലൊന്നാണ്. 2020ല്‍ പുറത്തിറങ്ങിയ ഗോസ്റ്റ് സ്റ്റോറീസ് ആണ് അവസാന ചിത്രം. ഹേമന്ത് റെഗെ ആണ് സുരേഖയുടെ ഭര്‍ത്താവ്. 2009ല്‍ അദ്ദേഹം അന്തരിച്ചു. രാഹുല്‍ സിക്രിയാണു മകന്‍.
