പാലാ: പാലായില് ഇതരസംസ്ഥാന യുവതികള് ഒഴുക്കില്പ്പെട്ടു. ഇവരില് ഒരാള് മരിച്ചു. ളാലംതോട്ടില് കുളിക്കുന്നതിനിടെ ആണ് ഇവര് ഒഴുക്കില്പ്പെട്ടത്. മധ്യപ്രദേശ് സ്വദേശിനി നെഹയാണു മരിച്ചത്. പാലായില് സ്ലോലെസ് ബ്യൂട്ടി പാര്ലറിലെ ജീവനക്കാരിയാണ് മരിച്ച നേഹ. ളാലം തോട്ടില് ഇന്നലെ ഉച്ചയോടെയാണ് സംഭവം
ബിന്ധ്യ, രണ്ബീര്, സുജുലാല്, ചന്ദ്ര് എന്നിവരാണ് നെഹയോടൊപ്പം കുളിക്കാന് ഇറങ്ങിയത്. ഇവര് രക്ഷപ്പെട്ടു. ഇവിടെ കുളിക്കുന്നത് സമീപവാസിയായ വീട്ടമ്മ ശക്തമായ ഒഴുക്കുള്ളതിനാല് വിലക്കിയിരുന്നു. എന്നാല് തങ്ങള്ക്ക് നീന്തല് അറിയാമെന്ന് ഇവര് പറഞ്ഞു. നെഹയും (31), ബിന്ധ്യയും (28) ആണ് ഒഴിക്കില്പ്പെട്ടത്. തോട്ടിലെ ചെടിയില് ബിന്ധ്യ പിടിച്ചുകിടന്നെങ്കിലും 150 മീറ്ററോളം താഴോട്ട് നെഹ ഒഴുകിപ്പോയി.
സംഭവം നടക്കുമ്ബോള് ജില്ലാ സ്പോര്ട്സ് ഹോസ്റ്റലിലേക്കുള്ള വിദ്യാര്ഥികളുടെ പ്രവേശനം സ്റ്റേഡിയത്തില് നടക്കുകയായിരുന്നു. നിലവിളികേട്ട് ജില്ലാ സ്പോര്ട്സ് ഓഫീസര് എസ്. മനോജ്, സ്പോര്ട്സ് കൗണ്സില് നീന്തല് പരിശീലകന് വേണുഗോപാലന്നായര്, അത്ലറ്റിക് പരിശീലകന് ബൈജു ജോസഫ് എന്നിവര് ഓടിയെത്തി. ഇവരില് വേണുഗോപാലും ബൈജു ജോസഫും തോട്ടിലേക്ക് ചാടി ഇവരെ കരയ്ക്കെത്തിക്കുകയായിരുന്നു.ഫയര്ഫോഴ്സ് ഉദ്യോഗസ്ഥ ഉടന് തന്നെ ആശുപത്രിയില് എത്തിച്ചെങ്കിലും നെഹയുടെ ജീവന് രക്ഷിക്കാനായില്ല.